Ulang Adat

4 “O Israel, pendingka tu lalu titihka adat enggau atur ke diajar aku ngagai kita, ngambika kita ulih idup lalu diau ba menua ke deka diberi Jehovah ngagai kita, Petara aki ini kita. 2 Anang nambahka utai ngagai pesan ke dipadah aku ngagai kita, lalu anang muai utai ari pesan nya. Titihka meh pesan Jehovah, Petara kita, ti dipadahka aku ngagai kita.

3 “Kita empu udah meda utai ke dikereja Jehovah ngagai sida ke nyembah Baal ba Peor. Tiap iku orang ke nyembah Baal ba Peor udah dibunuh Jehovah, Petara kita. 4 Tang kita ke setia ngagai Jehovah, Petara kita, mengkang idup sampai seharitu. 5 Aku udah ngajar kita adat enggau atur baka ke udah diasuh Jehovah, Petara aku, ngambika kita ulih nitihka semua nya ba endur alai kita deka diau. 6 Kita mesti enggau naka ulih nitihka semua nya, laban orang bukai ke ninga pasal semua atur nya deka meda kita bisi penemu-dalam sereta ulih meretika utai, lalu sida deka nyebut: ‘Bansa ti besai tu endang bansa ti bisi penemu-dalam sereta ulih meretika utai.’ 7 Nadai bansa bukai ke ulih dibandingka enggau bansa kitai. Petara sida enda semak enggau sida. Tang Jehovah, Petara kitai, semak enggau kitai tiap kali kitai besampi ngagai Iya. 8 Kati bisi bansa bukai ngembuan adat enggau atur ti adil, baka Adat ke dipadahka aku ngagai kita seharitu?

9 “Bejimat kita. Tentuka kita seruran ingatka utai ke udah dipeda kita. Simpan meh semua pekara nya dalam ati kita seumur idup, lalu padahka meh pekara nya ngagai bala anak enggau bala uchu kita. 10 Maya kita bediri ba depan Jehovah, Petara kita, ba Horeb, ku Jehovah bejaku ngagai aku: ‘Gempuruka bansa tu. Aku deka sida mendingka jaku Aku ngambika sida ulih belajar nangika Aku seumur idup, lalu ngambika sida ulih ngajar bala anak sida.’

11 “Nya alai, semua kita datai lalu bediri ba kaki gunung. Maya nya, gunung mau laban api, lalu api nya sampai ke langit. Ba dia mega bisi pemetang enggau mua hari ti chelum. 12 Udah nya, Jehovah bejaku ngagai kita ari dalam api nya. Lebuh Iya bejaku, kita ulih ninga nyawa Iya, tang kita enda ulih meda Iya. 13 Iya lalu madahka sempekat Iya ngagai kita, ke diasuh Iya titihka kita, iya nya Sepuluh Pesan. Udah nya, Iya nuliska pesan nya ba dua iti lampang batu. 14 Maya nya, Jehovah ngasuh aku ngajar kita adat enggau atur Iya, ke mesti dititihka kita ba menua ke deka alai kita diau.

15 “Ba hari Jehovah bejaku enggau kita ari dalam api ba Horeb, kita nadai meda nama-nama utai dalam api nya. Nya alai, bejimat kita 16 ngambika kita enda ngereja pengawa ti jai, baka ngaga patung tauka nama-nama lambang, sekalika nya baka lelaki tauka indu, 17 tauka baka jelu ba darat, tauka baka burung ba langit, 18 tauka baka jelu ke ngerayap, tauka baka ikan ba dalam ai. 19 Lebuh kita malik ke langit lalu meda mata panas, bulan, bintang, enggau semua utai ke ba langit, anang tetarit ati deka besugang lalu nyembah semua utai nya. Jehovah, Petara kita, udah meri semua utai nya ngagai bansa bukai ba baruh langit. 20 Tang, Jehovah udah mai kita pansut ari menua Ejip, endur kita balat merinsa baka ke ba dalam serumbung api kena nganchurka besi, ngambika kita nyadi nembiak ke diempu Iya* baka ke seharitu.

21 “Jehovah ringat ngagai aku ketegal kita, lalu Iya besumpah madahka aku enda tau meraka Sungai Jordan tauka tama ngagai menua ti manah nya, ke udah diberi Jehovah ngagai kita nyadika pesaka. 22 Ba menua tu meh alai aku deka mati. Aku enda enggau kita meraka Sungai Jordan. Tang kita deka meraka sungai nya, lalu diau ba menua ti manah nya. 23 Anang enda ingatka sempekat ke udah digaga Jehovah enggau kita, lalu anang ngaga patung nunda gamal nama-nama utai, baka ke ditagang Jehovah, Petara kita. 24 Laban Jehovah, Petara kita, baka api ke nganguska utai abis lengis, lalu Iya dekaka orang nyembah Iya siku aja.

