Jaku-Dalam
2 Orang engka ngumbai jalai diri betul magang,*
Tang Jehovah meresa niat ati iya.
3 Serahka semua utai ke dikereja nuan ngagai Jehovah.
Enggau nya, pelan nuan deka mujur.
4 Jehovah ngasuh semua utai nyadi kena ngamatka tuju Iya,
Nyengkaum ngasuh orang ke jai dipunaska ba hari sida ditinggang bencana.
5 Jehovah amat begedika orang ke sumbung;
Andal meh orang ke baka nya tentu deka diukum.
6 Enti bisi pengerindu ti setia enggau penetap ati, penyalah deka diampunka;
Ketegal nangika Jehovah, orang nguingka diri ari penyai.
7 Lebuh Jehovah lantang ati enggau jalai pengidup sesiku orang,
Iya indah ngasuh munsuh orang nya bebaik enggau orang nya.
8 Manah agi bulih mimit utai ngena chara ti lurus,
Ari ke bulih mayuh utai ngena chara ti enda lurus.
9 Orang engka ngatur jalai dalam ati iya,
Tang Jehovah meh ke ngiring singkang iya.
10 Pemutus ari Petara patut bisi ba mulut raja;
Iya enda tau sekali-kali ngereja utai ti enda adil.
11 Dachin enggau takar ti betul datai ari Jehovah;
Iya netapka batu penimbang dalam kantung.
12 Raja patut begedika pengawa ti jai,
Laban kerusi diraja iya deka tegap enti iya adil merintah.
13 Jaku ti manah ngelantangka ati raja;
Iya rinduka orang ke nyebut utai ti betul.
14 Pengeringat raja baka orang ke mai pesan pemati,
Tang orang ke bepenemu-dalam deka ngasuh ati raja chelap baru.
15 Orang deka nyamai idup enti raja lantang ati ke iya;
Pengelantang ati raja nya baka remang* ke ngasuh ari ujan maya musin bungai.
16 Ngulihka penemu-dalam manah agi ari ngulihka emas!
Ulih meretika utai enggau dalam manah agi ari milih pirak.
17 Orang ke lurus nyeliahka penyai;
Orang ke nyaga jalai diri ngelindung nyawa iya empu.
18 Ulah ti temegahka diri ngasuh diri dipunaska,
Lalu penyumbung ngasuh labuh.
19 Manah agi baruh ati lebuh begulai enggau orang ke lembut ati,
Ari ke bulih ungkup ari utai ke dirampas orang ke sumbung.
20 Orang ke ulih meretika utai enggau dalam ba sesiti pekara deka mujur,
Lalu orang ke arapka Jehovah deka gaga ati.
21 Orang ke bepenemu-dalam deka dikumbai orang ke nemu meretika utai,
Lalu orang ke ngena jaku ti manah* deka ngasuh orang yakin.
22 Ulih berunding enggau dalam nya baka mata ai pengidup ba orang ke ulih berunding baka nya,
Lalu orang ke beli deka diukum pemeli iya empu.
23 Orang ke bepenemu-dalam milih jaku iya enggau bejimat,
Lalu jaku iya ulih ngasuh orang yakin.
24 Jaku ti ngelantangka ati baka madu ti neritik;
Asai iya manis lalu manah ke pengerai tubuh.
25 Orang engka ngumbai diri nitihka jalai ti ngena,
Tang pengujung iya, jalai nya mai iya ngagai pemati.
26 Orang deka bebendar gawa ngambika iya bisi utai ke diempa;
Perut ti lapar ngansak iya gawa.
27 Orang ke nadai guna numbak utai ti jai;
Jaku iya baka api ti mau.
28 Orang ke udu ngaga hal* ngasuh orang bepechah-belah,
Lalu orang ke betenahka orang bukai mutuska kaul ti rapat.
29 Orang ke ganas mai orang bukai ngereja penyai,
Lalu mai orang nya ngagai jalai ti salah.
30 Iya ngijapka mata lebuh iya ngaga pelan ti jai;
Iya tuchum lebuh iya ngereja penyai.
31 Uban orang ke nengah jalai pengelurus
Sempama makota ti bemulia.
32 Orang ke lubah ringat manah agi ari orang ke kering,
Lalu orang ke nagang pengeringat diri kering agi ari orang ke ngalahka kuta.
33 Undi dichabut,*
Tang pemutus iya ari Jehovah.