Pengulu
11 Siku orang Gilead ke benama Jeptah nya pahlawan ti kering. Indai iya siku pelacur, lalu apai iya Gilead. 2 Bini Gilead mega ngadaka beberapa iku anak lelaki. Lebuh bala anak lelaki nya udah besai, sida muru Jeptah lalu madah ngagai iya: “Nuan enda tau bulih pesaka ari ruang bilik apai kami, laban nuan anak indu bukai.” 3 Nya alai, Jeptah ngerarika diri ari bala menyadi iya lalu diau ba menua Top. Orang ke nadai kereja mupuk enggau Jeptah, lalu sida nitihka iya.
4 Nyau kelama udah nya, orang Amon nyerang orang Israel. 5 Lebuh orang Amon nyerang orang Israel, bala tuai orang Gilead jampat-jampat mai Jeptah pulai ari menua Top. 6 Ku sida madah ngagai Jeptah: “Kami deka nuan nyadi ketuai soldadu kami, ngambika kami ulih ngelaban orang Amon.” 7 Tang, Jeptah nyaut bala tuai orang Gilead: “Suba kita begedi amat ke aku, nyentukka kita muru aku ari rumah apai aku. Tang, nama kebuah kita datai ngagai aku diatu lebuh kita tusah?” 8 Ku bala tuai orang Gilead nyaut Jeptah: “Nya meh kebuah kami datai ngagai nuan diatu. Enti nuan enggau kami belaban enggau orang Amon, nuan deka nyadi tuai kami sereta semua orang Gilead.” 9 Jeptah pan nyaut bala tuai orang Gilead: “Enti kita mai aku pulai belaban enggau orang Amon, lalu enti Jehovah nulung aku ngalahka sida, aku deka nyadi tuai kita.” 10 Ku bala tuai orang Gilead madah ngagai Jeptah: “Awakka Jehovah nyadi saksi* kitai enti kami enda ngereja utai ke dipadahka nuan.” 11 Nya alai, Jeptah pan mupuk enggau bala tuai orang Gilead, lalu sida ngelantik iya nyadi tuai sida sereta ketuai soldadu sida. Jeptah nandu semua jaku iya ba depan Jehovah ba Mispah.
12 Udah nya, Jeptah ngasuh orang ngirumka pesan tu ngagai raja orang Amon: “Nama kebuah nuan ngelaban aku lalu nyerang menua aku?” 13 Raja orang Amon pan madah ngagai orang ke mai pesan Jeptah: “Nya ketegal orang Israel ngambi menua aku lebuh sida pansut ari Ejip. Ari Lebak Arnon nyentuk ngagai Lebak Jabok, sampai ngagai Sungai Jordan udah diambi sida magang. Nya alai, pulaika baru menua nya. Nya baru nadai perang.” 14 Tang, Jeptah ngasuh orang nganjung pesan baru ngagai raja Amon. 15 Tu pesan iya:
“Tu meh utai ke dipadahka Jeptah: ‘Israel nadai ngambi menua orang Moap enggau menua orang Amon. 16 Lebuh orang Israel pansut ari Ejip, sida bejalai nengah menua puang nuju ngagai Tasik Mirah lalu datai ba Kades. 17 Lebuh orang Israel ngirumka pesan tu ngagai raja Edom: “Awakka kami nengah menua nuan,” raja Edom enggai mendingka sida. Lebuh sida ngirumka pesan ngagai raja Moap, iya mega enda setuju. Nya alai, orang Israel diau ba Kades. 18 Lebuh sida bejalai ba menua puang, sida ngelaungka menua Edom enggau Moap. Sida bejalai nuju ngagai begian timur menua Moap, lalu nirika kem ba kawasan Lebak Arnon. Lebak Arnon nya sempadan menua Moap. Nya alai, sida endang nadai tama ngagai menua Moap.
19 “‘Udah nya, orang Israel ngasuh orang ngirumka pesan ngagai Sihon, iya nya raja orang Amor ke merintah ba Hesbon. Ku sida madah ngagai iya: “Awakka kami nengah menua nuan ngagai menua kami empu.” 20 Tang, Sihon enda pechayaka orang Israel lalu enggai ngasuh sida nengah menua iya. Sihon indah ngempuruka semua bala iya, lalu nirika kem ba Jahas lalu beperang enggau orang Israel. 21 Jehovah, Petara orang Israel, pan nyerahka Sihon enggau semua bala iya ngagai orang Israel. Orang Israel ngalahka sida, lalu ngambi semua menua orang Amor. 22 Nya alai, sida ngambi semua kawasan orang Amor ari Lebak Arnon sampai ngagai Lebak Jabok, sereta ari menua puang sampai ngagai Sungai Jordan.