25 “Enti kita udah lama diau ba menua nya, lalu kita udah bisi anak enggau uchu, anang ngaga patung nunda gamal nama-nama utai tauka ngereja utai ti jai ba mata Jehovah, ke ngasuh Iya ringat. Enti kita ngereja nya, 26 kita tentu deka dipunaska tekala nya. Seharitu, langit enggau dunya deka nyadi saksi. Enti kita ngereja nya, kita enda ulih diau lama ba menua ke deka alai kita diau, iya nya ba seberai Sungai Jordan nya. 27 Jehovah deka ngachirka kita ba entara bansa-bansa bukai. Pengudah Jehovah muru kita, semina mimit aja ari kita deka idup. 28 Ba dia, kita deka nyembah petara ke digaga mensia ngena kayu enggau batu. Petara nya enda ulih meda, enda ulih ninga, enda ulih makai tauka nyium utai.

29 “Tang enti kita ngiga Jehovah, Petara kita, ari endur nya enggau pengabis ati kita sereta enggau pengabis pengidup kita, kita tentu deka tetemuka Iya. 30 Dudi hari, lebuh semua utai nya nyadi ba kita lalu kita balat tusah, kita deka pulai baru ngagai Jehovah, Petara kita, lalu ngasika Iya. 31 Laban Jehovah, Petara kita nya, Petara ti kasih. Iya enda ninggalka kita tauka ngelakka kita mati. Iya mega deka ingatka sempekat ke udah digaga Iya enggau bala aki ini kita.

32 “Perundingka utai ke udah nyadi dulu kelia sebedau kita ada. Peratika ari ujung langit siti ngagai ujung langit ke bukai. Kala utai ti ngalitka ati tu nyadi, kenyau ari Petara ngaga mensia ba dunya? Kati bisi orang udah kala ninga utai ke baka tu? 33 Kati bisi bansa bukai ke mengkang idup baka kita pengudah ninga Petara bejaku ari dalam api? 34 Kati Petara kala mai siti bansa pansut ari bansa bukai, baka ke udah digaga Iya ngagai kita ba menua Ejip? Petara udah ngena mayuh tanda, penguji, utai ti luar biasa, perang, enggau utai ti balat ngenakutka, nyadi ba depan mata kita. Jehovah, Petara kita, udah ngena jari Iya ti kering sereta bekuasa mai kita pansut. 35 Semua utai nya nyadi ba depan kita ngambika kita nemu, Jehovah meh Petara ti bendar. Nadai Petara bukai kelimpah ari Iya. 36 Iya ngasuh kita ninga nyawa Iya ari serega ngambika Iya ulih ngemetulka kita. Iya ngasuh kita meda api Iya ti besai ba dunya, lalu kita ningaka jaku Iya ari dalam api nya.

37 “Ketegal Iya sayauka bala aki ini kita, lalu udah milih peturun sida nyadika nembiak Iya, Iya mai kita pansut ari menua Ejip ngena kuasa Iya ti besai. 38 Iya udah muru bansa ti kering sereta mayuh agi ari kita ngambika Iya ulih mai kita ngagai menua sida lalu meri menua nya ngagai kita nyadika pesaka, baka ke nyadi seharitu. 39 Nya alai seharitu, kingatka, nadai petara bukai ke ba serega enggau ba dunya. Semina Jehovah aja Petara ti bendar. 40 Kita mesti nitihka atur enggau pesan Petara ke dipadahka aku ngagai kita seharitu, ngambika kita enggau bala peturun kita ulih idup lantang lalu ulih diau lama ba menua ke diberi Petara kita, Jehovah, ngagai kita.”

41 Maya nya suba, Moses milih tiga iti kuta ba begian timur Sungai Jordan. 42 Enti sesiku orang enda sengaja munuh orang bukai, lalu iya enda begedika orang nya, iya patut ngerarika diri ngagai siti ari kuta nya ngambika iya enda dibunuh. 43 Kuta Beser ba menua puang ke ba kawasan tanah tinggi ti rata, diberi ngagai raban bansa Reuben. Kuta Ramot ba Gilead diberi ngagai raban bansa Gat, lalu kuta Golan ba Basan diberi ngagai raban bansa Manasi.

44 Moses meri Adat ngagai orang Israel. 45 Pengudah orang Israel pansut ari menua Ejip, Moses meri sida adat enggau atur. Iya mega madahka utai ke patut dikingatka sida. 46 Maya nya, sida semak Sungai Jordan, ba lebak seberai Bet-peor, ba menua Raja Sihon, iya nya orang Amor ke diau ba Hesbon. Moses enggau orang Israel udah ngalahka raja nya pengudah sida pansut ari menua Ejip. 47 Udah nya, sida ngambi menua nya enggau menua Raja Og ari Basan. Menua ke dipegai kedua-dua iku raja orang Amor nya, ba begian timur Sungai Jordan. 48 Berengkah ari Aroer ke ba tisi Lebak* Arnon, nyentuk ngagai Gunung Sion, iya nya Gunung Hermon. 49 Menua nya mega nyengkaum serata kawasan Arabah, ke ba begian timur Sungai Jordan nyentuk ngagai Tasik Arabah* enggau ba baruh Lereng Pisgah.