Adat Lewi
24 Ku Jehovah nampung jaku Iya enggau Moses: 2 “Asuh orang Israel mai minyak kana ti tulin ke lampu kelita, ngambika api kelita nya enda padam. 3 Lampu kelita ke ba langkau gempuru, iya nya ke ba luar tirai ke semak enggau peti lampang batu Adat, mesti seruran idup ba depan Aku, Jehovah. Aron mesti nentuka api lampu kelita nya seruran idup ari lemai sampai pagi. Adat tu patut seruran dititihka kita enggau bala peturun kita. 4 Aron patut ngintu semua lampu kelita ke ba penuduk lampu ti digaga ngena emas ti tulin, ngambika semua lampu nya seruran idup ba depan Aku, Jehovah.
5 “Ambi tepung ti alus lalu gaga 12 tuku roti ti segala baka gelang. Roti nya patut dipanggang. Tiap iti tuku roti nya patut digaga ngena dua kilogram* tepung ti alus. 6 Tusun semua roti nya ba atas mija ke dilapis ngena emas ti tulin, ke diengkah ba depan Aku, Jehovah. Tusun roti nya nyadi dua begian. Tiap iti begian bisi enam iti tuku roti ke ditusun belapis-lapis. 7 Engkahka menyan putih ti tulin ba atas dua iti tugung roti nya. Udah nya, tunu menyan putih nya kena nandaka semua roti nya udah diserahka ngagai Aku, Jehovah. 8 Ba tiap Hari Sabat, roti-roti mesti diengkah ba depan Aku, Jehovah. Tu meh sempekat ti meruan belama iya entara Aku enggau orang Israel. 9 Roti nya deka diempu Aron enggau bala anak lelaki iya. Sida patut makai nya ba endur ti kudus, laban roti nya utai ti pemadu kudus ke diambi ari pemeri ke ditunu ke Aku, Jehovah. Atur tu patut seruran dititihka sida.”
10 Ba bala orang Israel, bisi siku lelaki. Indai iya orang Israel, lalu apai iya orang Ejip. Lelaki nya belaya enggau siku lelaki orang Israel ba kem. 11 Anak lelaki indu nya belabuh ngenyaika nama Petara, lalu nyumpah Petara. Nya alai, sida mai iya ngagai Moses. Nama indai iya Selomit, anak indu Dibri, ari raban bansa Dan. 12 Lelaki nya ditan orang Israel nyentukka sida bulih pemutus ari Jehovah.
13 Ku Jehovah madah ngagai Moses: 14 “Bai orang ke nyumpah Aku ngagai luar kem. Semua orang ke bisi ninga iya nyumpah Aku patut ngengkahka jari sida ba atas pala iya. Udah nya, semua orang patut nuku iya ngena batu. 15 Nuan patut madah ngagai orang Israel: ‘Barang sapa ke nyumpah Petara, orang nya deka betanggungjawapka penyalah diri. 16 Orang ke ngenyaika nama Aku, Jehovah, mesti dibunuh. Semua orang mesti nuku iya ngena batu. Enda ngira orang nya orang Israel tauka orang asing ke diau enggau kita, iya mesti dibunuh enti iya ngenyaika nama Aku.
17 “‘Barang sapa ke munuh orang bukai, orang nya mesti dibunuh. 18 Barang sapa ke munuh jelu tupi orang bukai, orang nya mesti mayar ganti rugi, iya nya jelu ganti jelu.* 19 Enti siku ari kita ngemediska orang bukai nyentukka orang nya bakal, iya mesti nerima balasan ti sama, baka ke udah dikereja iya ngagai orang nya. 20 Patah tulang ganti patah tulang. Mata ganti mata. Ngeli ganti ngeli. Iya mesti nerima balasan ti sama. Pemedis ti dikereja iya ngagai orang, deka dikereja ngagai iya empu. 21 Barang sapa ke munuh jelu, orang nya mesti mayar ganti rugi. Tang barang sapa ke munuh orang bukai, orang nya mesti dibunuh.
22 “‘Semua kita, enda ngira orang Israel tauka orang asing, deka diakim enggau chara ti sama, laban Aku tu Jehovah, Petara kita.’”
23 Moses lalu madahka pesan nya ngagai orang Israel. Orang Israel pan lalu ngereja utai ke diasuh Jehovah nengah Moses. Sida lalu mai lelaki ke nyumpah Petara nya ngagai luar kem, lalu nuku iya ngena batu.