Pemungkal
12 Ku Jehovah bejaku ngagai Abram: “Tinggalka menua nuan, bala kaban belayan nuan, enggau ruang bilik apai nuan, lalu bejalai ngagai menua ke deka ditunjukka Aku ngagai nuan. 2 Aku deka ngasuh peturun nuan nyadi bansa ti besai, lalu Aku deka merekatka nuan. Aku deka ngasuh nuan nyadi orang ke tampak nama, lalu orang bukai deka bulih berekat ari nuan. 3 Aku deka merekatka orang ke merekatka nuan, lalu Aku deka nyumpah orang ke nyumpah nuan. Semua bansa ba dunya deka bulih berekat* nengah nuan.”
4 Nya alai Abram pan mupuk baka ke diasuh Jehovah. Abram beumur 75 taun lebuh iya ninggalka Haran. Lot mega mupuk enggau iya. 5 Abram mai bini iya Sarai, anak menyadi iya Lot, semua reta tengkira, enggau semua ulun ke udah diulih iya ba Haran, lalu mupuk ngagai menua Kanaan. Lebuh sida datai ba Kanaan, 6 Abram bejalai ba menua nya nyentuk ngagai Shikem, semak pun kayu ke besai ba Moreh. Maya nya, orang Kanaan diau ba menua nya. 7 Udah nya, Jehovah ngayanka Diri ngagai Abram lalu bejaku: “Aku deka meri menua tu ngagai peturun nuan.” Abram lalu ngaga siti alta ba alai Jehovah udah ngayanka Diri. 8 Udah nya, Abram pindah ngagai kawasan gunung ba timur Bethel. Iya nirika langkau kain iya ba entara Bethel enggau Eyai. (Bethel nya ba barat, lalu Eyai nya ba timur.) Ba dia mega iya ngaga siti alta ke Jehovah, lalu berengkah ngangauka nama Jehovah. 9 Udah nya, iya neruska pejalai iya tunga ke Negeb. Iya pindah ari endur siti ngagai endur siti.
10 Lapar pungkang balat nyadi ba menua Kanaan. Nya alai, Abram mupuk ngagai menua Ejip lalu diau dia enda lama.* 11 Sebedau sida datai ba Ejip, ku iya madah ngagai bini iya Sarai: “Dinga nuan utai ku aku. Aku nemu nuan indu ke amat bajik. 12 Lebuh orang Ejip meda nuan lalu nemu nuan nya bini aku, sida tentu deka munuh aku tang nejuka nuan idup. 13 Nya alai padah ngagai sida, nuan tu menyadi aku ngambika sida manah enggau aku lalu enda munuh aku.”
14 Lebuh Abram datai ba Ejip, orang ba dia meda indu ke enggau iya nya amat bajik. 15 Bala pegawai Firaun* mega meda Sarai lalu madahka pasal pemajik iya ngagai Firaun. Nya alai, Sarai lalu dibai ngagai istana raja. 16 Ketegal Firaun bisi ati ke Sarai, iya meri Abram bedus, sapi, keledai ti lelaki enggau indu, unta, enggau ulun ti lelaki enggau indu. 17 Jehovah lalu ngenataika penyakit ti balat* ngagai Firaun enggau semua orang ke ba istana iya ketegal Sarai, bini Abram. 18 Nya alai, Firaun ngangauka Abram lalu bejaku: “Nama kebuah nuan ngereja tu? Nama kebuah nuan enda madah iya bini nuan? 19 Ketegal nuan madah iya menyadi nuan, aku mimit da agi nyauka ngambi iya nyadika bini aku. Tu bini nuan. Bai iya pansut!” 20 Firaun lalu ngasuh bala pengawal iya mai Abram pansut ari menua Ejip. Nya alai, Abram enggau bini iya mai semua utai ke diempu seduai iya pansut ari Ejip.