Nyadi Kaban Rapat enggau Bala Menyadi Nya Manah ke Kitai!

1-2. Nama siti utai ti penting ba Jehovah, lalu nama utai ti dikedekaka Iya kereja kitai?

CHARA kitai ngintu orang bukai amat penting ba Jehovah. Jesus ngajar, kitai patut rinduka orang bukai baka kitai ke rinduka diri empu. (Mat. 22:​37-39) Tu mega nyengkaum sida ke enda nyembah Jehovah. Lebuh kitai ngayanka pengerindu, kitai neladan Petara Jehovah ke “ngasuh mata panas manchar ngagai orang ke jai enggau ngagai orang ke manah, lalu meri ujan ngagai orang ke lurus enggau orang ke enda lurus.”—Mat. 5:45.

² Taja pan Jehovah rinduka semua mensia, tang Iya kelebih agi rinduka sida ke ngasika Iya. (Jhn. 14:21) Iya dekaka kitai neladan Iya. Nyadi, Iya meransang kitai rinduka bala menyadi enggau pengabis ati. (1 Pet. 4:8; Rom. 12:10) Pengerindu ke baka tu sama enggau pengerindu ke diayanka kitai ngagai diri sebilik, kaban belayan, tauka kaban rapat kitai.

3. Nama utai ke patut dikingatka kitai pasal pengerindu?

³ Pengerindu nya baka utai tumbuh, ke patut dijaga ngambika ulih tumbuh. Rasul Paul meransang orang Kristian: “Terus meh rinduka pangan diri baka diri menyadi.” (Heb. 13:1) Jehovah deka kitai berusaha ngenalamka pengerindu ngagai pangan diri. Artikel tu deka berandauka nama kebuah kitai patut majak semak enggau bala menyadi sereta baka ni kitai ulih terus ngereja nya.

NAMA KEBUAH KITAI PATUT MAJAK SEMAK ENGGAU PANGAN DIRI?

4. Nitihka Masmur 133:​1, baka ni kitai ulih mengkang menghargai penyerakup ke dikembuan kitai enggau bala menyadi? (Peda mega gambar.)

⁴ Bacha Masmur 133:1. Kitai setuju enggau pemasmur ke nulis, bekaban enggau sida ke rinduka Jehovah nya ‘manah’ sereta ‘nyamai.’ Ambika chunto, kitai engka mansa siti pun kayu ti amat besai sereta cantik ninting hari. Tang nyau kelama, kitai engka enda agi beratika pemanah pun kayu nya. Baka nya mega, kitai engka ulih ngasaika penyerakup enggau bala menyadi ninting hari. Kitai engka suah betemu enggau sida, engka beberapa kali dalam seminggu. Tang nyau kelama, enti kitai enda bejimat, kitai engka enda beratika pemanah penyerakup nya. Baka ni kitai ulih nentuka kitai mengkang rinduka pangan diri? Pengerindu kitai ke bala menyadi deka majak dalam enti kitai berundingka pemesai reti tiap iku sida ke raban gempuru sereta ke kitai.

5. Nama kesan iya ngagai orang bukai lebuh sida meda pengerindu ke diayanka kitai ngagai pangan diri?

⁵ Sekeda orang ke datai ngagai gempuru kitai keterubah kali amat kagum enggau pengerindu ke diayanka kitai ngagai pangan diri. Ketegal nya, sida engka sedar sida udah tetemuka pemendar. Jesus madah: “Enti kita rinduka pangan diri, semua orang deka nemu, kita meh murid aku.” (Jhn. 13:35) Peratika pengalaman Devi,a ke belajarka Bup Kudus enggau Saksi-Saksi Jehovah. Iya dibai ngagai konvensyen kitai. Ba pengujung hari keterubah konvensyen nya, iya madah ngagai pengajar Bup Kudus iya: “Apai indai aku nadai kala merap aku. Tang ba konvensyen tu, dalam sehari aja, aku diberap 52 kali! Aku ulih ngasaika pengerindu Jehovah ari bala nembiak Iya. Aku ka nyadi sebagi ari ruang bilik tu.” Devi terus ngaga pemansang lalu dibaptisa ba taun 2024. Au, lebuh sida ke baru, meda pemadas pengawa kitai nyengkaum pengerindu ke diayanka kitai ngagai pangan diri, sida kesuah iya deka diperansang nyembah Jehovah.—Mat. 5:16.

6. Baka ni majak semak enggau bala menyadi ulih nyaga kitai?

⁶ Lebuh kitai majak semak enggau bala menyadi, tu ulih nyaga kitai. Paul meransang bala menyadi: “Anang ngetu meransang pangan diri ninting hari . . . Enggau nya, nadai siku pan ari kita nyadi kieh ketegal kuasa dosa ti ulih nipu.” (Heb. 3:13) Enti kitai berasai balat asa ati nyentukka kitai tusah deka ngereja utai ti betul, Jehovah engka meransang siku menyadi ke beratika pekara tu meri tulung ke diguna kitai. (Mas. 73:​2, 17, 23) Tulung ke baka nya amat manah ke kitai.

