1 Raja

1 Raja David nyau tuai amat. Taja pan iya dibungkur ngena pua, tang iya agi berasai chelap. 2 Nya alai, bala pegawai iya bejaku enggau iya: “Tuan raja, awakka kami ngiga siku indu dara ke tuan ngambika iya nyaga sereta ngintu tuan. Iya deka gali ngimbai tuan ngambika tubuh tuan angat.” 3 Nya alai, sida ngagai serata menua Israel ngiga siku indu ke bajik. Sida lalu tetemuka Abisak, indu ari Sunem. Udah nya, sida pan mai iya ngagai raja. 4 Indu nya amat bajik. Iya nyaga sereta ngintu raja, tang raja enda tinduk* enggau iya.

5 Maya nya, Adonijah anak Hagit enggau sumbung madah: “Aku tentu deka nyadi raja.” Iya nyediaka siti kerita kuda enggau bala orang ke nepan kuda ke iya empu. Iya mega ngasuh 50 iku orang belanda ba depan iya. 6 Tang, apai iya enda kala ngerara iya.* Apai iya nadai kala nanya: “Nama kebuah nuan ngereja nya?” Adonijah mega amat sigat, lalu iya ada pengudah Absalom. 7 Adonijah minta penemu ari Joap anak Seruyah enggau ari Imam Abiatar. Seduai iya nyukung sereta nulung Adonijah. 8 Tang Imam Sadok, Benayah anak Jehoyada, Nabi Natan, Shimei, Rei, enggau bala soldadu David ke kering, enda nyukung Adonijah.

9 Adonijah nyerahka bedus, sapi, enggau jelu ti gemu, ba Batu Sohelet ke semak En-rogel, nyadika pemeri ke Petara. Iya mai semua anak lelaki raja, iya nya bala menyadi iya, sereta semua pegawai raja ari Judah. 10 Tang iya enda mai Nabi Natan, Benayah, bala soldadu David ke kering, tauka menyadi iya, Solomon. 11 Natan lalu bejaku enggau Bat-sheba, indai Solomon: “Kati kuin bisi ninga pasal Adonijah anak Hagit ke udah nyadi raja? Kati tuan raja kitai, David, nemu pasal tu? 12 Nya alai, pendingka meh utai ke dipadahka ulun nuan tu, ngambika kuin enggau Solomon, anak kuin, ulih selamat. 13 Betemu meh enggau Raja David, lalu padahka ngagai tuan: ‘Ukai enda tuan raja udah besumpah ngagai aku, anak aku Solomon deka nyadi raja nganti tuan, lalu iya meh ke deka duduk ba kerusi diraja tuan? Tang diatu, nama kebuah nyau Adonijah ke nyadi raja?’ 14 Lebuh kuin agi bejaku enggau raja, aku deka tama lalu madah ngagai raja utai ti sama.”

15 Bat-sheba lalu mansang betemu enggau raja dalam bilik raja. Raja udah tuai amat, lalu iya diintu Abisak, indu ari Sunem. 16 Bat-sheba besugang ba depan raja. Raja lalu nanya: “Nama utai ti dikedekaka nuan?” 17 Ku Bat-sheba nyaut: “Tuan raja udah besumpah ngagai aku dalam nama Jehovah, Petara tuan, anak aku, Solomon, deka nyadi raja nganti tuan, lalu iya meh ke deka duduk ba kerusi diraja tuan. 18 Tang diatu, Adonijah ke nyadi raja, lalu tuan enda nemu pasal utai nya. 19 Iya nyerahka mayuh sapi lelaki, jelu ti gemu, enggau bedus ngagai Petara. Iya mai semua anak lelaki raja, Imam Abiatar, enggau Joap, ketuai soldadu tuan. Tang iya enda mai Solomon, anak tuan. 20 Tuan raja, diatu semua orang Israel benung nganti tuan madahka sapa ke deka nganti tuan duduk ba kerusi diraja tuan. 21 Enti enda, pengudah tuan nadai* ila, aku enggau anak aku, Solomon, deka dikumbai orang munsuh.”

22 Lebuh Bat-sheba benung bejaku enggau raja, Nabi Natan pan datai. 23 Orang lalu tekala nya madah ngagai raja: “Nabi Natan udah datai!” Natan mansang ngagai raja lalu besugang ba depan iya. 24 Natan lalu madah: “Tuan raja, kati tuan bisi madah, Adonijah ke deka nyadi raja nganti tuan lalu duduk ba kerusi diraja tuan? 25 Seharitu, iya nyerahka mayuh sapi lelaki, jelu ti gemu, enggau bedus ngagai Petara. Iya mai semua anak lelaki raja, bala ketuai soldadu, enggau Imam Abiatar. Sida makai ngirup enggau iya, lalu sida enda ngetu nyebut: ‘Idup Raja Adonijah!’ 26 Tang iya enda mai aku, Imam Sadok, Benayah anak Jehoyada, tauka Solomon, anak tuan raja. 27 Kati tuan raja udah ngemendarka pengawa nya? Tuan raja bedau madah ngagai aku pasal sapa ke deka nyadi raja nganti tuan, lalu duduk ba kerusi diraja tuan.”

