2 Samuel
23 Tu meh jaku David ti kepenudi:
“Tu meh jaku David anak Jesi,
Jaku lelaki ke udah diberi Petara mulia,
Lelaki ke ditata Petara Jakop,
Sereta penyanyi ke bisi nyawa ti manah nyadaka lagu Israel.*
2 Kuasa kudus* Jehovah bejaku nengah aku;
Jaku Iya bisi ba dilah aku.
3 Petara Israel bejaku;
Gunung Batu Israel bejaku ngagai aku:
‘Lebuh sesiku orang adil merintah,
Sereta nangika Petara,
4 Nya baka panchar mata panas maya pagi hari,
Baka pagi ke nadai remang,
Baka panchar mata panas pengudah ujan,
Ke ngasuh rumput tumbuh ari tanah.’
5 Endaka baka nya ruang bilik aku ba depan Petara?
Iya udah ngaga sempekat ti meruan enggau aku,
Ti diatur enggau silik sereta enda berubah.
Sempekat nya deka nyelamatka aku sereta meri aku pengaga ati.
Iya deka ngasuh ruang bilik aku mujur.
6 Tang orang ke nadai guna dibuai baka pun kayu ti mit ke beduri,
Laban sida enda ulih diambi ngena jari.
7 Lebuh orang deka negu sida,
Orang nya patut ngena senyata besi enggau sangkuh,
Lalu sida patut ditunu abis ba endur sida empu.”
8 Tu nama bala pahlawan David ti pemadu kering: Josep-basebet, iya nya orang Takhemoni. Iya siku ari tiga iku pahlawan David ti pemadu kering, lalu iya ketuai sida. Bisi sekali, iya munuh 800 iku orang ngena sangkuh iya. 9 Siku da agi pahlawan ti pemadu kering benama Eleasar anak Dodo ari peturun Ahohi. Iya bisi enggau David lebuh sida mencabar* orang Pilistin. Maya nya, orang Pilistin begempuru deka beperang. Lebuh soldadu Israel nyurutka diri, 10 iya enda mindah ari endur iya. Iya majak ngelaban orang Pilistin, nyentukka lengan iya lelak sereta jari iya tengkering ketegal lama megai pedang. Ba hari nya, Jehovah ngasuh orang Israel menang besai.* Soldadu Israel lalu nitihka Eleasar ngambi barang ari bangkai munsuh.
11 Siku da agi pahlawan ti pemadu kering benama Samah anak Age, iya nya orang Harari. Bisi sekali, orang Pilistin begempuru ba Lehi, lalu ba dia bisi ladang ke penuh enggau kachang.* Soldadu Israel rari ari orang Pilistin, 12 tang Samah bediri ba tengah ladang laban deka ngetanka ladang nya. Iya majak belaban enggau orang Pilistin. Nya alai, Jehovah ngasuh orang Israel menang besai.*
13 Maya musin ngetau, bisi 3 iku ari 30 iku bala tuai mansang ngagai David ba gua ba Adulam. Maya nya, orang Pilistin nirika kem ba Lebak Repaim, 14 lalu sida bejaga ba Betlehem. David benung belalai ba siti endur. 15 Udah nya, David madahka asai ati diri: “Naka meh pemanah enti aku ulih ngirup ai ari telaga ke semak pintu penama Betlehem!” 16 Pengudah ninga nya, tiga iku pahlawan David ti pemadu kering pan ngenyit tama lalu nyerang kem orang Pilistin. Sida ngauk ai ari telaga ke semak pintu penama Betlehem, lalu mai ai nya ngagai David. Tang David enggai ngirup ai nya, lalu iya nuangka ai nya ke tanah ke Jehovah. 17 Ku David madahka: “O Jehovah, enda patut aku ka ngirup ai tu! Sida udah berambunka nyawa sida kena ngulihka ai tu. Enti aku ngirup ai tu, tu baka ke ngirup darah sida.” Nya meh kebuah David enggai ngirup ai nya. Nya meh utai ke udah dikereja tiga iku pahlawan David ti pemadu kering.
18 Bisi siti da agi raban ke bisi tiga iku pahlawan David ti kering. Siku ari sida nya Abisai anak Seruyah, iya nya abang Joap. Iya ketuai dalam raban nya. Iya kala munuh 300 iku orang ngena sangkuh iya, lalu iya tebilang baka tiga iku pahlawan ti pemadu kering nya. 19 Taja pan iya ke pemadu landik dalam raban iya sereta nyadi ketuai dalam raban nya, tang iya enda bulih penuduk ti sama baka tiga iku pahlawan ti pemadu kering nya.
20 Bisi siku lelaki ti berani ke benama Benayah anak Jehoyada. Iya berani ngereja mayuh utai ba Kabsel. Iya munuh dua iku anak lelaki Ariel ari Moap. Bisi sekali, maya bisi seleju, iya nurun ngagai lubang ai lalu munuh siku singa. 21 Iya mega munuh siku lelaki Ejip ke besai tubuh ari tubuh orang biasa. Taja pan orang Ejip nya bisi megai sangkuh, Benayah nyerang orang Ejip nya ngena batang kayu, ngerampas sangkuh iya lalu munuh iya ngena sangkuh nya. 22 Nya meh utai ke digaga Benayah anak Jehoyada, lalu iya tebilang baka tiga iku pahlawan ti pemadu kering nya. 23 Taja pan iya landik agi ari 30 iku pahlawan ke bukai, tang iya enda bulih penuduk ti sama baka 3 iku pahlawan ti pemadu kering nya. Taja pia, David ngelantik Benayah nyadi jejaga iya.
24 Tu meh nama 30 iku pahlawan: Asahel, iya nya adik Joap; Elhanan anak Dodo ari Betlehem; 25 Samah, orang Harot; Elika, orang Harot; 26 Heles, orang Palti; Ira anak Ikes, orang Tekoa; 27 Abi-eser, orang Anatot; Mebunai, orang Husah; 28 Zalmon, orang Ahohi; Maharai, orang Netopah; 29 Helep anak Banah, orang Netopah; Itai anak Ribai ari Gibeah, ke ba kawasan orang Benjamin; 30 Benayah, orang Piraton; Hidai ari wadi* Gaas; 31 Abi-albon, orang Arabah; Asmabet, orang Bar-humi; 32 Eliaba, orang Saalboni; bala anak lelaki Jasen; Jonatan; 33 Samah, orang Harari; Ahiam anak Sarar, orang Harari; 34 Elipelet anak Ahasbai, orang Maakah; Eliam anak Ahitopel, orang Giloh; 35 Hesro, orang Karmel; Paarai, orang Arbi; 36 Igal anak Natan ari Sobah; Bani, orang Gat; 37 Selek, orang Amon; Naharai, orang Berot, orang ke mai senyata Joap anak Seruyah; 38 Ira, orang Itri; Garep, orang Itri; 39 enggau Uriah, orang Het. Kesemua iya, bisi 37 iku.