7. Nama kaul entara pengerindu enggau penyerakup? (Kolosi 3:​13, 14)

⁷ Kitai sebagi ari seraban orang ke bebendar deka ngayanka pengerindu ngagai pangan diri. Ketegal nya, kitai ngasaika mayuh berekat. (1 Jhn. 4:11) Ambika chunto, pengerindu meransang kitai ‘terus liat ati enggau pangan diri.’ Lalu nya nulung kitai beserakup enggau bala menyadi. (Bacha Kolosi 3:​13, 14; Eps. 4:​2-6) Nya kebuah, lebuh ba gempuru, kitai bisi endur ti lantang agi alai kitai ulih nyembah Jehovah, ke enda diasaika nama-nama gerempung ba dunya.

AYANKA BASA NGAGAI PANGAN DIRI

8. Baka ni Jehovah nulung kitai beserakup enggau pangan diri?

⁸ Penyerakup ke diasaika kitai enggau bala menyadi ba serata dunya semina ulih nyadi ketegal Jehovah. Jehovah nentuka kitai ulih beserakup taja pan kitai enda sempurna. (1 Kor. 12:​24, 25) Bup Kudus madahka, kitai “udah diajar Petara ngambika rinduka pangan diri.” (1 Tes. 4:9) Reti iya, nengah Bup Kudus, Jehovah madahka kitai utai ke patut digaga kitai ngambika ulih majak semak enggau pangan diri. Kitai ulih “diajar Petara” lebuh kitai beratika sereta nitihka utai ti diajar Iya. (Heb. 4:12; Jas. 1:25) Lalu nya meh utai ke digaga Saksi-Saksi Jehovah enggau bebendar.

9. Nama dipelajarka kitai ari Rome 12:​9-13 pasal ngayanka basa ngagai pangan diri?

⁹ Baka ni Jaku Petara ngajar kitai pasal chara majak semak ngagai pangan diri? Peratika utai ke dipadah Paul pasal pekara tu ba Rome 12:​9-13. (Bacha.) Iya madahka: “Awakka kita dulu ngayanka basa ngagai pangan diri.” Nama reti utai ku iya? Kitai patut ngiga peluang ngayanka pengerindu ngagai orang bukai nengah mayuh macham chara, baka ngampun, rindu nerima temuai, sereta ngayanka pengerah jari. (Eps. 4:32) Nuan enda ibuh nganti bala menyadi datai semak ngagai nuan. Nuan ulih dulu ngereja nya. Lalu nuan deka ngasaika utai ti disemayaka Jesus lebuh iya madahka: “Orang ke meri deka gaga agi ati ari orang ke nerima.”—SKR. 20:35.

10. Baka ni kitai ulih ransing “ngayanka basa ngagai pangan diri”? (Peda mega gambar.)

¹⁰ Sepengudah Paul ngasuh kitai dulu agi ngayanka basa ngagai pangan diri, iya madah: “Kereja meh pengawa enggau bagas, anang malas.” Orang ke bagas nya ransing sereta bebendar gawa. Lebuh iya diberi sesiti pengawa, iya ngereja nya enggau ransing. Jaku-Dalam 3:​27, 28 meransang kitai: “Enggau naka ulih kereja utai ti manah ngagai orang ke begunaka utai nya.” Nyadi, lebuh kitai meda orang begunaka tulung, kitai ngereja utai ke ulih kitai kena nulung iya. Kitai enda betangguh tauka ngumbai orang bukai deka nulung iya.—1 Jhn. 3:​17, 18.

11. Nama ulih nulung kitai majak semak enggau pangan diri?

¹¹ Siti agi chara kitai ulih ngayanka basa ngagai orang bukai iya nya enggau jampat ngampunka sida lebuh sida ngemediska ati kitai. Epesus 4:26 madahka: “Anang majak ringat nyentuk ngagai mata panas padam.” Nama kebuah? Laban ayat 27 madahka, enti kitai majak ringat, kitai baka ke “meri peluang ngagai Sitan.” Dalam Bup Kudus, Jehovah bekali-kali madah ngagai kitai ngambika ngampunka pangan diri. Kolosi 3:13 meransang kitai: “Terus meh . . . ngampunka pangan diri ari ati.” Lebuh kitai ngampunka penyalah orang bukai, nya siti ari chara ti manah kitai ulih majak semak enggau sida. Lebuh kitai ngampun, kitai “enggau naka ulih bebendar idup bebaik enggau pangan diri, kena nyaga penyerakup ke diberi kuasa kudus Petara.” (Eps. 4:3) Nyadi, lebuh kitai ngampunka orang bukai, kitai nulung gerempung Jehovah beserakup sereta lantang agi.

