Pengajar

9 Nya alai, pengudah beratika semua nya, aku ulih madahka, orang ke lurus sereta bepenemu-dalam enggau semua utai ke dikereja sida bisi ba jari Petara ti bendar. Mensia enda nemu pasal pengerindu enggau pemenchi ke bisi kelia menya. 2 Pengujung semua orang sama magang, enda ngira sida manah tauka jai, tuchi tauka enda tuchi, nyerahka pemeri tauka enda nyerahka pemeri. Orang ke manah sama enggau orang ke bedosa, orang ke besumpah sama enggau orang ke takut besumpah. 3 Utai ti enda manah tu mega nyadi ba dunya tu: Ketegal pengujung semua mensia sama magang, sida seruran berundingka utai ti jai sereta ngereja utai ti beli, lalu udah nya sida mati!

4 Barang sapa ke agi idup bisi harapan, laban ukui ke idup manah agi ari singa ke mati. 5 Orang ke idup nemu diri* deka mati, tang orang ke mati nadai nemu utai. Sida mega nadai agi bulih upah, laban semua pengingat pasal sida nadai dikingatka agi. 6 Pengerindu, pemenchi, enggau ati sida ti chemburu mega lenyau. Sida nadai agi enggau orang ngereja sebarang utai ba dunya tu.

7 Mupuk meh, makai meh enggau lantang ati, lalu irup meh wain enggau ati ti gaga, laban Petara ti bendar rindu enggau pengawa ke dikereja nuan. 8 Awakka gari nuan seruran burak,* lalu awakka nuan selalu ngunsutka minyak ba pala nuan. 9 Petara udah meri nuan pengidup ba dunya tu. Nya alai, idup lantang meh enggau bini ke dikesayauka nuan sepemanjai pengidup nuan ti nadai reti nya. Awakka nuan seruran ngelantangka diri ba pengidup nuan ke nadai guna, laban nya meh upah ke pengidup nuan sereta ke pemendar nuan gawa ba dunya tu. 10 Kereja enggau bebendar sebarang pengawa ke ulih dikereja nuan, laban ba Kubur,* iya nya endur nuan deka mupuk, nadai pengawa, nadai pelan, nadai penemu, tauka nadai penemu-dalam.

11 Aku bisi meda utai bukai nyadi ba dunya tu, iya nya orang ke laju belanda enda selalu menang belumba, orang ke kering enda selalu menang beperang, orang ke bepenemu-dalam enda selalu bulih pemakai, orang ke pintar enda selalu nyadi kaya, lalu orang ke bepenemu enda selalu mujur, laban utai ke enda disadang ulih ninggang sapa-sapa ba maya ti enda dijangka. 12 Mensia nadai nemu maya diri deka ditinggang penusah. Baka ikan ke dijala, baka burung ke kena panjuk, baka nya meh mensia lebuh penusah ngenyit ninggang sida.

13 Aku mega beratika tu pasal penemu-dalam ba dunya tu, lalu aku alit ati: 14 Bisi siti kuta mit ke nadai mayuh orang. Siku raja ti kering nyerang kuta nya, ngelulung iya, lalu nirika dinding ti besai ngelingi kuta nya. 15 Ba kuta nya bisi siku lelaki miskin, tang bepenemu-dalam. Iya udah nyelamatka kuta nya ngena penemu-dalam iya. Taja pia, nadai siku pan orang ingatka iya. 16 Nya alai, aku madah ngagai diri empu: “Penemu-dalam manah agi ari pengering. Tang penemu-dalam lelaki ke miskin nya enda dipedulika, lalu jaku iya enda dikeibuhka.”

17 Manah agi mendingka jaku orang ke bepenemu-dalam ke disebut enggau tenang, ari ke ningaka nyawa raja ti inggar ke nguasa orang beli.

18 Penemu-dalam manah agi ari senyata perang, tang siku orang ke bedosa ulih ngerusak mayuh utai ti manah.