Luke

13 Maya nya, beberapa iku orang ba dia madah ngagai Jesus, pasal sekeda orang Galili dibunuh Pilate lebuh sida benung meri pemeri tunu. 2 Jesus madah ngagai sida: “Kati kita ngumbai utai tu nyadi ketegal sekeda orang Galili nya bedosa agi ari semua orang Galili ke bukai? 3 Enda. Aku madah ngagai kita: Enti kita enda nesal ati, semua kita deka dipunaska baka sida. 4 Perundingka mega pasal 18 iku orang ke mati ditinggang menara Siloam ke runtuh. Kati kita ngumbai dosa sida besai agi ari dosa semua orang bukai ba Jerusalem? 5 Enda. Aku madah ngagai kita: Enti kita enda nesal ati, semua kita deka dipunaska baka sida.”

6 Udah nya, iya madah pasal jaku sempama tu: “Siku lelaki nanam pun kayu ara ba kebun anggur iya. Iya deka ngiga buah ba pun kayu nya, tang sigi buah pan enda ditemu iya. 7 Nya alai, iya bejaku ngagai orang ke bekereja ba kebun nya, ‘Udah tiga taun aku ngiga buah ba pun kayu ara tu, tang nadai sigi buah pan ditemu aku. Tebang pun kayu tu! Nadai guna pun kayu tu tumbuh ba tanah enti iya enggai bebuah.’ 8 Orang ke bekereja nya nyaut iya, ‘Tuan, tejuka pun kayu nya ba dia setaun da agi. Aku deka nyangkul tanah ngelingi pun kayu tu lalu meri iya baja. 9 Enti pun kayu tu bebuah ila, manah meh nya. Enti enda, tebang aja pun kayu tu.’”

10 Maya Hari Sabat, Jesus ngajar orang ba balai gempuru. 11 Ba dia bisi siku indu ke sakit pengelama 18 taun. Ketegal melikat ti jai, iya nyadi bungkuk lalu enda ulih bediri rurus. 12 Lebuh Jesus meda indu nya, Jesus ngangauka iya lalu bejaku: “Endu, nuan udah digeraika ari penyakit nuan.” 13 Pengudah nya, iya ngengkahka jari iya ba atas indu nya. Tekala nya, indu nya bediri rurus lalu ngemuliaka Petara. 14 Lebuh tuai balai gempuru meda Jesus ngeraika orang maya Hari Sabat, iya ringat lalu madah ngagai orang mayuh: “Orang bekereja enam hari aja. Nyadi enti kita deka digeraika, datai maya nya ukai maya Hari Sabat.” 15 Tang Tuan Jesus nyaut iya: “Kita tu orang ke pura-pura ngapa. Maya Hari Sabat, endaka genap iku kita ngelepaska sapi tauka keledai kita ari kandang lalu mai sida pansut ngirup ai? 16 Indu tu ari peturun Abraham lalu udah ditanchang Sitan pengelama 18 taun. Endaka iya patut dilepaska ari tanchang tu maya Hari Sabat?” 17 Lebuh Jesus bejaku munyi nya, semua orang ke ngelaban iya berasai malu. Tang orang mayuh gaga ati ke semua utai ti chukup badas ke dikereja iya.

18 Ku Jesus agi: “Perintah Petara nya baka nama? Nama utai ke ulih disemaka aku enggau Perintah Petara? 19 Perintah Petara nya baka igi mustard* ti dibai orang siku lalu ditanam iya ba kebun iya. Igi mustard nya tumbuh nyadi baka pun kayu, lalu burung begagaka tansang ba sebelah dan iya.”

20 Sekali agi iya madahka: “Nama utai ke ulih disemaka aku enggau Perintah Petara? 21 Perintah Petara nya baka ragi ti diambi siku indu, lalu dichampurka iya enggau tepung ke mayuh,* datai ke semua tepung nya nyau kembai magang.”

22 Lebuh mansang ngagai Jerusalem, Jesus ngetu ba nengeri siti ngagai nengeri siti sereta genturung pendiau ngagai genturung pendiau, ngambika ulih ngajar orang. 23 Siku lelaki nanya iya: “Tuan, kati semina mimit aja orang ke deka diselamatka?” Iya madah ngagai orang mayuh: 24 “Bebendar meh tama nengah pintu ti sempit. Aku madah ngagai kita: Mayuh orang deka nguji tama nengah pintu nya tang enda ulih mujur. 25 Pengudah orang ke bempu rumah ngunchi pintu, kita deka bediri ba luar lalu ngetuk pintu. Kita deka madahka, ‘Tuan, buka pintu tu ke kami.’ Tang iya deka nyaut kita, ‘Aku enda nemu ari ni penatai kita.’ 26 Udah nya kita deka madahka, ‘Kami kala makai ngirup enggau nuan, lalu nuan mega kala ngajar ba jalai besai nengeri kami.’ 27 Tang iya deka madah ngagai kita, ‘Aku enda nemu ari ni penatai kita. Rari ari aku, semua kita ke ngereja utai ti jai!’ 28 Kita deka meda Abraham, Isak, Jakop, enggau semua nabi ba Perintah Petara, tang kita deka dibuai keluar. Ba dia meh kita deka nyabak sereta begerit ngeli. 29 Nambahka nya, orang ke datai ari timur, barat, utara, enggau selatan deka duduk enggau makai ba Perintah Petara. 30 Au, sekeda orang ke dudi deka nyadi dulu, lalu sekeda orang ke dulu deka nyadi dudi.”

31 Ba maya nya mega, beberapa iku orang Parisi datai lalu madah ngagai iya: “Mupuk nuan ari endur tu laban Herod deka munuh nuan.” 32 Ku iya madah ngagai sida: “Alai, padah ngagai munsang* ke pintar nipu nya, ‘Seharitu enggau pagila, aku deka muru melikat ti jai sereta ngeraika orang ti sakit. Ba hari ketiga, pengawa aku deka tembu.’ 33 Taja pia, aku patut neruska pejalai aku, seharitu, pagila, enggau lusa, laban siku nabi enda ulih dibunuh ba luar Jerusalem. 34 Jerusalem, Jerusalem, nuan munuh bala nabi lalu nuku orang ke dianjung ngagai nuan ngena batu. Aku suah bendar deka ngempuruka bala anak nuan baka indu manuk ke ngempuruka anak iya ba baruh sayap iya! Tang nuan enggai. 35 Nya alai, Petara deka ninggalka rumah nuan! Aku madah ngagai nuan: Nuan tentu nadai agi meda aku nyentuk ngagai maya nuan nyebut: ‘Beberekat meh iya ke datai dalam nama Jehovah!’”