Jehovah Meri Pengering ngagai Samson

Mayuh orang Israel berengkah nyembah patung baru, nya alai Jehovah nejuka orang Pilistin merintah menua sida. Tang agi bisi sekeda orang Israel ke rinduka Jehovah. Siku ari sida nya, lelaki ke benama Manoah. Iya enggau bini iya nadai anak. Bisi sekali, Jehovah nganjung siku melikat ngagai bini Manoah. Melikat nya bejaku: ‘Nuan deka bisi siku anak lelaki. Iya meh ke deka nyelamatka orang Israel ari orang Pilistin. Iya deka nyadi orang Nasir.’ Nemu nuan sapa orang Nasir? Sida ngereja pengawa ti spesial ke Jehovah. Orang Nasir enda tau nguntin buk sida.

Nyau kelama, anak lelaki Manoah ada, lalu iya meri nama anak iya Samson. Lebuh Samson mansang besai, Jehovah meri iya pengering. Iya ulih munuh siku singa ngena jari iya aja. Bisi sekali, Samson munuh 30 iku orang Pilistin kediri. Orang Pilistin begedika iya lalu ngiga jalai deka munuh iya. Ba siti malam lebuh Samson tinduk ba nengeri Gaza, sida mupuk ngagai pintu kuta lalu nganti iya dia ngambika sida ulih munuh iya pagi nya. Tang ba tengah malam, Samson dani lalu ngagai pintu penama kuta, nyabut pintu nya ari dinding kuta. Iya lalu ngesan pintu kuta nya nyentukka ngagai atas gunung semak Hebron!

Udah nya, orang Pilistin betemu enggau pangan Samson, Delilah, lalu madah: ‘Tiap iku kami deka mayar nuan seribu seratus singkap duit pirak enti nuan nemu nama kebuah Samson amat kuat. Kami deka nangkap iya lalu nyimpan iya dalam jil.’ Delilah dekaka duit nya, nya alai iya setuju. Keterubah, Samson enggai madah kebuah iya ulih nyadi kuat. Tang Delilah majak nanya iya nyentukka iya madahka utai ti bendar ngagai Delilah. ‘Buk aku nadai kala diputung laban aku orang Nasir,’ ku iya madahka Delilah. ‘Enti buk aku diputung, pengering aku deka lenyau.’ Samson udah ngaga penyalah ti besai laban madahka ngagai Delilah, enda pia?

Tekala nya, Delilah madahka ngagai orang Pilistin: ‘Aku udah nemu resia iya!’ Delilah nindukka Samson ba pah iya. Udah nya iya mesan siku orang nguntin buk Samson. Delilah lalu manjung: ‘Samson! Orang Pilistin datai!’ Samson dani tang pengering iya udah lenyau. Orang Pilistin nangkap iya, ngasuh iya buta, lalu nyimpan iya ba rumah jil.

Bisi sekali, beribu iku orang Pilistin begempuru ba rumah sembiang petara sida Dagon, lalu manjung: ‘Petara kitai udah nyerahka Samson ngagai kitai! Bai Samson pansut! Awakka iya merindang kitai!’ Sida ngasuh Samson bediri entara tiang ti besai lalu ngeleseka iya. Samson besampi: ‘O Jehovah, keringka meh aku sekali agi.’ Maya nya, buk Samson tumbuh panjai baru. Iya ngeju dua iti tiang rumah sembiang nya enggau pengabis pengering iya. Bengunan nya runtuh lalu munuh semua orang ba rumah sembiang nya. Samson mega mati.