Chara Nagang Diri ari Gian Ngirup Ai Bisa

Sekeda orang balat ngirup ai bisa lebuh sida berasai tusah ati, puang tauka nadai pengawa. Baka ni enggau nuan empu? Kati diatu nuan gian ngirup? Enti au, baka ni chara nagang diri ari gian ngirup ai bisa? Peratika sekeda penerang ti nulung nuan mutarka penanggul tu.

Ni penyampau ai bisa ke ulih diirup?

Ajar Bup Kudus: “Anang begulai enggau orang ke pengirup.”—Jaku Dalam 23:20.

Perundingka: Ajar Bup Kudus nadai nagang kitai ngirup ai bisa. (Pengajar 9:7) Taja pia, ajar Bup Kudus bisi madahka, kitai enda ulih ngirup ai bisa nyentukka mabuk. (Luke 21:34; Epesus 5:18; Titus 2:3) Nambahka nya, kitai mega enda ulih ngirup mayuh ai bisa taja pan kitai nakal. Nya ulih ngerugika kitai. Kitai engka ngaga pemutus ti salah, lalu ngachau pengerai diri. Kaul kitai enggau orang bukai mega engka enda manah.—Jaku Dalam 23:29, 30.

Mayuh pemerintah mega setuju, ngirup ai bisa patut bisi tatak. Sida nguji natak penyampau ai bisa ke ulih diirup dalam sehari, sereta berapa kali seseiku orang ngirup ai bisa dalam seminggu.a Kingatka mega, penakal tiap iku orang enda sama. Nyadi ba sekeda orang, manah agi enti iya enda ngirup ai bisa. Nitihka Gerempung Pengerai ba Serata Dunya:

“Kekadang, segelas dua pan ulih ngachau—chunto iya:

Lebuh megai tauka bekenaka perengka mesin.
Indu ke ngandung tauka nusuka anak.
Orang ke makai ubat.
Orang ke bisi sekeda penyakit.
Orang ke tusah ngetu ngirup enti udah berengkah.”

Tanda-tanda gian ngirup ai bisa

Ajar Bup Kudus: “Aram kita meresa ulah diri, lalu pulai baru.”—Sabak Kenang 3:40.

Perundingka: Kena nemu sekalika nuan nya gian ngirup tauka enda, nuan patut meresa diri. Enti ulih, gaga meh ubah ti patut, ngambi pengerai nuan enda dikachau. Ba baruh tu sekeda tanda ti nunjukka nuan gian ngirup tauka enda.

Nuan berasai enda nyamai enti enda ngirup. Nuan enda ulih jenuh enti enda ngirup. Pia mega, nuan ngasaika diri tusah begulai sereta nadai pengering enti enda ngirup. Indah maya bisi penanggul, nuan balat ngirup.
Nuan pengirup agi ari suba. Nyauka ninting hari nuan ngirup. Indah, ai bisa ke dipilih nuan bisa agi ari selama, laban ke biasa nya udah nadai asai ba nuan.
Ketegal gian ngirup, nuan bisi penanggul ba rumah sereta endur gawa. Chunto, belanja nuan ninting bulan niki agi ketegal bebelika ai bisa.
Nuan engka ngachau pengelikun diri tauka orang bukai. Ngambika chunto, nuan enda ulih fokus maya gawa megai mesin, tauka maya deriba.
Bisi orang ngasaika nuan nya pengirup. Maya nuan ninga jaku tuduh tu, nuan ringat lalu nguji ngetanka diri. Udah nya, nuan nguji belalai ngirup lalu bula pasal penyampau ai bisa ke diirup nuan.
Nuan tusah ngetu. Kekadang, nuan engka bisi runding deka ngetu ngirup tauka ngurangka agi ulah nya. Tang, enda ulih.

Lima chara muai ulah ti gian ngirup ai bisa

1. Merambu.

Ajar Bup Kudus: “Bejimat lebuh nuan ngaga pelan, nya baru nuan deka bulih mayuh utai.”—Jaku Dalam 21:5.

Uji tu: Tentuka siti hari nuan deka ngirup dalam seminggu. Tang, abis enda tentuka dua hari nuan enda ngirup. Pia mega, tatak penyampau ai bisa ke deka diirup nuan dalam sehari nya.

Siti gerempung sosial ba U.K ti ibuhka pengerai ketegal gian ngirup madah: “Chara ti pemadu manah kena ngurangka gian ngirup iya nya, ngembuan jadual ti tetap maya enda ngirup.”

2. Kereja utai ke diperambu nuan.

Ajar Bup Kudus: “Tembuka pengawa nya.”—2 Korint 8:11.

Uji tu: Uji pansik pemisa ai bisa ke deka diirup nuan. Enggau chara tu, nuan nemu berapa penyampau ai bisa ke patut diirup nuan. Pia mega, uji giga ai bukai ke dikerinduka nuan, tang nadai ngembuan ai bisa. Tentuka nuan seruran bisi ai nya dalam rumah.

Nitihka National Institute on Alcohol Abuse and Alcoholism ba Amerika Serikat: “Taja pan ubah ke digaga nuan nya mimit aja, tang nya ngasuh nuan ngurangka penyampau ai bisa ke patut diirup nuan. Dini nemu, dudi hari nuan ulih ngetu gian ngirup.”

3. Tetap ati enggau pemutus diri

Ajar Bup Kudus: ‘Semina sebut aja “Au” lebuh kita deka nyebut “Au”, tauka “Enggai” enti kita deka nyebut “Enggai.” ‘—James 5:12.

Uji tu: Enti nuan udah mutuska ngetu ngirup, anang meh alah umbuk orang bukai. Tulak enggau chara ti bebasa tang berani.

Nitihka National Institute on Alcohol Abuse and Alcoholism Amerika Serikat: “Enti nuan enda betangguh nulak umbuk orang bukai, senang agi nuan ngetanka pemutus diri.”

4. Perundingka penguntung iya.

Ajar Bup Kudus: “Pengujung utai endang manah agi ari pun iya.”—Pengajar 7:8.

Uji tu: Uji tuliska penguntung ke diulih nuan enti ngetu ngirup. Chunto, kati nuan senang agi tinduk udah tu, baka ni enggau pengerai nuan, belanja nuan, sereta kaul nuan enggau orang bukai. Maya madahka peneleba nuan ngagai orang bukai, padahka meh pemanah iya, ukai pemedis nuan ngereja nya.

5. Minta tulung ari Petara.

Ajar Bup Kudus: “Aku ulih ngereja semua utai ulih Iya ke meri aku pengering.”—Pilipi 4:13.

Uji tu: Enti nuan ngasaika diri gian ngirup, minta meh tulung ari Petara. Ngambika nuan kering ngelaban penguji nya, lalu ulih nagang diri.b Giga awak mansik iring ti beguna ari Bup Kudus. Ari bantu Petara, nuan ulih nagang diri ari gian ngirup ai bisa.

a Chunto, Department of Health and Human Services ba Amerika Serikat madah: “Orang indu ulih ngirup 4 kali dalam sehari tauka lebih ari 8 kali dalam seminggu. Lalu orang lelaki ulih lebih ari 5 kali sehari, tauka lebih ari 15 kali dalam seminggu. Penyampau tu enda sama nitihka menua. Nyadi, manah agi kita minta lalau ari lutur pasal tatak diri.

b Enti nuan agi ngasaika diri tusah ngetu ngirup, uji minta tulung ari bala pakar mega.