23 “‘Jehovah, Petara orang Israel, meh ke muru orang Amor ari menua tu lalu meri menua tu ngagai nembiak Iya, orang Israel. Tang diatu, nuan deka muru sida? 24 Endaka nuan ngambi sebarang utai ke diberi petara nuan, Kemos? Kami mega deka ngambi sebarang menua ke diberi Petara kami, Jehovah, ngagai kami. 25 Kati nuan manah agi ari Balak anak Sipur, raja Moap nya? Kala iya belaban enggau orang Israel tauka beperang enggau sida? 26 Pengelama 300 taun, orang Israel diau ba Hesbon enggau kuta-kuta mit ke ngelingi iya, ba Aroer enggau kuta-kuta mit ke ngelingi iya, sereta ba semua kuta ba tisi Lebak Arnon. Nama kebuah nuan enda nguji ngambi semua nya ngelama tu? 27 Aku nadai bedosa ngagai nuan. Nuan ke salah laban nuan nyerang aku. Seharitu, awakka Jehovah nyadi Hakim entara orang Israel enggau orang Amon.’”
28 Tang, raja Amon enggai mendingka pesan ke dikirumka Jeptah ngagai iya.
29 Kuasa kudus Jehovah pan nurun ngagai Jeptah. Udah nya, iya bejalai nengah menua Gilead enggau Manasi, nuju ngagai Mispeh ba Gilead. Ari Mispeh, iya neruska pejalai iya ngagai menua orang Amon.
30 Udah nya, Jeptah besumpah ngagai Jehovah lalu madahka: “Enti Nuan nyerahka orang Amon ngagai aku, 31 aku deka meri orang ti keterubah ke pansut ari rumah aku, ke datai ngambat aku lebuh aku pulai enggau selamat ari menua orang Amon, ngagai Nuan, Jehovah. Aku deka nyerahka iya nyadi pemeri tunu.”*
32 Nyadi, Jeptah pan belaban enggau orang Amon, lalu Jehovah nyerahka sida ngagai iya. 33 Mayuh amat orang Amon ke dibunuh iya ari Aroer nyentuk ngagai Minit, sampai ngagai Abel-keramim, lalu iya mega nguasa 20 iti kuta sida. Orang Amon pan alah laban orang Israel.
34 Lebuh Jeptah pulai ngagai rumah iya ba Mispah, anak indu iya pansut ngambat iya sambil betanda enggau nebah tamborin. Iya aja meh anak Jeptah, laban Jeptah nadai anak indu tauka anak lelaki ke bukai. 35 Lebuh Jeptah meda anak indu iya, iya pan lalu terus nyarikka gari iya lalu madahka: “Akai, anak! Tusah amat ati aku. Diatu, nuan meh ke patut diburu aku. Aku udah besemaya ngagai Jehovah, lalu aku enda ulih bulaka semaya.”
36 Ku anak iya nyaut iya: “Apai, enti nuan udah besemaya ngagai Jehovah, kereja meh ngagai aku baka ke udah disemayaka nuan nya, laban Jehovah udah nulung nuan malas penyai bala munsuh nuan, orang Amon nya.” 37 Udah nya, iya madah ngagai apai iya: “Aku bisi siti peminta. Beri meh aku dua bulan, ngambika aku ulih ngagai kawasan ke begunung. Awakka aku nyabak enggau bala kaban aku ke indu, ngenangka diri enda ulih kawin seumur idup.”
38 Ku Jeptah madahka: “Alai meh anak.” Nyadi, Jeptah pan ngelakka iya mupuk pengelama dua bulan. Iya pan mupuk ngagai kawasan ke begunung enggau bala kaban iya, lalu nyabak ngenangka diri enda ulih kawin seumur idup. 39 Pengudah dua bulan, iya pan pulai baru ngagai apai iya, Jeptah. Jeptah pan ngamatka sumpah ke digaga iya ke bekaul enggau anak iya. Seumur idup, anak iya enda idup begulai* enggau lelaki. Kenyau ari maya nya, tu meh adat* ke dititihka orang Israel: 40 Tiap taun pengelama empat hari, bala indu orang Israel ke biak deka ngelawa anak indu Jeptah, orang Gilead nya, lalu meransang* iya.