Lebuh Josiah beumur 26 taun, iya ngaduka baru Rumah Sembiang Jehovah. Lebuh pengawa nya dipejalaika, ‘Bup Adat Jehovah, iya nya Adat ti udah diberi Petara ngagai Moses’ ditemu. Lebuh Raja Josiah ninga bup Adat nya dibacha, iya tekala nya ngaga ubah ngambika ulih ngasi utai ti ditulis dalam bup nya. (2 Ban. 34:​14, 19-21) Kati nuan deka macha Bup Kudus enggau tetap? Engka nuan benung nguji ngereja nya ninting hari. Kati nuan rindu ngereja nya? Kati nuan bisi nulis ayat Bup Kudus ke ulih nulung nuan? Lebuh Josiah beumur 39 taun, iya ngereja siti penyalah ke ngujungka ngagai pemati iya. Ari ke ngiga iring ari Jehovah, iya bepanggai ba penemu diri empu. (2 Ban. 35:​20-25) Nama utai ke ulih dipelajarka kitai ari utai ti nyadi ngagai Raja Josiah? Enda ngira kitai tuai tauka biak, tauka berapa lama kitai udah belajarka Bup Kudus, kitai mesti terus ngiga Jehovah. Baka ni kitai ulih ngereja nya? Seruran besampi minta iring ari Jehovah, belajarka Jaku Iya, sereta ningaka jaku lalau ari bala menyadi Kristian ke tegap ba pengarap. Enti kitai ngereja nya, kitai ulih nyeliahka diri ari ngereja penyalah ti besai, lalu kitai deka gaga agi ati.—Jas. 1:25. w23.09 12 ¶15-16

Bup Kudus bisi mayuh teladan bala indu ke rinduka Jehovah sereta nyembah Iya. Sida “ngereja semua utai enggau pengumbas iya, sereta tetap ati ba semua pekara.” (1 Tim. 3:11) Kelimpah ari nya, ba raban gempuru bisi mayuh teladan bala menyadi indu ti matang. Bala menyadi indu ti biak ulih belajarka mayuh utai ari sida. Bala menyadi indu ti biak, kati nuan nemu sekeda menyadi indu ti matang ke ulih diteladan nuan? Peratika sifat sida ti manah. Udah nya, perundingka chara nuan ulih neladan sifat sida. Ngambika ulih nyadi orang Kristian ti matang, kitai begunaka pemaruh ati. Enti siku menyadi indu baruh ati, iya deka ngembuan kaul ti manah enggau Jehovah sereta orang bukai. Ambika chunto, menyadi indu ke rinduka Jehovah enggau baruh ati nyukung atur kepala ke udah ditetapka Apai iya ti ba serega. (1 Kor. 11:3) Atur nya mega dikena ba raban gempuru sereta ba ruang bilik. w23.12 18-19 ¶3-5

Jehovah ngarapka laki rinduka bini iya sereta ngintu utai ke diguna bini iya ba tubuh, emosi, enggau ba pengarap. Ngemansangka chara berunding ti manah, ngayanka basa ngagai bala menyadi indu, sereta ngayanka diri ulih dikearapka, deka nulung nuan nyadi siku laki ti manah. Pengudah nuan kawin, nuan engka nyadi siku apai. Bisi mayuh utai ke ulih dipelajarka nuan ari Jehovah pasal nyadi siku apai ti manah. (Eps. 6:4) Jehovah madah ngagai Anak Iya, Jesus, Iya sayauka Jesus sereta gaga ati ke iya. Lalu Jehovah enda belalai nyebut utai nya. (Mat. 3:17) Enti nuan nyadi siku apai, tentuka bala anak nuan seruran nemu, nuan sayauka sida. Suah meh muji sida ketegal utai ti manah ke udah dikereja sida. Bala apai ke neladan Jehovah deka nulung anak sida nyadi orang Kristian ti matang. Nuan mega ulih besedia ari diatu ngambika ulih nyadi siku apai ti manah. Nuan ulih ngayanka pengerindu ngagai ruang bilik nuan sereta bala menyadi Kristian ke bisi dalam raban gempuru lebuh nuan ngintu sida enggau manah. Padahka mega ngagai sida, nuan rinduka sida lalu sida amat berega ba nuan.—Jhn. 15:9. w23.12 28-29 ¶17-18