Jaku-Dalam
30 Tu pesan penting ke dipadah Agur anak Jakeh ngagai Itiel enggau Ukal:
2 Aku beli agi ari orang bukai;
Aku nadai penau nemu meretika utai baka orang bukai.
3 Aku nadai kala belajar pasal penemu-dalam,
Lalu aku nadai penemu pasal Iya ti Pemadu Kudus.
4 Sapa ke udah kala niki lalu nurun ari serega?
Sapa ke ulih ngenggam angin ngena kedua-dua jari iya?
Sapa ke ulih mungkus ai dalam baju iya?
Sapa ke ulih negapka semua sempadan dunya?
Sapa nama iya enggau nama anak iya? Enti nuan nemu, padahka meh ngagai aku.
5 Tiap iti jaku Petara nya tulin.
Petara baka terabai ke semua orang ke belindung ba Iya.
6 Anang nambahka utai ba jaku Petara,
Ngambika Iya enda ngerara nuan,
Lalu nunjukka nuan nya bula.
7 O Petara, bisi dua iti utai ke dipinta aku.
Keamatka meh utai ke dipinta aku sebedau aku mati.
8 Tulung meh aku nyeliah ari nyebut utai ti enda jujur sereta bula.
Anang ngasuh aku miskin tauka kaya.
Beri meh aku pemakai ke umbas diguna aku,
9 Ngambika aku enda kenyang lalu nulak Nuan lalu madahka: “Sapa Jehovah?”
Pia mega, anang nejuka aku nyadi miskin nyentukka aku nyau ngenchuri lalu ngenyaika nama Petara aku.
10 Anang betenahka ulun ba depan tuan iya,
Enggaika nuan dikutuk lalu dikumbai salah.
11 Bisi orang nyumpah apai diri
Lalu enda bebasaka indai diri.
12 Bisi orang ngumbai diri tuchi,
Tang sida empu bedau diberesi ari utai ti kamah.
13 Bisi orang ke sumbung,
Lalu mata iya sumbung amat lebuh merening orang!
14 Bisi orang, ngeli sida baka pedang;
Rang sida baka lungga kena nyayat.
Sida negam orang ke baruh pendiau ba dunya
Enggau orang ke miskin entara bala mensia.
15 Lintah bisi dua iku anak indu ke nyebut: “Beri aku! Beri aku!”
Bisi tiga iti utai ke enda kala puas;
Bisi empat iti utai ke enda kala nyebut: “Umbas!”
17 Orang ke ngeleseka apai diri sereta ngelaban indai diri,
Mata iya deka dipantuk burung gagak ari lebak*
Lalu diempa anak burung menaul.
18 Bisi tiga iti utai ke enda ulih dimeretika aku;*
Bisi empat iti utai ke enda ulih ditemu aku:
19 Burung menaul ke terebai ba langit,
Ular ke ngerayap ba atas batu,
Kapal ke belayar ba tengah tasik,
Enggau pendiau siku lelaki lebuh begulai enggau siku indu.
20 Tu meh gaya ulah bini ke udu curang:
Iya makai lalu ngendas mulut diri.
Udah nya, ku iya: “Aku nadai ngereja penyalah.”
21 Bisi tiga iti utai ke ngasuh dunya begusak;
Bisi empat iti utai ke enda ulih ditatka iya:
22 Lebuh ulun nyadi raja,
Lebuh orang ke beli bulih mayuh pemakai,
23 Lebuh indu ke dipegedi* diambi nyadika bini,
Enggau lebuh ulun ke indu ngerampas penuduk tuan iya ke indu.
24 Bisi empat bengkah jelu mit ba dunya tu,
Tang sida pintar amat:
25 Semut enda kering,
Tang sida besimpanka pemakai maya musin panas.
26 Hiraks* enda kering,
Tang sida berumah ba bukit ti bebatu.
27 Buntak nadai raja,
Tang sida mupuk enggau teratur baka soldadu.*
28 Tichak empakap ba dinding ngena kaki iya,
Lalu tichak ulih ditemu ba istana raja.
29 Bisi tiga bengkah utai idup ke narit ati lebuh sida bejalai;
Bisi empat bengkah utai idup ke ngalitka ati lebuh dipeda:
30 Singa nya jelu ti pemadu kering,
Lalu iya enda surut ari sapa-sapa.
31 Ukui ke dikena ngasu, kambin lelaki,
Enggau raja ke bisi raban soldadu.
32 Enti nuan ta beli-beli ngeninggika diri
Tauka nuan ngaga pelan deka ngeninggika diri,
Pampul mulut nuan ngena jari.
33 Baka ai tusu ke ditunyau kena ngulihka mentega,
Lalu baka idung ke bedarah ketegal dipulas,
Baka nya meh pengeringat ke diapi-apika, ke ngasuh laya nyadi.