Ulang Adat
17 “Anang nyerahka sapi tauka bedus ke bisi penimpang nyadika pemeri ngagai Jehovah, Petara kita, laban Jehovah, Petara kita, amat begedika utai ke baka nya.
2 “Ba siti ari kuta ke diberi Petara kita, Jehovah, ngagai kita, engka bisi lelaki tauka indu ke ngelanggar sempekat Jehovah, lalu ngereja utai ti jai ba mata Iya. 3 Engka orang nya nyembah tauka besugang ngagai petara-petara bukai, tauka besugang ngagai mata panas, tauka bulan, tauka nama-nama utai ke ba langit, iya nya utai ke enda kala diasuh aku kereja kita. 4 Enti bisi orang madah ngagai kita pasal pekara nya tauka kita bisi ninga pasal pekara nya, kita patut mansik pekara nya enggau silik. Enti utai jai nya amat udah nyadi ba menua Israel, 5 kita mesti mai lelaki tauka indu ke udah ngereja utai ti jai nya ngagai pintu penama kuta, lalu nikau iya ngena batu sampai iya mati. 6 Orang nya semina tau diukum mati enti bisi penerang ari dua tauka tiga iku saksi. Orang nya enda tau diukum mati enti semina siku aja saksi ke meri penerang. 7 Bala saksi nya meh ke patut dulu agi ari orang bukai nikau orang nya ngena batu. Udah nya, orang bukai deka nikau orang nya ngena batu sampai iya mati. Kita mesti muai utai ti jai ari bala kita.
8 “Enti bisi pekara ti kelalu tusah diputarka ba siti ari kuta kita, sekalika nya pekara pasal munuh orang, pasal hak bempu pesaka, pasal pengawa ti ganas, tauka pekara bukai, kita mesti ngagai endur ke udah dipilih Jehovah, Petara kita. 9 Kita mesti betemu enggau bala imam Lewi enggau hakim ke bekereja maya nya. Bantaika pekara kita ngagai sida, lalu sida deka meri pemutus pasal pekara nya ngagai kita. 10 Udah nya, kita mesti nitihka pemutus ke udah diberi sida ba endur ke udah dipilih Jehovah. Tentuka kita ngereja semua utai ke udah diasuh sida. 11 Kita mesti ngereja utai nitihka atur ke udah diajar sida ngagai kita, sereta nitihka pemutus ke udah diberi sida ngagai kita. Anang limpang ari pemutus ke udah diberi sida. 12 Orang ke degil sereta enggai mendingka imam tauka hakim ke gawa ke Petara kita, Jehovah, mesti diukum mati. Kita mesti muai utai ti jai ari Israel. 13 Semua orang Israel deka ninga pasal nya lalu nyadi takut. Enggau nya, sida enda agi berani ngereja utai ke baka nya.
14 “Pengudah kita tama ngagai menua ke diberi Petara kita, Jehovah, ngagai kita, lalu kita udah ngempu menua nya sereta diau dia, kita engka bejaku: ‘Kami deka ngelantik siku raja kena merintah kami baka bansa bukai ke ngelingi kami.’ 15 Enti pia, kita mesti ngelantik siku raja ke dipilih Jehovah, Petara kita. Kita mesti ngelantik siku raja ari bansa kita empu. Kita enda tau ngelantik orang asing nyadika raja kita. 16 Tang, raja nya enda tau bisi mayuh kuda tauka ngasuh orang pulai baru ngagai menua Ejip ngulihka mayuh agi kuda, laban Jehovah udah bejaku: ‘Kita enda tau pulai baru ngagai menua Ejip.’ 17 Iya mega enda tau bisi mayuh bini ngambika ati iya enda limpang ari Aku. Iya pan enda tau bisi mayuh pirak enggau emas. 18 Lebuh iya nyadi raja, Adat ke disimpan bala imam Lewi mesti dikupi iya dalam siti bup.*
19 “Bup nya enda tau jauh ari iya, lalu iya mesti macha bup nya seumur idup. Enggau nya, iya deka belajar nangika Petara iya, Jehovah, sereta nitihka semua Adat enggau atur nya. 20 Enti iya ngereja nya, iya tentu enda ngeninggika diri lebih ari bala menyadi iya, lalu iya mega enda limpang ari semua pesan nya. Enggau nya, iya enggau bala peturun iya ulih lama nyadi raja merintah Israel.