Mengkang Baruh Ati taja pan Nuan Enda Nemu Sekeda Utai

1. Nama kebuah kitai ngumbai Jehovah ngaga kitai enggau amat manah, lalu nama kebuah Jehovah ngereja nya?

JEHOVAH ngaga kitai enggau amat manah laban kitai ulih berunding, belajarka utai ti baru, sereta meretika chara deka ngena utai ti dipelajarka kitai. Nama kebuah Iya ngaga kitai baka nya? Iya dekaka kitai “tetemuka penemu pasal Petara” sereta gawa ke Iya enggau pengabis runding kitai.—J-lam. 2:​1-5; Rom. 12:1.

2. (a) Nama tatak ke dikembuan kitai? (Rome 11:​33, 34) (Peda mega gambar.) (b) Nama kebuah kitai patut sedar kitai enda ibuh nemu semua utai?

² Taja pan kitai ulih belajar, tang bisi mayuh utai ke enda ditemu kitai. (Bacha Rome 11:​33, 34.) Peratika chunto Jop. Jehovah ngena mayuh tanya kena nulung Jop faham, bisi mayuh utai ke enda ditemu iya. Tu nulung Jop sedar, iya patut baruh ati sereta ngubah runding iya. (Jop 42:​3-6) Kitai mega tau bulih penguntung lebuh kitai sedar kitai enda ibuh nemu semua utai. Lebuh kitai nemu tatak diri, tu ngasuh kitai andal Jehovah seruran deka madahka utai ke patut ditemu kitai ngambika kitai ulih ngaga pemutus ti manah.—J-lam. 2:6.

3. Nama deka dikerandauka kitai dalam artikel tu?

³ Dalam artikel tu, kitai deka berandauka sekeda utai ti enda ditemu kitai, sereta nama kebuah kekadang utai tu ulih nyadi penanggul ke kitai. Kitai mega deka berandauka kebuah nya manah enti kitai enda nemu sekeda utai. Utai ti dipelajarka kitai deka nulung kitai andal, Jehovah deka madahka semua utai ke patut ditemu kitai laban Iya “amat bepenemu-dalam.”—Jop 36:4.

KITAI ENDA NEMU KEMAYA PENGUJUNG DEKA DATAI

4. Nitihka Matthew 24:​36, nama siti utai ke endang enda ditemu kitai?

⁴ Bacha Matthew 24:36. Kitai enda nemu kemaya pengujung dunya tu deka datai. Indah Jesus, lebuh ba dunya, enda nemu “hari enggau jam iya.”a Udah nya iya madah ngagai bala rasul iya, semina Jehovah “aja ke bisi hak nentuka maya enggau jam” pasal sekeda utai ke deka nyadi. (SKR. 1:​6, 7) Jehovah udah nentuka maya alai pengujung dunya tu deka datai, tang kitai enda nemu enggau nyemetak kemaya utai tu deka nyadi.

5. Nama utai ke engka ditapi kitai ketegal kitai enda nemu ni maya pengujung deka datai?

⁵ Baka ke dipadah Jesus, kitai enda nemu ni pengelama kitai patut nganti sebedau pengujung datai. Ketegal nya, kitai engka kurang sabar tauka asa ati, kelebih agi enti kitai udah lama nganti penatai hari Jehovah. Tauka kitai engka tusah deka tan ngenatka jaku kelese ari diri sebilik tauka orang bukai. (2 Pet. 3:​3, 4) Kitai engka berunding, enti kitai nemu enggau nyemetak kemaya pengujung dunya tu deka datai, kitai engka senang agi sabar sereta enda entu asa ati enti orang bukai ngeleseka kitai.

6. Nama kebuah nya manah enti kitai enda nemu kemaya pengujung dunya tu deka datai?

⁶ Ketegal Jehovah enda madah ngagai kitai ni maya pengujung dunya tu deka datai, kitai bisi peluang nunjuk ngagai Iya kebuah kitai nyembah Iya ketegal kitai rindu sereta arapka Iya. Kitai deka nyembah Jehovah belama iya, ukai semina nyentukka pengujung dunya tu aja. Ari ke befokus kemaya “hari Jehovah” deka datai, manah agi enti kitai berundingka utai manah ke deka nyadi lebuh hari nya datai. Tu deka nulung kitai majak semak enggau Jehovah, arapka Iya, sereta ngereja semua utai ke ulih kitai kena ngelantangka ati Iya.—2 Pet. 3:​11, 12.

