Ulang Adat

11 “Kita mesti rinduka Jehovah, Petara kita, sereta seruran ngereja utai ke diasuh Iya. Kita mesti nitihka pesan, adat, enggau atur ke diberi Iya. 2 Kita nemu, seharitu aku ukai bejaku ngagai bala anak kita, tang bejaku ngagai kita. Bala anak kita nadai kala ngasaika disiplin ari Jehovah, sereta enda kala meda utai ti luar biasa ke dikereja Iya ngena jari Iya ti kering sereta bekuasa. 3 Sida nadai kala meda tanda enggau utai ti luar biasa ke dikereja Iya ngagai Firaun sereta ngagai serata menua Ejip. 4 Sida mega nadai kala meda utai ke udah dikereja Iya ngagai bala soldadu Ejip, bala kuda, sereta kerita perang Firaun ke tengelam ba Tasik Mirah lebuh orang Ejip begagaika kita. Maya nya, Jehovah ngemunaska semua sida abis lengis. 5 Sida pan nadai meda utai ke udah dikereja Iya ke kita ba menua puang nyentukka kita datai ba ditu. 6 Bala anak kita mega nadai meda utai ke udah dikereja Iya ngagai Datan enggau Abiram, iya nya bala anak Eliap, ari raban bansa Reuben. Ba depan semua orang Israel, tanah merekah lalu nelan seduai iya, ruang bilik seduai iya, langkau kain seduai iya, jelu tupi seduai iya, sereta semua orang ke nitihka seduai iya. 7 Kita empu udah meda semua utai ti luar biasa ke udah dikereja Jehovah.

8 “Kita mesti nitihka semua pesan ke dipadahka aku ngagai kita seharitu, ngambika kita nyadi bansa ti kuat lalu ulih tama ngagai menua ke deka diempu kita. 9 Kelimpah ari nya, kita ulih idup lama ba menua ke udah disemayaka Jehovah ngagai aki ini kita sereta ngagai peturun sida, iya nya menua ke kaya enggau ai tusu sereta madu.

10 “Menua ke deka diempu kita nya enda baka menua Ejip, ke kala alai kita diau suba. Ba Ejip, lebuh kita nanam leka benih, kita patut bebendar mai ai ngagai utai ke ditanam kita,* baka ke manjah ai ba kebun sayur. 11 Tang, menua ke deka diempu kita nya menua ke bisi mayuh gunung sereta kawasan lebak ti rata. Menua nya mega seruran bisi ujan. 12 Jehovah, Petara kita, deka nyaga menua nya. Jehovah deka seruran ngemataka menua nya sepemanjai taun.

13 “Enti kita bebendar ngasika pesan ke dipadahka aku ngagai kita seharitu, lalu pia mega enti kita rinduka Jehovah, Petara kita, lalu nyembah Iya enggau pengabis ati kita sereta enggau pengabis pengidup kita, 14 Iya* deka ngasuh hari ujan ba menua kita ba maya ti ngena, iya nya maya musin ruruh enggau musin bungai. Enggau nya, kita mega deka ngumpul bijirin, minyak, enggau wain ti baru. 15 Iya deka ngasuh rumput tumbuh ba ladang endur kita nupi jelu. Kita mega deka makai sampai puas. 16 Tang bejimat, ngambika kita enda limpang lalu tetarit ati deka besugang sereta nyembah petara-petara bukai. 17 Enti kita nyembah petara-petara bukai, Jehovah deka balat ringat ngagai kita. Iya deka nutup langit ngambika hari enda ujan, lalu tanah enda ulih mansutka asil. Kita deka jampat mati ba menua ti manah ke diberi Jehovah ngagai kita.

18 “Kita mesti nyimpan jaku ke dipadahka aku ngagai kita dalam ati enggau runding kita. Tanchangka jaku nya ba lengan kita sereta ba kening kita kena ngingatka kita. 19 Ajar semua nya ngagai bala anak kita. Kita patut bejaku pasal semua nya lebuh kita ba rumah, lebuh kita bejalai, lebuh kita gali, enggau lebuh kita dani. 20 Tuliska semua nya ba bingkai pintu rumah kita enggau ba pintu penama kuta kita, 21 ngambika kita enggau bala anak kita ulih idup lama ba menua ke udah disemayaka Jehovah ngagai aki ini kita. Kita deka diau dia seagi-agi langit ba atas dunya.

22 “Enti kita bebendar nitih sereta ngereja semua pesan ke dipadah aku ngagai kita, lalu enti kita rinduka Petara kita, Jehovah, nitihka semua jalai Iya lalu bepegai rat ba Iya, 23 kita deka mujur ngalahka bansa ti kering sereta besai agi ari kita, laban Jehovah deka muru sida ari kita. 24 Semua endur ke ditengah kita deka diempu kita. Sempadan menua kita deka berengkah ari menua puang nyentuk ngagai Lebanon, lalu ari Sungai Eupratis nyentuk ngagai Tasik Tengah.* 25 Nadai siku pan orang ulih ngalahka kita. Jehovah, Petara kita, deka ngasuh semua orang ke diau ba menua ke ditengah kita takutka kita, baka ke udah disemaya Iya ngagai kita.

26 “Seharitu, aku deka kita milih entara berekat tauka sumpah. 27 Kita deka bulih berekat enti kita ngasika semua pesan Jehovah ke dipadahka aku ngagai kita. 28 Tang enti kita enggai ngasika semua pesan Jehovah, Petara kita, lalu limpang ari jalai ke diasuh aku titihka kita, sereta nyembah petara-petara bukai ke enda dikelala kita, kita deka ditinggang sumpah.

29 “Lebuh Jehovah, Petara kita, mai kita ngagai menua ke deka diempu kita, kita mesti madahka berekat ba Gunung Gerisim lalu madahka sumpah ba Gunung Ebal. 30 Kedua-dua gunung nya ba seberai Sungai Jordan ba sepiak barat, iya nya ba menua orang Kanaan ke diau ba Arabah. Kedua-dua gunung nya ba depan Gilgal, semak enggau pun kayu ti besai ba Moreh. 31 Kita deka meraka Sungai Jordan, ngambika kita ulih tama lalu ngempu menua ke deka diberi Jehovah ngagai kita. Pengudah kita ngambi menua nya lalu diau ba dia, 32 kita mesti bebendar nitihka semua atur enggau adat ke dipadahka aku ngagai kita seharitu.