Jesus Ngayanka Pengeransing ke Rumah Petara

Pengudah pengerami tikah ba Kana, Jesus mupuk ngagai Kapernaum. Indai Jesus enggau bala menyadi tiri iya, iya nya James, Josep, Simon, enggau Judas mupuk enggau iya.

Tang nama kebuah Jesus mupuk ngagai Kapernaum? Kapernaum besai agi ari Nasaret tauka Kana, lalu nya meh endur alai orang suah betemu. Pia mega, mayuh ari murid Jesus ti baru diau semak tauka ba Kapernaum. Nya alai Jesus ulih ngelatih sida ba dia.

Lebuh Jesus ba Kapernaum, iya ngaga mayuh kereja ajih. Nyadi mayuh orang ke diau ba dia sereta ke ngelingi endur nya, bisi ninga pasal pengawa ke digaga Jesus. Tang Jesus semina diau dia pengelama beberapa hari aja. Ketegal Jesus enggau bala murid iya orang Judah, nya alai sida patut mupuk ngagai Jerusalem kena ngintu pengerami Paska ba taun 30 M.

Ba Rumah Sembiang di Jerusalem, bala murid Jesus meda iya ngereja pengawa ti enda kala digaga iya sebedau tu. Nya alai sida berasai amat kagum.

Nitihka Adat Petara, orang Israel patut meri pemeri jelu ba Rumah Sembiang, lalu sida ke datai ari endur ti jauh begunaka pemakai lebuh sida diau ba Jerusalem. Nitihka Adat Petara, sida ke datai ari endur ti jauh dikemendarka meli “sapi, bedus, kambin,” sereta utai bukai ti diguna lebuh sida diau ba Jerusalem. (Ulang Adat 14:24-26) Ketegal nya, orang ke bedagang ba Jerusalem nyual jelu tauka burung ba laman Rumah Sembiang. Lalu sekeda ari sida nipu enggau nikika rega jelu ke dijual sida.

Jesus balat ringat. Iya mubuhka duit seling bala penukar duit, nungkupka mija sida, lalu muru sida. Udah nya Jesus madah: “Bai pansut semua utai tu. Badu agi ngaga rumah Apai aku nyadi endur bejualka utai!”—John 2:16.

Lebuh bala murid Jesus meda semua tu, sida teingatka jaku benabi pasal Anak Petara ke madahka: “Pengeransing aku ke Rumah Nuan mau baka api.” Tang orang Judah nanya: “Nama kereja ajih ke deka dipandangka nuan ngagai kami, kena nunjukka nuan bisi hak ngereja semua utai tu?” Jesus lalu nyaut sida: “Rubuhka Rumah Sembiang tu, lalu dalam tiga hari, aku deka nirika iya baru.”—John 2:17-19; Masmur 69:9.

Orang Judah ngumbai Jesus bejaku pasal Rumah Sembiang ba Jerusalem, nya alai sida nanya: “Orang ngaga Rumah Sembiang tu pengelama 46 taun, lalu nuan deka nirika iya baru dalam tiga hari?” (John 2:20) Taja pia, Rumah Sembiang ke disebut Jesus nya tubuh iya empu. Tiga taun pengudah nya, bala murid Jesus teingatka jaku tu lebuh iya diangkatka idup baru.