7. Nama utai ke ditemu kitai?

⁷ Kitai deka befokus ba utai ti ditemu kitai. Kitai nemu hari ti penudi berengkah ba taun 1914. Dalam Bup Kudus, Jehovah udah meri kitai mayuh jaku benabi ke nunjukka hari ti penudi berengkah ba taun 1914. Jehovah mega udah madahka kitai pasal gaya dunya tu pengudah taun nya. Ketegal nya, kitai amat yakin ‘hari Jehovah nyau semak.’ (Sep. 1:14) Kitai mega nemu Jehovah dekaka kitai madahka “Berita Manah pasal Perintah Petara” ngagai semua orang. (Mat. 24:14) Kitai nusui Berita Manah tu ba kira-kira 240 iti menua, sereta dalam lebih ari 1,000 iti bansa jaku. Taja pan kitai enda nemu “hari enggau jam” pengujung dunya tu deka datai, tang kitai agi ulih sereta patut ransing nginjil.

KITAI ENDA NEMU BAKA NI JEHOVAH DEKA NULUNG KITAI

8. Nama reti rambai jaku, kitai “enda nemu utai ke digaga Petara ti bendar”? (Pengajar 11:5)

⁸ Kena nyapai peneka Iya, Jehovah engka ngasuh tauka nejuka sesiti utai nyadi. Tang Bup Kudus madahka, kitai “enda nemu utai ke digaga Petara ti bendar.” (Bacha Pengajar 11:5.) Nama reti tu? Perundingka tu: Nyentukka seharitu, bala saintis enda nemu baka ni anak mit ulih mansang besai dalam sarang anak indai iya. Baka nya mega, kitai enda seruran faham kebuah Jehovah nejuka sesiti utai nyadi tauka baka ni Iya deka nulung kitai.—Mas. 37:5.

9. Ketegal kitai enda nemu baka ni Jehovah deka nulung kitai, nama runding ke engka dikembuan kitai?

⁹ Ketegal kitai enda nemu baka ni Jehovah deka nulung kitai, kitai engka kakang ati deka ngaga sekeda pemutus. Kitai engka kakang ati deka ngelengkaka sekeda utai ngambika ulih ngereja mayuh agi ba pengawa nginjil, tauka kakang ati deka pindah ngagai endur ti begunaka mayuh agi penginjil. Kitai engka enda ulih nyapai sesiti juluk ati ba pengarap, tauka kitai engka ransing nginjil tang nadai asil ti manah. Tauka kitai engka napi penanggul ba sesiti projek teokratik. Semua tu ulih ngasuh kitai ngasaika Jehovah enda gaga ati enggau kitai.

10. Nama sifat ti penting ke ulih dikemansangka kitai lebuh kitai enda nemu baka ni Jehovah deka nulung kitai?

¹⁰ Ketegal kitai enda nemu baka ni Jehovah deka nulung kitai, tu nulung kitai ngemansangka sekeda sifat ti penting, baka pemaruh ati. Kitai sedar Jehovah seruran nemu utai ti pemadu manah. (Isa. 55:​8, 9) Kitai mega belajar arapka Jehovah enggau pengabis ati sereta yakin Jehovah ulih mutarka semua utai ngena chara ti pemadu manah. Lebuh kitai bisi asil ti manah ba pengawa nginjil tauka ba sesiti projek teokratik, kitai deka meri puji ngagai Jehovah. (Mas. 127:1; 1 Kor. 3:7) Lalu enti sekeda utai enda nyadi baka ke dijangka kitai, kitai deka ingat Jehovah nemu semua utai. (Isa. 26:12) Kitai ngereja utai ke ulih kitai, lalu pechaya Jehovah deka seruran nulung kitai. Kitai yakin Iya deka ngiring kitai taja pan Iya enda ngereja nya enggau chara ti ngalitka ati baka ke dikereja Iya suba.—SKR. 16:​6-10.

