Baka Ni Petara Dekaka Kitai Nyembah Iya?

Ba pelajar sebedau tu, kitai udah belajar, ukai semua pengarap diterima Petara. Tang, kitai ulih nyembah Petara enggau chara ti dikerinduka Iya. (James 1:27) Baka ni kitai ulih nentuka pengawa sembah kitai diterima Petara? Aram kitai meda utai ti dipadah Bup Kudus.

1. Sembah kitai patut bepelasarka nama?

Jesus kala madah ngagai Petara Jehovah: “Jaku Nuan nya pemendar.” (John 17:17) Nya alai, sembah kitai patut bepelasarka Jaku Petara, iya nya Bup Kudus. Tang, mayuh pengarap enda bedulika ajar ari Bup Kudus. Sida ngajar nitihka adat tauka runding mensia. Tang, Petara enda gaga ati lebuh mensia ‘nulak pesan Petara.’ (Bacha Mark 7:9.) Lebuh kitai nitihka ajar ari Bup Kudus, tu deka ngagaka ati Petara Jehovah.

2. Baka ni kitai patut nyembah Jehovah?

Jehovah nya Penempa kitai. Nya alai, kitai patut nyembah Iya seiku aja. (Pemandang 4:11) Kitai enda begunaka engkeramba, gambar tauka tanda kena nyembah Petara.—Bacha Isaiah 42:8.

Kitai mega patut idup nitihka chara ke ditetapka Petara. Ambika chunto, orang ke rinduka Jehovah deka nitihka jaku lalau Iya pasal pengawa tikah. Kitai mega patut nyeliahka diri ari tebiat ke enda dikerinduka Petara, baka nginsap, makai dadah tauka udu ngirup.a Enti kitai ngereja nya, sembah kitai deka dikumbai “kudus” sereta ‘dikerinduka Petara.’—Rome 12:1.

3. Nama kebuah Jehovah deka kitai begulai nyembah Iya?

Bup Kudus madahka, kitai ulih muji Jehovah lebuh begempuru. (Masmur 111:1, 2) Siti chara kitai muji Jehovah iya nya lebuh kitai belagu muji Iya. (Bacha Masmur 104:33.) Jehovah amat rinduka kitai, Iya ngaga pengawa begempuru ngambika kitai tau bulih mayuh penguntung. Kitai ulih meransang pangan diri sereta belajarka chara idup enggau lantang belama iya.

BELAJAR MAYUH AGI

4. Petara enggai kitai ngena engkeramba tauka tanda kena nyembah Iya

VIDEO: Kati Petara Ngasuh Kitai Ngena Engkeramba Maya Nyembah Iya? (3:26)

• Nama utai ke nyadi ngagai nembiak Petara kelia ti ngena engkeramba nyembah Iya?

Bisi orang ngasaika diri semak agi ngagai Petara enti sida nyembah Iya ngena engkeramba tauka tanda. Tang kati pengawa nya ulih ngenyauhka kitai Petara? Bacha Pemansut 20:4-6 enggau Masmur 106:35, 36, lalu kerandauka tanya tu:

• Nama sekeda engkeramba, utai tauka tanda ke suah dikena orang?

• Nama asai ati Jehovah pasal tu?

• Nama asai ati nuan pasal tu?

5. Jehovah ngelepaska kitai ari ajar ti pelesu

VIDEO: Dilepaska Ngena Pemendar (5:16)

Bacha Masmur 91:14, lalu kerandauka tanya tu:

• Nama semaya Jehovah ngagai kitai enti kitai rindu sereta nyembah Iya seiku aja?

6. Kitai nyembah Petara maya kitai begempuru

Kitai muji Jehovah sereta meransang pangan diri enggau meri komen sereta belagu ba gempuru. Bacha Masmur 22:22, lalu kerandauka tanya tu:

• Kati nuan rindu ninga komen orang bukai lebuh begempuru?

• Kati nuan deka besedia ngambika ulih meri komen?

7. Jehovah gaga ati lebuh kitai madah ngagai orang bukai pasal utai ti dipelajarka kitai

Bisi mayuh chara kitai ulih bekunsika pemendar Bup Kudus enggau orang bukai. Bacha Masmur 9:1 enggau 34:1, lalu kerandauka tanya tu:

• Nama utai ti udah dipelajarka nuan ari Bup Kudus ke deka dikunsi nuan enggau orang bukai?

LANSA

Kitai ulih ngasuh Jehovah gaga ati enti kitai nyembah Iya seiku aja, muji Iya ba gempuru sereta madahka utai ti udah dipelajarka kitai ngagai orang bukai.

Ulang Kaji

• Baka ni Petara madah ngagai kitai chara nyembah Iya?

• Nama kebuah kitai patut nyembah Jehovah seiku aja?

• Nama kebuah kitai patut begulai nyembah Jehovah enggau orang ke rinduka Iya?

ARAM BELAJAR

Ba cherita pengidup “Aku Ukai Agi Ulun Engkeramba,” bacha baka ni seiku indu mujur badu agi nyembah engkeramba.

“Bup Kudus Ngubah Pengidup” (Menara Jaga, 1 Julai 2011)

Peratika chara ke ulih nulung nuan meri komen lebuh begempuru.

“Muji Jehovah ba Eklisia” (Menara Jaga, Januari 2019)

Peratika baka ni seiku lelaki bulih penguntung ari gempuru taja pan iya enda senang deka datai ke gempuru.

Jehovah Ibuhka Aku (3:07)

Mayuh orang ngumbai regang nya ngambarka pengarap Kristian, tang kati regang patut dikena ba pengawa sembah kitai?

“Nama Kebuah Saksi-Saksi Jehovah Enda Ngena Regang dalam Sembah?” (Artikel ba laman web jw.org)