Isaiah
60 “O indu, angkat meh lalu manchar, laban penampak nuan udah datai.
Mulia Jehovah manchar ngagai nuan.
2 Peda! Pemetang deka ngelamun dunya,
Lalu mua hari ti chelum mungkur mayuh bansa;
Tang Jehovah deka manchar ngagai nuan,
Lalu mulia Iya deka dipeda ba nuan.
3 Mayuh bansa deka datai ngagai penampak nuan,
Lalu bala raja datai ngagai penampak nuan ti beperenching.*
4 Peda semua utai ke ngelingi nuan!
Semua sida udah begempuru; sida datai ngagai nuan.
Bala anak lelaki nuan datai ari endur ti jauh.
Bala anak indu nuan diberap lalu dibai ngagai nuan.
5 Maya nya nuan deka meda lalu mua nuan deka beperenching;
Ati nuan deka berasai gagit sereta penuh enggau pengaga,
Laban pengaya ari tasik deka dibai ngagai nuan;
Reta mayuh bansa deka datai ngagai nuan.
6 Raban unta deka ngemenuhka menua nuan,
Bala anak unta lelaki ari Midian enggau Epah.
Semua orang ari Sheba deka datai.
Sida deka mai emas enggau menyan putih.
Jaku puji ke Jehovah deka ditusui sida.
7 Semua jelu tupi Kedar deka digempuru lalu dibai ngagai nuan.
Bala bedus lelaki Nebaiot deka dikena ba pengawa nuan.
Semua nya deka diserahka ba alta Aku lalu diterima Aku.
Aku deka ngemanahka agi rumah Aku ti mulia.
9 Pulau-pulau deka arapka Aku;
Kapal-kapal Tarsis deka belayar dulu,
Ngambika mai bala anak lelaki nuan ari endur ti jauh,
Pia mega mai pirak enggau emas sida,
Kena muji nama Jehovah, Petara nuan, Petara Israel ti kudus,
Laban Iya deka ngemuliaka nuan.
10 Orang asing deka ngaga dinding nuan,
Lalu bala raja sida deka gawa ke nuan.
Ketegal pengeringat Aku, Aku ngukum nuan.
Tang ketegal Aku lantang ati, Aku deka kasihka nuan.
11 Pintu penama nuan deka selalu tebuka,
Lalu enda ditutup maya siang hari tauka malam hari,
Ngambika reta mayuh bansa dibai ngagai nuan,
Lalu bala raja sida meh ke deka dulu mai reta nya.
12 Bansa enggau perintah ke enggai gawa ke nuan deka nadai agi,
Semua bansa nya deka dipunaska abis lengis.
13 Mulia Lebanon deka datai ngagai nuan,
Pun juniper, pun ash, enggau pun saipris
Deka ngemanahka endur Aku ti kudus;
Aku deka ngemuliaka endur alai Aku ngengkahka kaki.
14 Bala anak orang ke merinsaka nuan deka datai lalu besugang ngagai nuan;
Semua orang ke enda bebasaka nuan mesti besugang ba kaki nuan,
Lalu sida patut ngangauka nuan kuta Jehovah,
Iya nya Sion, kuta Petara Israel ti Kudus.
15 Taja pan Aku ninggalka nuan, taja pan orang begedika nuan lalu nadai orang bejalai nengah nuan,
Aku deka ngasuh nuan dipuji orang belama iya,
Lalu ngasuh nuan ngagaka ati semua generasi.*
16 Nuan deka ngirup ai tusu ari bala raja enggau mayuh bansa,
Baka anak ke nusu ba indai iya;
Nya baru nuan deka nemu Aku meh Penyelamat nuan, Jehovah,
Lalu Aku meh Penebus nuan, iya nya Petara Jakop ti Bekuasa.
17 Aku deka mai emas kena nganti temaga,
Lalu Aku deka mai pirak kena nganti besi.
Temaga kena nganti kayu,
Besi kena nganti batu;
Aku deka ngelantik pengelantang nyadi penyaga nuan,
Lalu pengelurus nyadi mandur nuan.
18 Utai ti ganas nadai agi didinga ba menua nuan;
Utai ti dianchurka enggau utai ti dipunaska nadai agi nyadi ba dalam sempadan nuan.
Nuan deka meri dinding nuan nama Pengelepas lalu meri pintu penama nuan nama Puji.
19 Mata panas enda agi manchar ngagai nuan maya siang hari,
Lalu penampak bulan enda agi manchar ngagai nuan,
Laban Jehovah deka nyadi penampak nuan belama iya;
Petara nuan deka manchar ngagai nuan lalu ngasuh nuan lawa.
20 Mata panas nuan enda agi padam,
Lalu bulan nuan enda bebali petang,
Laban Jehovah deka nyadi penampak nuan belama iya,
Lalu timpuh nuan tusah ati deka abis.
21 Semua rayat nuan deka nyadi lurus;
Sida deka ngempu menua tu belama iya.
Sida meh sumbuk ke ditanam Aku,
Asil jari Aku ngambika Aku dimuliaka.
22 Sida ke mimit deka nyadi seribu,
Lalu sida ke mit deka nyadi bansa ti kering.
Aku, Jehovah, deka ngenyampatka utai tu ba maya ti ngena.”