Isaiah
44 “O Jakop, nembiak Aku,
O Israel, ke dipilih Aku, dingaka meh.
2 Tu meh utai ke dipadahka Jehovah,
Iya nya Iya ke udah ngaga nuan enggau ke udah nempa* nuan,
Ke udah nulung nuan kenyau ari nuan dalam kandung:*
‘Nembiak Aku Jakop, anang meh takut,
Pia mega Jeshurun,* ke udah dipilih Aku.
3 Aku deka meri ai ngagai orang ke aus,*
Sereta ngasuh sungai mengalir ba tanah ti rangkai.
Aku deka nuangka kuasa kudus Aku ngagai peturun nuan
Sereta berekat Aku ngagai uchu ichit nuan.
4 Sida deka tumbuh subur baka rumput,*
Baka pun poplar ke ba tebing sungai.
5 Siku deka madah: “Aku enggi Jehovah.”
Siku agi deka ngangauka diri empu ngena nama Jakop.
Siku da agi deka nulis ba jari iya: “Enggi Jehovah.”
Lalu iya deka ngena nama Israel.’
6 Aku meh Jehovah, Raja enggau Penebus Israel, ketuai soldadu serega.
Tu meh utai ke dipadahka Aku, Jehovah:
‘Aku meh ti keterubah enggau kepenudi.
Nadai Petara bukai kelimpah ari Aku.
7 Sapa ke baka Aku?
Awakka iya bejaku lalu mantaika bukti ngagai Aku!
Kenyau ari maya Aku numbuhka bansa tu kelia,
Awakka sida madahka utai ke deka datai
Enggau utai ke deka nyadi.
8 Anang meh berasai takut,
Lalu anang nejuka asai ati nya ngasuh kita enda ulih engkebut.
Endaka Aku udah nusui sereta madah ngagai kita dulu?
Kita meh saksi Aku.
Kati bisi Petara bukai kelimpah ari Aku?
Nadai, nadai Gunung Batu bukai, kelimpah ari Aku Empu.’”
9 Semua orang ke ngaga patung nadai guna.
Utai ke dikerinduka sida nadai mai penguntung.
Patung nya enda ulih meri saksi, laban sida* enda ulih meda sereta enda nemu utai.
Nya alai, orang ke ngaga sida deka dikemaluka.
10 Sapa meh ke deka ngaga petara tauka patung besi
Ke nadai mai penguntung?
11 Peda! Semua orang ke bekaban enggau iya deka dikemaluka!
Orang ke ngaga patung nya semina mensia aja.
Awakka semua sida begempuru lalu bediri ba endur diri empu.
Sida deka berasai takut lalu deka sama dikemaluka.
12 Tukang besi ngangatka besi ba atas arang ngena perengka iya.
Iya nempa besi nya ngena tukul.
Iya ngereja pengawa iya ngena lengan iya ti kuat.
Udah nya, iya lapar lalu nadai agi pengering;
Iya nadai ngirup ai lalu berasai lelak.
13 Tukang kayu narit tali penyukat, lalu ngelukis bentuk ngena kapur mirah.
Iya ngukir kayu nya ngena pat, lalu nandaka nya ngena jangka lukis.
14 Bisi orang ngereja pengawa nebang pun sidar.
Iya milih sejenis pun kayu, iya nya pun oak.
Iya nanam pun kayu nya nyentukka pun kayu nya mansang besai, begulai enggau pun kayu ke bukai ba utan.
Iya nanam pun laurel, lalu ujan ngasuh pun kayu nya tumbuh.
15 Udah nya, pun kayu nya dikena iya nyadika kayu api.
Sekeda ari kayu nya ditunu iya
Kena ngangatka tubuh diri sereta manggang roti.
Tang iya mega ngaga petara ngena kayu nya, lalu nyembah petara nya.
Iya ngena kayu nya ngaga patung, lalu besugang ngagai patung nya.
16 Setengah ari kayu nya ditunu iya,
Kena iya manggang dagin ke diempa iya, lalu iya pan puas ati.
Iya mega ngangatka tubuh diri lalu madah:
“Nyamai mai laban api tu.”
17 Tang kayu ke agi tinggal dikena iya ngaga petara, iya nya patung.
Iya besugang lalu nyembah patung nya.
Iya besampi ngagai patung nya lalu madah:
“Selamatka meh aku, laban nuan petara aku!”
18 Orang ke ngaga patung nadai nemu utai; sida nadai meretika utai,
Laban mata sida ditutup rapit, lalu sida enda ulih meda.
Ati sida enda ulih meretika utai ti dalam.
19 Sida nadai penemu tauka nguji meretika utai.
Sida enda belematika pekara tu dalam ati diri:
“Setengah ari kayu nya udah ditunu aku,
Kena aku manggang roti sereta dagin ke diempa aku.
Nyadi patut aku ngena kayu ke agi tinggal kena ngaga utai ti ngasuh keji?
Patut aku nyembah selumpung kayu?”
20 Iya baka orang ke makai amau.
Iya dilimpangka ati iya ke ditipu.
Iya enda ulih nyelamatka diri empu tauka madah:
“Utai ke dipegai jari kanan aku tu nadai guna.”
21 “O Jakop, O Israel, kingatka pekara tu,
Laban nuan nembiak Aku.
Aku udah nempa nuan lalu nuan meh nembiak Aku.
O Israel, Aku deka seruran ingatka nuan.
22 Aku deka muai penyalah nuan, baka ke ngelamun iya ngena remang;*
Aku deka muai dosa nuan baka ke ngelamun iya ngena remang ti tebal.
Pulai meh ngagai Aku, laban Aku deka nebus nuan.
23 O langit, manjung meh enggau ati ti gaga,
Ke pengawa ke udah digaga Jehovah!
O endur ti pemadu baruh ba dunya, manjung meh enggau ati ti gagit!
O gunung, manjung meh enggau ati ti lantang,
Pia mega enggau utan sereta semua pun kayu!
Laban Jehovah udah nebus Jakop,
Lalu Iya ngayanka mulia Iya nengah Israel.”
24 Tu meh utai ke dipadahka Jehovah, iya nya Penebus nuan,
Ke nempa nuan kenyau ari nuan agi dalam kandung:
“Aku meh Jehovah, ke ngaga semua utai.
Aku Empu ke ngerembaika langit
Sereta ngaga dunya.
Sapa ke bisi enggau Aku maya nya?
25 Aku ke nunjukka tanda ke diberi orang ke bejaku kusung* nya salah.
Aku ke ngasuh orang ke nemu meramal nyadi baka orang ke beli.
Aku ke nyarutka runding orang ke bepenemu-dalam
Lalu ngubah penemu sida nyadi pemeli.
26 Aku ke ngasuh jaku nembiak Aku nyadi nyata
Sereta ngamatka semua ramalan seruan* Aku;
Ke madah pasal Jerusalem: ‘Iya deka diuan,’
Sereta ke madah pasal kuta-kuta ba Judah: ‘Sida deka didirika baru.
Aku deka ngaduka iya ke udah runtuh,’
27 Ke madah ngagai ai ti dalam: ‘Rangkai meh,
Lalu Aku deka ngerangkaika semua sungai nuan,’
28 Ke madah pasal Sairus: ‘Iya meh pengibun bedus Aku,
Lalu iya deka ngereja semua peneka Aku,’
Ke madah pasal Jerusalem: ‘Iya deka didirika baru,’
Sereta ke madah pasal Rumah Sembiang: ‘Asas nuan deka digaga.’”