Nama Kebuah Saksi-Saksi Jehovah Ngubah Beberapa iti Utai ke Dipechayaka Sida?
Kami seruran ngena Bup Kudus nyadika batang ajar ba pengarap. Nya alai, kami ngubah beberapa iti utai ke dipechayaka kami, maya penemu kami pasal ayat Bup Kudus nya terang agi.a
Ubah ke digaga nya sejalai enggau prinsip Bup Kudus ba Jaku Dalam 4:18 ke madah, “Jalai ti ditengah orang ke lurus nya baka penumbuh mata hari. Iya majak terang-seterang datai ke hari nyau siang.” Baka penampak mata panas ke majak terang, baka nya mega penemu ke datai ari Petara mega majak terang-seterang. (1 Peter 1:10-12) Baka ke dipadahka dalam Bup Kudus, penemu ti terang deka majak mayuh ba “pengujung dunya.”—Daniel 12:4.
Penemu ke diubah nitihka Bup Kudus enda patut ngasuh kitai berasai enda nyamai ati. Nembiak Petara kelia mega kala bisi penemu ti enda berapa betul, lalu patut ngubah runding sida nitihka ajar ti baru sereta betul.
Moses bisi ati deka nyelamatka bansa Israel, tang nya ukai peneka Petara ba maya nya. Iya patut nganti pengelama 40 taun kena ngereja pengawa nya.—Kereja Rasul 7:23-25, 30, 35.
Rasul Paul enda ulih nemu reti utai ke dipadah pasal pemati sereta pengangkat Messiah.—Isaiah 53:8-12; Matthew 16:21-23.
Sekeda orang Kristian ba abad keterubah, ngembuan runding ti salah pasal ‘penatai Hari Petara.’—2 Tesalonika 2:1, 2.
Ba maya ti ngena, Petara empu deka ngemetulka penemu sida. Kitai mega ulih besampi, ngambika Petara terus meri kitai penemu ti betul.—James 1:5.
a Enti bisi ubah ba Bup Kudus, kami enda ngelalaika nya. Tang, nya deka ditulis ba litaricha kami. Lawa PERPUSTAKAAN DALAM TALIAN Watchtower, dan lihat bahagian Panduan Penyelidikan: Saksi-Saksi Yehuwa\Kepercayaan\Ajaran yang Dikemaskinikan.