28 Ku Raja David nyaut: “Kangauka Bat-sheba.” Bat-sheba pan tama lalu bediri ba depan raja. 29 Udah nya, raja besumpah: “Aku besumpah atas nama Jehovah, Petara ti idup, ke nyelamatka aku ari semua penusah. 30 Seharitu, aku deka ngamatka jaku sumpah aku ngagai nuan ke digaga aku dalam nama Jehovah, Petara orang Israel. Anak nuan, Solomon, deka nyadi raja nganti aku, lalu iya meh ke deka duduk ba kerusi diraja aku!” 31 Bat-sheba lalu besugang ba depan raja, lalu bejaku: “Awakka tuan Raja David, idup belama iya!”

32 Udah nya, Raja David bejaku: “Kangauka Imam Sadok, Nabi Natan, enggau Benayah anak Jehoyada.” Nya alai, sida pan datai betemu enggau raja. 33 Raja bejaku ngagai sida: “Bai bala pegawai aku enggau kita, lalu gaga atur ngambika anak aku, Solomon, nepan baghal* aku empu. Udah nya, bai iya ngagai Gihon. 34 Ba din, Imam Sadok enggau Nabi Natan deka nata iya nyadi raja orang Israel. Udah nya, sepu terumpit* lalu sebut enggau inggar: ‘Idup Raja Solomon!’ 35 Udah nya, bai iya pulai kitu. Iya deka nganti aku nyadi raja, lalu duduk ba kerusi diraja aku. Aku deka ngelantik iya nyadi tuai Israel enggau Judah.” 36 Benayah anak Jehoyada lalu nyaut raja: “Amin!* Awakka Jehovah, Petara tuan raja, ngamatka utai ke disebut tuan raja. 37 Baka Jehovah ke udah enggau tuan raja, awakka Iya mega enggau Solomon, lalu ngasuh perintah Solomon besai agi ari perintah tuan Raja David.”

38 Nya alai, Imam Sadok, Nabi Natan, Benayah anak Jehoyada, orang Kereti, enggau orang Peleti, mupuk lalu ngatur ngambika Solomon nepan baghal Raja David. Udah nya, sida mai iya ngagai Gihon. 39 Imam Sadok ngambi tanduk ke diisi enggau minyak ari langkau kain* lalu nata Solomon ngena minyak nya. Udah nya, sida nyepu terumpit lalu semua orang manjung magang: “Idup tuan Raja Solomon!” 40 Semua orang lalu nitihka Raja Solomon sambil nyepu kesuling sereta rami gaga ati. Sida inggar amat nyentukka tanah nyau begegar.

41 Adonijah enggau semua orang ke dibai iya ninga bunyi ke inggar nya pengudah sida tembu makai. Lebuh Joap ninga munyi terumpit, iya lalu nanya: “Nama kebuah orang ba kuta inggar amat?” 42 Lebuh iya agi benung bejaku, Jonatan anak Abiatar lalu datai. Udah nya, ku Adonijah: “Tama meh. Nuan orang ke manah. Nuan tentu mai berita ti manah.” 43 Tang ku Jonatan nyaut: “Enda! Tuan kitai, Raja David, udah ngelantik Solomon nyadi raja. 44 Raja David ngasuh Imam Sadok, Nabi Natan, Benayah anak Jehoyada, orang Kereti, enggau orang Peleti, mupuk enggau Solomon. Sida ngasuh iya nepan baghal raja. 45 Imam Sadok enggau Nabi Natan nata iya nyadi raja ba Gihon. Udah nya, semua orang mupuk ari endur nya gaga ati nyentukka kuta nya rami amat. Nya meh bunyi ke didinga kita tadi. 46 Diatu, Solomon udah duduk ba kerusi diraja. 47 Nambahka nya, bala pegawai raja udah datai meri jaku puji* ngagai Raja David. Ku sida: ‘Awakka Petara tuan raja ngasuh nama Solomon tebilang agi ari nama tuan raja. Awakka Iya ngasuh perintah Solomon besai agi ari perintah tuan raja!’ Maya nya, raja ba atas katil iya lalu ngendukka pala. 48 Ku raja: ‘Awakka Jehovah, Petara orang Israel, dipuji! Seharitu, Nuan udah ngelantik siku orang duduk ba kerusi diraja aku, lalu Nuan udah ngasuh aku meda utai nya nyadi!’”

49 Semua sida ke enggau Adonijah takut magang. Sida mupuk ninggalka endur nya. 50 Adonijah mega takutka Solomon. Nya alai, iya mansang ngagai alta* lalu bepegai ba tanduk alta. 51 Bisi orang madah ngagai Solomon: “Adonijah takutka tuan Raja Solomon. Iya bepegai ba tanduk alta lalu madah: ‘Aku ka Raja Solomon besumpah dulu, iya enda munuh aku ngena pedang iya.’” 52 Ku Solomon nyaut: “Enti ulah iya manah, nadai selambar pan buk iya deka labuh ke tanah. Tang enti ulah iya jai, iya deka dibunuh.” 53 Raja Solomon lalu ngasuh orang mai Adonijah nurun ari alta nya. Udah nya, Adonijah datai lalu besugang ba depan Solomon. Ku Solomon: “Alai meh nuan pulai.”