Satu Tesalonika

1 Surat tu ari Paul, Silvanus,* enggau Timoti. Surat tu ditujuka ngagai raban gempuru* ba Tesalonika, ke beserakup enggau Petara ti Apai kitai, sereta enggau Tuan Jesus Kristus:

Ngarapka kita bulih pengelantang enggau pemanah ati ti besai.

2 Kami seruran beterima kasih ngagai Petara lebuh kami nyebut semua kita ba dalam sampi kami. 3 Ba mua Petara ti Apai kitai, kami seruran ingatka pengawa ke digaga kita ketegal kita arapka Petara sereta ketegal pengerindu kita. Pia mega, kita betan ketegal kita ngarapka Tuan kitai, Jesus Kristus. 4 Bala menyadi ti dikerinduka Petara, kami nemu Petara udah milih kita, 5 laban Berita Manah ke ditusui kami ngagai kita nya, ukai aja ditusui ngena leka jaku, tang mega ngena pesan ti bekuasa, kuasa kudus,* sereta enggau ati ti balat andal. Kita empu nemu utai ke udah digaga kami ke penguntung kita lebuh kami begulai enggau kita. 6 Kita udah nitihka teladan kami enggau teladan Tuan kitai, laban kita nerima jaku Petara enggau pengaga ati ti datai ari kuasa kudus, taja pan kita napi mayuh pemerinsa. 7 Nya alai, kita mega nyadi teladan ke semua orang ke arap ba Masedonia enggau Akaya.

8 Kebendar iya, nengah kita, jaku Jehovah* ukai aja udah didinga orang ba Masedonia enggau Akaya, tang orang ba serata endur mega udah ninga pasal pengarap ke diayanka kita ngagai Petara. Nya alai, kami enda ibuh nyebut nama-nama utai agi. 9 Sida majak madahka pasal baka ni kitai keterubah iya betemu sereta pasal baka ni kita ngelengkaka engkeramba kita, lalu nyadi ulun Petara ti bendar sereta idup. 10 Sida mega madahka pasal kita ke nganti penatai Anak Petara ari serega, ke udah diidupka Petara ari mati, iya nya Jesus, ke nyelamatka kitai ari pengeringat Petara ti deka datai.