11. Nama utai ti penting ke ditemu kitai?

¹¹ Kitai nemu Jehovah nya seruran bepengerindu, adil, sereta bepenemu-dalam. Kitai mega nemu Iya amat rinduka kitai ketegal utai ti digaga kitai ke Iya sereta ke bala menyadi Kristian kitai. Lalu kitai nemu Jehovah seruran merekatka sida ke tetap ati ngagai Iya.—Heb. 11:6.

KITAI ENDA NEMU NAMA DEKA NYADI PAGILA

12. Nitihka James 4:​13, 14, nama utai ke enda ditemu kitai?

¹² Bacha James 4:​13, 14. Kitai enda nemu nama deka nyadi ngagai kitai pagila. Mayuh “utai ke enda disadang” tauka enda ulih dikawal ulih nyadi ngagai kitai. (P-jar. 9:11) Ketegal nya, kitai enda nemu sekalika utai ke diperambu kitai ulih mujur tauka sekalika kitai agi idup kena ngereja pelan nya.

13. Ketegal kitai enda nemu nama deka nyadi jemah ila, nama utai ke engka diasaika kitai?

¹³ Ketegal kitai enda nemu enggau nyemetak nama deka nyadi jemah ila, tu engka ngasuh kitai tusah deka tan napi penguji. Enti kitai balat irau pasal utai ti engka deka nyadi, tu ulih ngasuh kitai lenyau pengaga ati. Utai ke enda disadang tauka penusah ulih nyadi enggau ngenyit, lalu tu ulih ngasuh kitai balat tusah ati. Pia mega, lebuh utai enda nyadi baka ke dikedekaka kitai, kitai engka berasai asa ati tauka pedis ati.—J-lam. 13:12.

14. Nama utai ke patut digaga sereta ditemu kitai ngambika ulih amat gaga ati? (Peda mega gambar.)

¹⁴ Enda ngira nama utai ke engka nyadi ba pengidup kitai, kitai ulih nunjukka kitai nyembah Jehovah ketegal kitai rinduka Iya. Bup Kudus nunjukka kitai enda ulih ngarapka Jehovah deka ngelindung kitai ari tiap iti penusah. Jehovah mega enda nentuka takdir pengidup kitai. Iya nemu kitai ulih gaga ati taja pan kitai enda nemu semua utai ke deka nyadi ba kitai. Tang kitai deka gaga agi ati enti kitai seruran minta iring ari Iya ba pengidup kitai sereta ngasika Iya. (Jer. 10:23) Lebuh kitai ngiga iring ari Iya maya ngaga pemutus, kebendar iya kitai benung madahka: “Enti Jehovah ngemendarka, kami deka idup lalu ngereja utai tu tauka utai nya.”—Jas. 4:15.

15. Nama ditemu kitai pasal jemah ila?

¹⁵ Taja pan kitai enda nemu nama deka nyadi ba pengidup kitai ninting hari, tang kitai nemu Jehovah udah besemaya deka meri kitai pengidup ti meruan belama iya, enda ngira ba serega tauka ba dunya. Kitai nemu Iya enda nemu bula, lalu nadai utai ulih nagang Iya ari ngamatka semua semaya Iya. (Tit. 1:2) Bup Kudus madahka tu pasal Jehovah: “Kenyau ari pun kelia, [Jehovah] udah madahka utai ti deka nyadi.” Au, semina Jehovah aja ke ulih ngereja tu. Semua utai ke dipadah Iya ba jeman Bup Kudus dikeamatka magang, lalu semua utai ke dipadah Iya pasal jemah ila deka dikeamatka mega. (Isa. 46:10) Kitai nemu, nadai utai ulih nagang Jehovah ari rinduka kitai. (Rom. 8:​35-39) Iya deka meri kitai penemu-dalam, pengelantang ba ati, sereta pengering ngambika ulih tan ngenatka sebarang penguji ke datai ba pengidup kitai. Kitai ulih yakin Jehovah deka nulung sereta merekatka kitai.—Jer. 17:​7, 8.

