Jakop enggau Esau Bebaik enggau Pangan Diri

Jehovah besemaya deka ngelindung Jakop baka Iya ke udah ngelindung Abraham enggau Isak. Jakop diau ba endur ke dikumbai Haran. Dia iya bebini, lalu ngembuan ruang bilik ti besai sereta nyadi kaya.

Bisi sekali, Jehovah madah ngagai Jakop: “Pulai nuan ngagai menua apai enggau aki nuan.” Nya alai, Jakop sebilik berengkah bejalai jauh. Lebuh ba rantau jalai, sekeda orang gaji iya mansang ngagai Jakop lalu madah: ‘Menyadi nuan Esau, benung mansang kitu deka betemu enggau nuan, lalu bisi 400 iku orang enggau iya.’ Jakop takut Esau deka ngemediska sida sebilik. Iya besampi ngagai Jehovah: ‘Tulung selamatka aku ari menyadi aku.’ Ba hari siti, Jakop nganjung mayuh pemeri baka bedus, kambin, sapi, unta enggau keledai ngagai Esau.

Lebuh iya kediri malam nya, Jakop meda siku melikat! Melikat nya berengkah bibat enggau iya. Seduai iya bibat nyentukka pagi. Taja pan Jakop bisi bakal, iya enggai alah. Ku melikat nya: “Lepaska aku.” Tang Jakop nyaut: ‘Enggai, berekatka aku dulu.’

Pengujung iya, melikat nya merekat Jakop. Diatu Jakop nemu Jehovah enda nejuka Esau ngemediska iya.

Pagi nya Jakop meda Esau enggau 400 iku lelaki ari jauh. Jakop mansang ke mua lalu meremi ngagai menyadi iya tujuh kali. Esau belanda ngagai Jakop lalu merap iya. Dua iku menyadi nya sama nyabak lalu bebaik enggau pangan diri. Baka ni asai ati Jehovah meda chara Jakop mutarka penanggul nya?

Udah nya, Esau pulai ke menua iya, lalu Jakop neruska pejalai iya. Jakop bisi 12 iku anak lelaki. Nama sida Reuben, Simion, Lewi, Judah, Dan, Naptali, Gat, Aser, Isakar, Sebulun, Josep, enggau Benjamin. Siku ari anak lelaki nya—Josep—dikena Jehovah nyelamatka nembiak Iya. Nemu nuan baka ni? Aram kitai ngiga saut iya.