Sida ke rinduka Jehovah tentu deka muji nama Iya enggau pengabis ati. Raja David nemu lebuh kitai muji nama Jehovah, nya sama baka kitai muji Jehovah empu. Lebuh kitai ninga nama Jehovah, kitai deka berunding pasal reputasi Iya, sifat Iya, sereta utai ti manah ke udah dikereja Iya. Ba David, nama Jehovah nya kudus, lalu iya deka muji nama nya. Iya deka ngereja nya enggau “semua nyawa enggau tubuh” iya, iya nya enggau pengabis ati. Baka nya mega, orang Lewi ngulu ba pengawa muji Jehovah. Sida enggau baruh ati ngaku jaku puji sida enda chukup kena muji nama Jehovah ti kudus. (Neh. 9:5) Endang amat, jaku puji ke datai ari ati nya ngagaka ati Jehovah. w24.02 9 ¶6

Jehovah enda ngumbai nuan enda mujur enti nuan enda ulih nyapai juluk ati ke endang enda ulih dijapai nuan. (2 Kor. 8:12) Uji belajar ari utai ke nagang nuan ari nyapai juluk ati nya. Ingatka utai ti udah dijapai nuan. Bup Kudus madahka, “Petara ukai Petara ti enda lurus, nyentukka Iya enda ingatka pengawa ke udah dikereja kita.” (Heb. 6:10) Nya alai, nuan mega patut seruran ingatka utai ti udah dikereja nuan. Perundingka juluk ati ke udah dijapai nuan. Juluk ati nya engka ngemansangka kaul nuan enggau Jehovah, bejaku enggau orang bukai pasal Iya, tauka dibaptisa. Seraya nuan ngaga pemansang sereta nyapai juluk ati nuan ke suba, nuan ulih terus ngaga pemansang ngagai juluk ati nuan ke diatu. Enggau tulung ari Jehovah, nuan ulih nyapai juluk ati nuan. Pia mega, uji meh seruran beratika chara Jehovah benung nulung nuan. Nya deka nulung nuan gaga ati seraya nuan bebendar nguji nyapai juluk ati nya. (2 Kor. 4:7) Enti nuan enda putus asa, nuan deka nerima berekat ti besai agi.—Gal. 6:9. w23.05 31 ¶16-18

Jehovah seruran ngiga chara kena ngayanka Diri rindu sereta lantang ati ke bala nembiak Iya. Bup Kudus madahka, Jehovah dua kali nyebut pasal Jesus: “Tu Anak ke dikesayauka Aku. Aku gaga ati ke iya.” (Mat. 3:17; 17:5) Kati nuan mega deka ninga Jehovah madahka Iya lantang ati enggau nuan? Sigi amat, Jehovah enda bejaku enggau kitai ari serega. Tang, Iya bejaku enggau kitai nengah Bup Kudus. Lebuh kitai macha utai ke disebut Jesus ngagai bala murid iya, kitai baka ke ninga Jehovah madahka Diri lantang ati enggau kitai. Jesus neladan sifat Apai iya enggau sempurna. Taja pan bala murid Jesus enda sempurna, tang iya madahka diri lantang ati enggau sida. Nyadi, lebuh kitai macha utai ti disebut Jesus, kitai ulih ngambarka Jehovah nyebut utai ti sama ngagai kitai. (Jhn. 15:​9, 15) Enti kitai dituntung penusah, tu ukai reti iya Petara enda lantang ati enggau kitai. Kebendar iya, lebuh kitai dituntung penusah, nya meri kitai peluang ngayanka penalam pengerindu kitai sereta pemesai pengarap kitai ngagai Jehovah.—Jas. 1:12. w24.03 28 ¶10-11