Pemansut
1 Jakop, ke mega dikumbai Israel, mupuk ngagai Ejip. Semua anak iya enggau sida sebilik sama mupuk enggau iya. Tu meh nama bala anak lelaki Jakop: 2 Reuben, Simion, Lewi, Judah, 3 Isakar, Sebulun, Benjamin, 4 Dan, Naptali, Gat, enggau Aser. 5 Penyampau peturun Jakop bisi 70 iku orang. Maya nya, Josep udah ba Ejip. 6 Pengujung iya, Josep, bala menyadi iya, enggau orang ke idup sama jeman enggau iya, mati magang. 7 Orang Israel bisi mayuh anak. Lalu penyampau sida majak nambah enggau jampat, nyentukka menua nya penuh laban sida. Sida mega majak kering-sekering.
8 Pengudah sesiti timpuh, siku raja ti baru ke enda ngelala Josep belabuh merintah menua Ejip. 9 Ku raja nya madah ngagai rayat iya: “Peda kita! Orang Israel nyau mayuh agi sereta kering agi ari kitai. 10 Aram kitai ngiga chara ngambika penyampau sida enda terus betambah mayuh. Laban enti enda, lebuh perang nyadi, sida deka bepakat enggau munsuh kitai lalu ngelaban kitai. Udah nya, sida deka ninggalka menua tu.”
11 Nyadi, orang Ejip milih beberapa iku tuan atas bala ulun kena merinsaka orang Israel, lalu ngasuh sida ngereja pengawa ti berat. Sida dipaksa nirika kuta Pitom enggau Raamses ke Firaun.* Kuta nya nyadi endur alai Firaun nyimpan utai. 12 Tang makin balat orang Ejip merinsaka sida, makin mayuh penyampau sida betambah, lalu endur alai sida diau pan makin mayuh. Nya alai, orang Ejip balat takutka orang Israel. 13 Nya kebuah orang Ejip ngena chara ti amat jai maksa orang Israel nyadi ulun. 14 Orang Ejip ngasuh sida ngereja pengawa ti berat ngambika pengidup sida balat tusah. Sida diasuh nyampur semin* sereta ngaga batu bata. Sida mega diasuh ngereja bemacham pengawa ba ladang. Orang Ejip balat merinsaka sida, lalu maksa sida ngereja semua macham pengawa ke dikereja ulun.
15 Udah nya, raja Ejip bejaku enggau dua iku indu bidan orang Hebrew ke benama Siprah enggau Puah. 16 Ku raja nya madah ngagai seduai iya: “Lebuh seduai nulung indu orang Hebrew beranak, peratika anak ke diadaka iya. Enti anak nya lelaki, bunuh anak nya. Tang enti anak nya indu, awakka anak nya idup.” 17 Taja pia, dua iku indu bidan nya amat bebasaka* Petara ti bendar. Seduai iya enda ngereja utai ke diasuh raja Ejip. Seduai iya enda munuh anak ti lelaki. 18 Pengudah sesiti timpuh, raja Ejip ngangauka dua iku indu bidan nya lalu nanya ngagai seduai iya: “Nama kebuah seduai nejuka anak lelaki sida idup?” 19 Ku dua iku indu bidan nya nyaut Firaun: “Indu orang Hebrew enda baka indu orang Ejip. Sida amat kering. Sebedau indu bidan datai, sida udah dulu beranak.”
20 Nya alai, Petara merekatka dua iku indu bidan nya. Orang Israel majak nambah, lalu nyadi kering-sekering. 21 Ketegal dua iku indu bidan nya amat bebasaka Petara ti bendar, Petara lalu merekatka seduai iya ngambika seduai iya bisi ruang bilik diri empu. 22 Pengujung iya, Firaun meri pesan ngagai semua rayat iya: “Kita mesti muai semua anak lelaki orang Hebrew ke baru ada ngagai Sungai Nil. Tang tejuka tiap iku anak indu sida idup.”