Jesus Dibai ngagai Anas, lalu ngagai Kaiapas

Jesus ditanchang baka siku penjenayah, lalu iya dibai ngagai Anas. Suba lebuh Jesus beumur 12 taun, iya kala ngasuh bala pengajar Adat ba Rumah Sembiang alit ati enggau iya. Maya nya, Anas ke nyadi imam besai. (Luke 2:42, 47) Beberapa taun pengudah nya, beberapa iku anak lelaki Anas nyadi imam besai. Lalu lebuh Jesus dipechara, menantu iya, iya nya Kaiapas nyadi imam besai.

Lebuh Anas nasat Jesus, Kaiapas ngempuruka Raban Kunsil Orang Judah. Dalam raban nya, bisi 71 iku orang. Sida nya nyengkaum imam besai enggau sida ke kala nyadi imam besai.

Anas nanya Jesus “pasal bala murid iya sereta pasal utai ke diajar iya.” Udah nya, Jesus nyaut iya: “Aku suah bejaku ba mua orang mayuh. Aku enda kala belalai nyebut utai. Aku suah ngajar ba balai gempuru enggau ba Rumah Sembiang, iya nya endur semua orang Judah begempuru. Nama kebuah kita nanya aku? Tanya meh sida ke kala ninga jaku aku.”—John 18:19-21.

Udah nya, siku jejaga ke bediri ba dia nampar mua Jesus lalu madahka: “Baka nya chara nuan nyaut tuai imam pia?” Tang Jesus nemu iya enda besalah. Nyadi iya madah: “Enti aku nyebut utai ti salah, padah ngagai aku utai salah ke disebut aku nya. Tang enti utai ke disebut aku nya betul, nama kebuah nuan nampar aku deh?” (John 18:22, 23) Anas lalu ngasuh orang mai Jesus ngagai menantu iya Kaiapas.

Maya nya, imam besai, bala tuai bansa orang Judah enggau bala penulis Adat ke sebagi ari Raban Kunsil Orang Judah pan begelumu ba rumah Kaiapas. Taja pia, hari nya orang nyambut Pengerami Paska. Lalu nitihka Adat, sida enda ulih ngatur pechara ba malam hari Pengerami Paska. Tang sida enda ibuhka Adat nya laban sida keran deka munuh Jesus.

Sida ba Raban Kunsil Orang Judah ngatur pechara Jesus enggau chara ti enda adil. Pengudah Jesus ngangkatka Lasarus ari mati, Raban Kunsil Orang Judah madahka Jesus mesti diukum bunuh. (John 11:47-53) Lalu beberapa hari sebedau nya, bala tuai pengarap ngaga pelan deka nangkap Jesus sereta munuh iya. (Matthew 26:3, 4) Nya alai, indah sebedau Jesus dipechara pan, sida udah ngumbai Jesus endang patut diukum bunuh!

Sida ukai semina ngereja penyalah lebuh ngatur pechara maya Pengerami Paska. Tang bala tuai imam sereta sida ke bukai ari Raban Kunsil Orang Judah bebendar ngiga bala saksi ti pelesu, ngambika sida ulih nuduh Jesus. Taja pan sida tetemuka mayuh saksi, tang penerang ke disebut sida enda sejalai enggau pangan diri. Pengujung iya, bisi dua iku orang madahka: “Kami bisi ninga iya nyebut, ‘Aku deka ngerubuh Rumah Sembiang ke digaga ngena jari mensia, lalu dalam tiga hari aku deka nirika siti da agi Rumah Sembiang ke enda digaga ngena jari mensia.’” (Mark 14:58) Taja pia, utai ke disebut seduai iya mega enda sejalai enggau pangan diri.

Kaiapas lalu nanya Jesus: “Nama kebuah nuan enda nyaut? Kati nuan enda ninga jaku tuduh sida ngagai nuan?” (Mark 14:60) Tang Jesus mengkang enda bemunyi, taja pan bala saksi ti pelesu udah madahka penerang ti enda sejalai enggau pangan diri. Ketegal nya, Imam Besai Kaiapas nukar randau nya ngambika iya ulih ngiga chara bukai nuduh Jesus.

Kaiapas nemu orang Judah enda rindu ninga orang ngumbai diri Anak Petara. Sebedau tu, Jesus kala madahka Petara nya Apai iya. Lebuh maya nya, orang Judah deka munuh iya, laban sida madahka Jesus benung “ngumbai diri sebaka enggau Petara.” (John 5:17, 18; 10:31-39) Ketegal Kaiapas nemu utai nya, iya madah ngagai Jesus: “Aku ngasuh nuan besumpah dalam nama Petara ti idup, padahka ngagai kami enti nuan nya Kristus, Anak Petara!” (Matthew 26:63) Nya alai, Jesus madahka diri Anak Petara. (John 3:18; 5:25; 11:4) Enti Jesus enda ngereja nya, maya iya mati orang deka ngumbai iya enggai ngaku diri Anak Petara sereta Kristus. Nyadi Jesus madah: “Aku meh nya, lalu kita deka meda Anak Mensia duduk ba sepiak kanan Iya ti Bekuasa, lalu datai ba atas remang.”—Mark 14:62.

Pengudah ninga saut Jesus, Kaiapas nyarikka gari luar iya lalu madahka: “Iya udah bejaku ngelaban Petara. Enti pia, nama kebuah kitai begunaka saksi bukai? Kita empu udah ninga iya bejaku ngelaban Petara. Nama runding kita?” Semua ba Raban Kunsil Orang Judah setuju lalu madah: “Iya patut mati.”—Matthew 26:65, 66.

Udah nya, sida ngeleseka Jesus lalu malu iya. Sekeda orang nampar sereta ngeludah iya. Sida mega mampul mua iya lalu madah: “Enti nuan amat nabi, padahka ngagai kami sapa ke malu nuan?” (Luke 22:64) Nya alai, sida ba Raban Kunsil Orang Judah bejaika Anak Petara, lebuh sida ngatur pechara ti enda adil ba malam Pengerami Paska taja pan sida enda patut ngereja nya!