“Pengidup enggau Pengangkat ari Mati”

Jesus udah datai ba Betani, iya nya siti genturung pendiau kira-kira tiga kilometer ari Jerusalem. Maria enggau Marta, menyadi indu Lasarus, balat tusah ati laban Lasarus baru udah mati. Mayuh orang datai ngelantangka ati seduai iya.

Bisi siku orang madah ngagai Marta, Jesus deka datai. Nya alai, Marta beguai pansut betemu enggau Jesus. Marta madah ngagai Jesus pasal utai ke diperundingka iya enggau Maria pengelama empat hari. Ku Marta: “Tuan, enti nuan bisi ba ditu, menyadi aku tentu enda mati.” Tang iya madah munyi nya ukai ketegal iya ngumbai nadai agi harapan. Marta madahka: “Aku agi arap Petara deka meri nama-nama utai ke dipinta nuan.” (John 11:21, 22) Iya pechaya Jesus agi ulih nulung Lasarus.

Jesus nyebut: “Menyadi nuan deka idup baru.” Marta ngumbai Jesus benung madahka pasal pengangkat ari mati ke deka nyadi jemah ila, baka ke deka nyadi ngagai Abraham enggau orang bukai. Iya nunjukka iya yakin utai tu amat deka nyadi laban iya madah: “Aku nemu iya deka idup baru ba hari ti penudi.”—John 11:23, 24.

Ulih Jesus ngangkatka Lasarus idup baru maya nya? Iya madah ngagai Marta, Petara udah meri iya kuasa atas pemati. Ku Jesus: “Barang sapa ke arapka aku deka idup baru taja pan iya udah mati. Genap iku orang ke idup lalu arapka aku enda sekali-kali deka mati.”—John 11:25, 26.

Jesus enda madahka bala murid iya enda ulih mati, laban iya mega patut mati baka ke dipadahka iya ngagai bala rasul. (Matthew 16:21; 17:22, 23) Jesus madah orang ke arapka iya deka bulih pengidup ti meruan belama iya. Mayuh nembiak Petara deka nerima pengidup ti meruan belama iya pengudah sida diangkatka idup baru. Tang sida ke setia ke idup ba pengujung sistem dunya tu engka enda ibuh mati. Enda ngira sekalika sida diangkatka idup baru tauka selamat ari pengujung sistem dunya tu, orang ke arapka Jesus deka nerima pengidup ti meruan belama iya.

Sebedau tu Jesus madah: “Aku meh pengidup enggau pengangkat ari mati.” Diatu kati Jesus ulih nulung Lasarus ke udah mati empat hari? Jesus nanya Marta: “Kati nuan arapka tu?” Iya nyaut: “Au Tuan, aku arapka nuan nya Kristus, Anak Petara. Nuan meh ke disemaya datai ke dunya.” Marta pechaya Jesus ulih nulung sida ba maya nya. Pengudah nya, Marta pulai ke rumah lalu madah ngagai Maria: “Pengajar udah datai lalu iya ngiga nuan.” (John 11:25-28) Maria terus mupuk betemu enggau Jesus. Mayuh orang nitihka iya laban sida ngumbai iya deka ngagai kubur Lasarus.

Tang, Maria betemu enggau Jesus, lalu besugang ba kaki iya lalu nyabak. Iya madahka baru utai ke dipadahka Marta: “Tuan, enti nuan bisi ba ditu, tentu menyadi aku enda mati.” Lebuh Jesus meda Maria enggau orang bukai nyabak, Jesus berasai balat sinu sereta tusah ati. Jesus pan lalu nyabak. Nya amat negu ati orang ke ba dia. Tang sekeda orang nanya: ‘Enti iya ulih ngeraika mata orang ke buta, nama kebuah iya enda ulih nagang orang tu ari mati?’—John 11:32, 37.