KITAI ENDA ULIH FAHAM PENALAM PENEMU JEHOVAH PASAL KITAI

16. Nitihka Masmur 139:​1-6, nama utai ke ditemu Jehovah pasal kitai, lalu nama asai ati kitai pasal nya?

¹⁶ Bacha Masmur 139:​1-6. Jehovah nemu semua utai pasal kitai. Iya nemu runding sereta asai ati kitai. Iya nemu utai ti dipadah kitai sereta utai ti bisi dalam ati kitai. Iya mega nemu semua utai ke dikereja kitai sereta kebuah kitai ngereja nya. Baka ke dipadah Raja David, Jehovah seruran sedia sereta ulih nulung kitai. Nama asai ati nuan lebuh nuan nemu Petara ti Pemadu Bekuasa ke ngaga semua utai, amat ibuhka nuan? Baka ke dipadah David: “Penemu Nuan endang amat dalam, ngelui ari ti ulih diperagam aku.”—Mas. 139:6.

17. Nama kebuah kitai engka tusah deka pechaya Jehovah amat ngelala kitai?

¹⁷ Latar belakang diri sebilik, budaya kitai, tauka jalai pengarap kitai suba, engka ngasuh kitai tusah deka pechaya Jehovah nya Apai ti bepengerindu ke ibuhka kitai. Tauka kitai engka ngumbai penyalah ke digaga kitai suba amat besai nyentukka Jehovah enggai agi ngelala kitai, lalu Iya amat jauh ari kitai. Raja David mega kekadang bisi asai ati ke baka nya. (Mas. 38:​18, 21) Tauka sesiku orang ke bebendar ngubah pengidup iya sereta idup nitihka chara ke dikedekaka Jehovah engka berunding: ‘Enti Petara amat ngelala aku, nama kebuah Iya ka aku berubah enti Iya nemu nya sigi chara pengidup aku?’

18. Nama penguntung iya lebuh kitai pechaya Jehovah ngelala kitai manah agi ari kitai ngelala diri empu? (Peda mega gambar.)

¹⁸ Kitai ulih pechaya, Jehovah ngelala kitai manah agi ari kitai ngelala diri empu, lalu Iya ulih meda pemanah kitai ke enda ulih dipeda kitai. Taja pan Iya ulih meda pengelemi kitai, tang Iya nemu asai ati kitai sereta kebuah kitai ngereja sesiti utai. Lalu Iya agi rinduka kitai. (Rom. 7:15) Lebuh kitai nemu Jehovah seruran meda potensi kitai, nya ulih meri kitai pengering ngambika nyembah Iya enggau tetap ati sereta gaga ati.

19. Nama utai ke ditemu kitai pasal Jehovah?

¹⁹ Kitai nemu sereta yakin Jehovah nya pengerindu. (1 Jhn. 4:8) Kitai nemu standard pengelurus Iya nunjukka pengerindu Iya ke kitai, lalu Iya dekaka kitai ngembuan pengidup ti pemadu manah. Kitai nemu Jehovah deka kitai idup meruan belama iya. Ketegal nya, Iya udah nyediaka genselan tebus Jesus. Genselan tebus nya ngasuh kitai yakin, taja pan kitai ngaga penyalah, tang kitai agi ulih nyembah Jehovah enggau chara ti ngelantangka ati Iya. (Rom. 7:​24, 25) Kitai mega nemu, “Petara besai agi ari ati kitai, lalu Iya nemu semua utai.” (1 Jhn. 3:​19, 20) Jehovah nemu semua utai pasal kitai, lalu Iya yakin kitai ulih mujur ngereja peneka Iya.

20. Nama ulih nulung kitai enda kelalu irau pasal utai ke enda ditemu kitai?

²⁰ Jehovah madahka kitai semua utai ke patut ditemu kitai. Nyadi kitai enda ibuh irau pasal utai ke enda ditemu kitai. Tang kitai ulih befokus ba utai ti amat penting. Enggau chara tu, kitai ngayanka pemaruh ati lalu enggau pengabis ati arapka Jehovah, “ke amat bepenemu-dalam.” (Jop 36:4) Taja pan penemu kitai pasal sekeda utai bisi tatak diatu, tang kitai nemu Jehovah deka terus ngajar kitai utai ti baru belama iya. Lalu kitai gagit ati laban ulih belajar utai ti baru pasal Jehovah belama iya.—P-jar. 3:11.