Pemansut
14 Jehovah lalu bejaku ngagai Moses: 2 “Padah ngagai orang Israel, sida patut nikal baru lalu nirika kem ba depan Pihahirot, iya nya entara Mikdol enggau tasik. Kita mesti nirika kem ba tisi tasik betunga enggau Baal-sepon. 3 Udah nya, Firaun deka madah: ‘Orang Israel tentu udah tesat lalu enda nemu jalai pansut ari menua puang.’ 4 Aku deka nejuka ati Firaun degil, lalu iya deka ngagai kita. Tang, lebuh Aku ngalahka Firaun enggau semua bala soldadu iya, Aku deka dimuliaka. Nya baru orang Ejip deka nemu, Aku tu meh Jehovah.” Orang Israel pan ngereja utai ke dipadah ngagai sida.
5 Pengudah raja Ejip nemu orang Israel udah mupuk, iya enggau bala pegawai iya pan lalu berubah runding. Ku sida madah pasal orang Israel: “Nama kebuah kitai ngelepaska ulun kitai? Nama ga kitai ngereja nya?” 6 Firaun pan mai bala soldadu iya, lalu nyediaka kerita kuda kena beperang. 7 Firaun mai 600 iti kerita kuda ti pemadu manah. Iya mega mai semua kerita kuda ke bukai ba menua Ejip, lalu tiap iti kerita kuda nya ditepan bala soldadu. 8 Jehovah nejuka ati Firaun degil. Firaun, raja orang Ejip nya, lalu begagaika orang Israel ke udah ninggalka menua Ejip enggau berani. 9 Semua kerita kuda, bala soldadu ke nepan kuda, enggau raban soldadu Firaun begagaika orang Israel. Sida majak semak enggau orang Israel ke benung ba kem sida ba tisi tasik. Kem sida ba depan Pihahirot sereta betunga enggau Baal-sepon.
10 Lebuh Firaun enggau bala soldadu iya nyau majak semak, orang Israel ulih meda orang Ejip benung begagaika sida. Orang Israel pan nyadi takut, lalu sida ngangauka Jehovah minta tulung. 11 Ku sida bejaku ngagai Moses: “Nama kebuah nuan ngasuh kami pansut ari Ejip? Ba menua Ejip nadai kubur pia? Nya kebuah nuan ngasuh kami mati ba menua puang tu? 12 Ukai ke enda kami udah madahka nuan maya ba Ejip: ‘Anang kiruhka kami. Awakka kami terus nyadi ulun orang Ejip’? Manah agi kami nyadi ulun orang Ejip ari ke mati ba menua puang tu.” 13 Ku Moses madah ngagai orang Israel: “Anang takut. Bediri tegap lalu peda meh baka ni Jehovah deka nyelamatka kita seharitu. Nadai kita meda orang Ejip nya agi. 14 Jehovah Empu deka belaban ngarika kita. Kita semina diau jenuh aja.”
15 Jehovah lalu bejaku ngagai Moses: “Nama kebuah nuan agi ngangauka Aku minta tulung? Asuh orang Israel neruska pejalai sida. 16 Angkatka tungkat nuan lalu unjurka tungkat nya ngagai tasik. Belah tasik nya ngambika orang Israel ulih bejalai ba tanah ti rangkai meraka tasik nya. 17 Aku deka nejuka ati orang Ejip degil ngambika sida ngagai kita. Nya deka ngasuh Aku dimuliaka, lebuh Aku ngalahka Firaun, semua bala soldadu iya, kerita kuda iya, enggau bala soldadu iya ke nepan kuda. 18 Nya baru orang Ejip deka nemu, Aku tu meh Jehovah, lebuh Aku dimuliaka maya Aku ngalahka Firaun, kerita kuda iya, enggau bala soldadu iya ke nepan kuda.”
19 Udah nya, melikat Petara ti bendar, ke ba depan orang Israel, mindah ke belakang sida. Tiang remang* ke ba depan sida mega mindah ke belakang sida. 20 Tiang remang nya ngetu ba entara orang Ejip enggau orang Israel. Nya alai, endur orang Ejip petang, tang endur orang Israel terang. Nyadi sepemanjai malam nya, orang Ejip enda ulih semak ngagai orang Israel.
21 Udah nya, Moses ngunjurka jari iya ngagai tasik. Jehovah lalu ngasuh ribut ari timur bepuput enggau balat sepemanjai malam. Tasik nya pan tebelah nyentukka tanah ba baruh tasik nya rangkai. 22 Ai tasik nya nyadi baka dinding ba sepiak kanan enggau ba sepiak kiba orang Israel. Nya alai, sida ulih meraka tasik nya nengah tanah ti rangkai. 23 Orang Ejip begagaika sida. Semua kuda Firaun, kerita kuda iya, enggau bala soldadu iya ke nepan kuda begagaika sida sampai ke tengah tasik. 24 Maya dini hari,* ari dalam tiang api enggau tiang remang, Jehovah meda orang Ejip lalu Iya ngasuh orang Ejip charut. 25 Iya nyabut roda kerita kuda sida ngambika kerita nya tusah deka bejalai. Orang Ejip lalu madah: “Aram kitai rari ari orang Israel, laban Jehovah ngelaban kitai ngarika orang Israel.”
26 Udah nya, Jehovah bejaku ngagai Moses: “Unjurka jari nuan ngagai tasik, ngambika ai tasik nya ninggang orang Ejip, kerita kuda sida, enggau bala soldadu sida ke nepan kuda.” 27 Moses terus ngunjurka jari iya ngagai tasik. Orang Ejip nguji ngerarika diri, tang Jehovah nikauka sida ngagai tengah tasik. Maya hari nyauka tawas, ai tasik pulai baru baka selama. 28 Semua kerita kuda, bala soldadu ke nepan kuda, enggau semua bala soldadu Firaun ke begagaika orang Israel sampai ke tengah tasik, tengelam magang. Nadai siku pan sida selamat.
29 Orang Israel bejalai ba tanah ti rangkai meraka tasik nya, lalu ai tasik nyadi baka dinding ba sepiak kanan enggau ba sepiak kiba sida. 30 Ba hari nya, Jehovah nyelamatka orang Israel ari orang Ejip. Orang Israel meda bangkai orang Ejip betegaring ba tebing tasik. 31 Orang Israel mega meda Jehovah ngemunaska orang Ejip ngena kuasa Iya ti besai. Orang Israel pan berengkah nangika Jehovah, lalu arapka Jehovah enggau nembiak Iya, Moses.