Pemansut

13 Ku Jehovah bejaku ngagai Moses: 2 “Tiap iku anak tuai orang Israel ke lelaki patut dikuduska* ke Aku. Semua anak tuai ke lelaki diempu Aku magang, enda ngira nya anak mensia tauka anak jelu.”

3 Udah nya, Moses bejaku ngagai orang Israel: “Kita patut ingatka hari tu, laban ba hari tu Jehovah udah ngena jari Iya ti bekuasa mai kita pansut ari menua Ejip, iya nya menua* alai kita nyadi ulun. Nya alai, kita enda tau makai nama-nama utai ke beragi. 4 Seharitu, ba bulan Abib,* kita pansut ari Ejip. 5 Jehovah udah besemaya ngagai aki ini kita. Iya deka meri kita menua orang Kanaan, orang Het, orang Amor, orang Ibi, enggau menua orang Jebus. Menua nya kaya enggau ai tusu sereta madu. Pengudah Iya mai kita ngagai menua nya, kita mesti ngintu pengerami tu ba bulan Abib ninting taun. 6 Kita mesti makai roti ke enda beragi pengelama tujuh hari. Lalu ba hari ketujuh, kita mesti ngintu pengerami ke Jehovah. 7 Kita mesti makai roti ti enda beragi pengelama tujuh hari. Kita enda tau nyimpan nama-nama utai ke beragi, lalu adunan tepung ke beragi enda tau bisi ba serata menua kita. 8 Ba hari nya, kita mesti madah ngagai anak kita: ‘Aku ngereja tu laban aku deka ingatka utai ke dikereja Jehovah ke aku, lebuh aku pansut ari menua Ejip.’ 9 Jehovah udah ngena jari Iya ti bekuasa mai kita pansut ari menua Ejip. Nya alai, pengerami tu deka ngingatka kita pasal utai ke udah nyadi, baka ke utai nya udah ditulis ba jari enggau kening kita. Enggau nya, kita ulih bejaku pasal adat Jehovah. 10 Kita mesti nitihka adat tu ninting taun ba maya ti udah ditetapka.

11 “Jehovah udah besemaya ngagai kita enggau aki ini kita. Iya deka meri menua Kanaan ngagai kita. Lebuh Iya mai kita ngagai menua nya ila, 12 kita mesti nyerahka anak tuai kita ke lelaki enggau anak tuai jelu tupi kita ke lelaki ngagai Jehovah. Semua anak tuai ke lelaki diempu Jehovah magang. 13 Tiap iku anak tuai keledai mesti ditebus ngena siku jelu bedus. Enti keledai nya enda ditebus, kita mesti matahka rekung iya. Tiap iku anak tuai kita ke lelaki mega mesti ditebus.

14 “Enti anak kita nanya kita ila: ‘Nama kebuah kitai ngereja tu?’ kita patut nyaut iya: ‘Jehovah udah ngena jari Iya ti bekuasa mai kitai pansut ari menua alai kitai nyadi ulun ba Ejip. 15 Lebuh Firaun degil lalu enggai ngasuh kitai mupuk, Jehovah munuh tiap iku anak tuai ba menua Ejip, berengkah ari anak tuai orang Ejip, sampai ngagai anak tuai jelu ba menua nya. Nya meh kebuah kitai nyerahka tiap iku anak tuai jelu tupi ke lelaki ngagai Jehovah, lalu nebus tiap iku anak tuai kitai.’ 16 Pengerami tu deka ngingatka kita pasal utai ke udah nyadi, baka ke utai nya udah ditulis ba jari enggau kening kita, laban Jehovah udah ngena jari Iya ti bekuasa mai kitai pansut ari Ejip.”

17 Lebuh Firaun ngasuh orang Israel mupuk, Petara enda mai sida nengah menua orang Pilistin, taja pan jalai nya semak agi, laban Petara madahka: “Enti orang Israel patut beperang, sida engka deka ngubah runding sida lalu pulai baru ngagai Ejip.” 18 Nya alai, Petara ngasuh sida bejalai nengah menua puang semak Tasik Mirah. Orang Israel pansut ari menua Ejip enggau teratur baka raban soldadu. 19 Moses mega mai tulang Josep, laban Josep kala ngasuh orang Israel besumpah ngagai iya. Ku Josep madahka: “Petara tentu deka beratika kita. Lebuh kita mupuk ari endur tu, kita mesti mai tulang aku enggau kita.” 20 Sida mupuk ari Sukot lalu nirika kem ba Etam, iya nya ba tisi menua puang.

21 Maya siang hari, Jehovah mupuk dulu ari sida lalu ngiring sida ngena tiang remang.* Maya malam hari, Iya ngiring sida ngena tiang api ngambika pejalai sida terang. Ketegal nya, sida ulih neruska pejalai sida siang enggau malam. 22 Tiang remang endang seruran ba depan orang Israel lebuh siang hari. Lalu tiang api nya seruran ba depan sida lebuh malam hari.