12. Baka ni Jehovah nulung kitai ngampunka orang bukai?

¹² Endang amat, kekadang kitai tusah deka ngampunka sida ke udah ngemediska ati kitai. Tang enggau tulung ari kuasa kudus Petara, kitai ulih ngampunka sida. Pengudah meransang kitai “rinduka pangan diri” sereta ‘ngereja pengawa enggau bagas,’ Bup Kudus meransang kitai: “Awakka kuasa kudus ngasuh kita ransing.” (Rom. 12:11) Nyadi, kuasa kudus Petara ulih nulung kitai ransing ngayanka pengerindu sereta ngampunka pangan diri ari ati. Nya meh kebuah iya, kitai patut bebendar minta Jehovah nulung kitai.—Luk. 11:13.

“ENDA BEPECHAH-BELAH”

13. Nama utai ke ulih ngasuh kitai bepechah-belah?

¹³ Raban gempuru kitai terdiri ari “semua macham orang” ke datai ari mayuh macham latar belakang. (1 Tim. 2:​3, 4) Ketegal nya, tiap iku kitai engka ngaga pemutus ti bebida pasal gari ke dikena, chara ngintu diri, chara berubat, tauka pemerindang kitai. Enti kitai enda bejimat, utai ke baka tu ulih ngasuh kitai bepechah-belah. (Rom. 14:4; 1 Kor. 1:10) Ketegal kitai “udah diajar Petara ngambika rinduka pangan diri,” kitai patut bejimat ngambika enda ngumbai pemutus kitai manah agi ari pemutus orang bukai, lalu ngansak sida nitihka pemutus kitai.—Plp. 2:3.

14. Kitai patut seruran bebendar ngereja nama, lalu nama kebuah?

¹⁴ Kitai mega ulih nyeliahka raban gempuru ari bepechah-belah enti kitai seruran bebendar ngelantang sereta meransang pangan diri. (1 Tes. 5:11) Baru-baru tu, mayuh menyadi ke enda aktif tauka ke udah dikeluarka ari raban gempuru, udah pulai baru. Kitai ngelaluka sida enggau bepengerindu! (2 Kor. 2:8) Peratika pengalaman siku menyadi indu ke datai begempuru baru pengudah enda aktif pengelama 10 taun. Iya madahka: “Semua orang tuchum sereta betabi enggau aku.” (SKR. 3:19) Baka ni utai ti mit ke dikereja bala menyadi meri kesan ngagai iya? Ku iya madahka: “Aku ngasaika Jehovah benung nulung aku nyadi gaga ati baru.” Au, enti kitai bebendar meransang orang bukai, Jesus ulih ngena kitai ngelantangka sida “ke lelak ngema utai ti berat.”—Mat. 11:​28, 29.

15. Nama siti agi chara kitai ulih ngemansangka penyerakup? (Peda mega gambar.)

¹⁵ Siti agi chara kitai ulih ngemansangka penyerakup iya nya ari jaku kitai. Jop 12:11 madahka: “Baka dilah nuan ti ngasaika penyamai utai ti diempa, baka nya meh pending nuan deka lantang ninga leka jaku.” Baka tukang masak ke seruran nyepi pemakai iya kena nentuka pemakai nya nyamai sebedau meri orang makai, kitai mega patut berunding enggau manah pasal utai ti deka disebut sebedau kitai nyebut utai nya. (Mas. 141:3) Kitai deka nentuka utai ti disebut kitai seruran meransang, ngelantangka ati, sereta mai penguntung ngagai bala peninga kitai.—Eps. 4:29.

16. Sapa kelebih iya patut ngena jaku ti meransang?

¹⁶ Bala laki sereta apai indai kelebih agi patut nentuka jaku sida seruran meransang. (Kol. 3:​19, 21; Tit. 2:4) Bala tuai gempuru mega patut ngena jaku sida ngelantangka ati bala bedus Jehovah. (Isa. 32:​1, 2; Gal. 6:1) Bup Kudus ngingatka kitai: “Naka meh pengaga tetemuka leka jaku ba maya ti ngena.”—J-lam. 15:23.

NGAYANKA PENGERINDU “ARI ATI NENGAH PENGAWA”

17. Baka ni kitai ulih nentuka pengerindu kitai ke bala menyadi datai ari ati?

¹⁷ Rasul John meransang kitai “ngayanka pengerindu, ukai aja nengah leka jaku tauka nengah mulut, tang kitai patut ngayanka nya ari ati nengah pengawa kitai.” (1 Jhn. 3:18) Kitai dekaka pengerindu kitai ke bala menyadi Kristian datai ari ati. Baka ni kitai ulih ngereja nya? Lebuh kitai suah agi begulai enggau sida, kitai deka majak agi semak enggau sida, lalu pengerindu kitai ke pangan diri deka majak dalam. Nyadi, giga meh peluang begulai enggau orang bukai, baka ba gempuru sereta ba pengawa nginjil. Kena meh awak ngabas pangan diri. Lebuh kitai ngereja semua utai tu, kitai nunjukka diri “udah diajar Petara ngambika rinduka pangan diri.” (1 Tes. 4:9) Lalu kitai empu deka ngasaika pemendar utai ti ditulis pemasmur: ‘Naka meh pemanah, naka meh penyamai lebuh nembiak Petara diau seati enggau pangan diri!’—Mas. 133:1.