Dua Korint
7 Bala menyadi ke dikerinduka aku, ketegal semaya tu udah diberi ngagai kitai, aram meh kitai nuchi diri ari semua pekara ke ngamahka tubuh enggau runding.* Awakka kitai nangika Petara, ngambika kitai nyadi kudus enggau pengabis iya.
2 Buka meh ati kita ke kami. Kami nadai ngereja utai ti salah ngagai sapa-sapa, nadai nesatka sapa-sapa, sereta mega nadai ngambi ulih ba sapa-sapa. 3 Aku nyebut munyi nya ukai deka nyalahka kita. Baka ke udah dipadah aku sebedau tu, kita seruran ba ati kami. Kami sanggup idup sereta mati enggau kita. 4 Aku ulih bejaku terus terang* ngagai kita, lalu aku amat temegahka kita. Ati aku berasai lantang, lalu pengaga ati aku majak nambah-menambah taja pan kami napi mayuh pemerinsa.
5 Kebendar iya, lebuh datai ba Masedonia, kami nadai bulih pengelantang, lalu kami majak napi mayuh macham pemerinsa. Kami balat disakal orang ari luar raban gempuru, lalu bala kami ba raban gempuru balat irau. 6 Taja pia, Petara ke ngelantangka ati orang ke lemi semengat udah ngelantangka ati kami nengah penatai Titus. 7 Ati kami ukai aja lantang ketegal penatai Titus, tang mega ketegal pengelantang ke diulih iya ari semua kita. Iya madahka kami, kita keran amat deka betemu enggau aku, kita amat tusah ati, lalu kita amat ibuhka aku. Nya meh utai ke ngasuh aku lebih agi gaga ati.
8 Taja pan aku ngasuh kita tusah ati ketegal surat aku, tang aku enda nesalka nya. Keterubah, aku nesalka nya laban aku nemu surat nya udah ngasuh ati kita tusah enda lama. 9 Tang diatu, aku gaga ati. Nya ukai ketegal kita udah tusah ati, tang ketegal penusah ati kita nya meransang kita nesal ati. Penusah ati kita sejalai enggau peneka Petara. Nya alai, kita nadai rugi nama-nama ketegal kami. 10 Penusah ati ke sejalai enggau peneka Petara seruran mai penguntung. Laban nya ngasuh orang nesal ati sereta mai pengelepas. Tang penusah ati ke baka orang ba dunya, ngujungka pemati. 11 Penusah ati kita ke sejalai enggau peneka Petara udah ngasuh kita balat ransing. Kita udah nunjukka diri nadai penyalah, pedis ati ke utai ti salah, nangika Petara, sereta bisi pengeran enggau pengeransing ngemetulka utai ti salah! Ba semua pekara nya, kita ngayanka diri tuchi.* 12 Aku nulis surat ngagai kita ukai ketegal orang ke ngereja penyalah tauka orang ke merinsa ketegal penyalah nya. Aku nulis surat nya ngagai kita, ngambika kita ulih nunjukka diri ngagai Petara, kita amat-amat deka mendingka jaku kami. 13 Nya meh kebuah ati kami lantang.
Kelimpah ari nya, kami mega lebih agi gaga ati, laban Titus gaga ati ketegal semua kita udah meransang iya. 14 Aku kala temegahka kita ba iya, lalu aku enda malu pasal nya. Baka semua utai ke disebut kami ngagai kita endang amat, utai ke dikemegahka kami pasal kita ba iya mega amat. 15 Pengerindu iya ngagai kita nyau majak nambah, laban iya ingat baka ni semua kita udah ngayanka diri ngasi sereta nyambut penatai iya enggau penuh basa. 16 Aku gaga ati laban aku ulih pechayaka kita* dalam semua pekara.