Nama Kebuah Jesus Merinsa Sereta Mati?

Nama saut nuan enti orang nanya nuan, “Kati nuan deka idup belama iya?” Mayuh orang engka madahka sida ka, tang sida ngasaika utai tu tusah deka dipechaya. Sida madahka, kitai enda ulih rari ari pemati iya nya pengujung pengidup mensia.

Tang, kati enti orang nanya nuan, “Kati nuan sedia deka mati?” Mayuh orang deka nyaut enggai. Nama kebuah? Taja pan napi penguji sereta penusah, kitai keran deka idup. Bup Kudus madahka Petara ngaga mensia ngambika bisi pengeran deka idup belama iya.

Tang ke bendar, mensia enda ulih idup belama iya. Nya alai, nama udah nyadi? Agi mega, kati Petara bisi ngereja sebarang utai dikena mutarka pekara tu? Saut ari Bup Kudus ngelantangka ati, lalu saut nya bekaul enggau kebuah Jesus merinsa sereta mati.

NAMA UDAH NYADI

Tiga iti bab keterubah ba Pemungkal dalam Bup Kudus madah ngagai kitai Petara udah meri mensia ti keterubah, Adam seduai Hawa peluang idup belama iya, lalu madah ngagai seduai iya pasal utai ti patut digaga ngambika tau bulih pengidup belama iya. Udah nya, cherita nya nerangka baka ni seduai iya enda ngasika Petara, lalu lenyau peluang nya. Cherita nya dipadah enggau ngelansa, nya alai sekeda orang ngumbai iya cherita lama. Tang bup Pemungkal, sama baka bup Injil, madahka cherita nya amat sereta sejalai enggau sejarah.a

Nama penyadi ketegal Adam enda ngasika Petara? Ku Bup Kudus nyaut: “Dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.” (Rome 5:12) Enggau enda ngasika Petara, Adam bedosa. Nya alai iya lenyau peluang idup belama iya, lalu mati. Ketegal nyadi peturun Adam, kitai bulih dosa ari Adam. Nya kebuah kitai ulih sakit, mansang tuai sereta mati. Penerang pasal kebuah kitai mati sejalai enggau utai ti ditemu kitai bekaul enggau pendiau anak ke murihka apai indai kemaya hari tu. Tang, kati Petara bisi ngereja sebarang utai dikena mutarka pekara tu?

NAMA UDAH DIGAGA PETARA

Amat, Petara ngaga atur dikena nebus tauka meli baru utai ti udah dilenyauka Adam ke peturun iya, iya nya peluang idup belama iya. Baka ni Petara ngereja nya?

Ayat Bup Kudus ba Rome 6:23 madahka: “Upah dosa nya pemati.” Reti nya dosa ngujungka pemati. Adam bedosa, nya alai iya mati. Nya alai kitai bedosa, lalu mati. Tang kitai ada bedosa ukai ketegal penyalah ke dikereja kitai. Nya alai, Petara ti bepengerindu ngirumka Anak Iya, Jesus, ngambika mayar “upah dosa” ke kitai. Baka ni Jesus ngereja nya?

Ketegal enda ngasi, Adam mensia ti sempurna mai dosa enggau pemati ngagai kitai, nya alai kitai begunaka seiku mensia ti sempurna sereta ngasi nyentuk ke mati ngambika ulih ngelepaska kitai ari dosa enggau pemati. Ku Bup Kudus nerangka: “Baka orang siku ke enda ngasi nya mai mayuh orang bedosa, baka nya mega mayuh orang deka digaga lurus laban orang siku ngasi.” (Rome 5:19) Jesus meh “orang siku” nya. Iya ninggalka serega, nyadi mensia ti sempurnab, lalu mati ngarika kitai. Ketegal tu, kitai ulih digaga lurus ba mua Petara, lalu bisi peluang idup belama iya.

KEBUAH JESUS MERINSA SERETA MATI

Taja pia, nama kebuah Jesus patut mati? Kati Petara ti Pemadu Bekuasa ulih terus meri peturun Adam pengidup belama iya? Ulih. Tang ngereja utai nya ngelanggar ukum ke madahka upah dosa nya pemati. Ukum nya ukai utai ti ulih diubah nitihka peneka ati. Iya nyadika pun atur ti lurus.—Masmur 37:28.

Enti Petara enda nitihka atur ti lurus ba pekara nya, orang deka berunding sekalika Iya deka ngereja utai ti sama ba pekara bukai. Ngambika chunto, kati Iya deka lurus lebuh nentuka ni bagi peturun Adam ke tau bulih pengidup belama iya? Kati Iya tau dikearap ngamatka semaya Iya? Enti Petara nitihka atur ti lurus nyelamatka mensia, kitai tau pechaya Iya seruran deka ngereja utai ti ngena.

Nengah genselan nyawa Jesus, Petara muka jalai ngagai pengidup belama iya ba Paradais di dunya. Peratika jaku Jesus ba John 3:16: ‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’ Nya alai, pemati Jesus nya ukai semina chara Petara mandangka atur Iya ti lurus, tang kelebih agi mandangka pengerindu Iya ti besai ngagai mensia.

Taja pia, nama kebuah Jesus patut merinsa sereta mati baka ke dipadah dalam bup Injil? Enggau napi penguji ti balat sereta mengkang tetap ati, Jesus nyakal sekali aja ke belama iya jaku Sitan ti madahka mensia enda ulih mengkang taluk ngagai Patara lebuh diuji. (Jop 2:4, 5) Jaku Sitan nya baka ke betul pengudah iya ulih mai Adam ti sempurna nyadi orang ke bedosa. Tang Jesus ke sama sempurna baka Adam mengkang ngasi taja pan balat merinsa. (1 Korint 15:45) Iya nunjukka Adam mega ulih ngasika Petara enti Adam milih deka ngereja nya. Enggau betan napi penguji, Jesus netapka teladan ke ulih dititih kitai. (1 Peter 2:21) Petara merekat Anak Iya, Jesus, ke ngasi enggau meri iya pengidup belama iya di serega.

CHARA NUAN TAU BULIH PENGUNTUNG

Pemati Jesus endang amat nyadi. Iya muka jalai ngagai pengidup belama iya. Kati nuan deka idup belama iya? Jesus madahka utai ke patut digaga kitai: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’—John 17:3.

Pengeluar majalah tu mai nuan belajar mayuh agi pasal Jehovah, Petara ti bendar, sereta pasal Anak Iya, Jesus Kristus. Saksi-Saksi Jehovah ba kandang endur nuan diau deka gaga ati nulung nuan. Nuan mega tau bulih penerang ti beguna enggau ngelawa laman web kami, www.jw.org.