1 Raja
2 Lebuh David nyauka mati, iya meri pesan tu ngagai anak iya, Solomon: 2 “Enda lama agi, aku deka mati. Nuan mesti kering sereta berani. 3 Nuan mesti ngasika Jehovah, Petara nuan. Titihka jalai Iya, lalu pendingka adat Iya, pesan Iya, atur Iya, sereta utai ke patut dikingatka kita ke udah diberi Iya baka ke ditulis dalam Adat Moses. Enggau nya, nuan deka mujur* dalam semua utai ti dikereja nuan enda ngira dini alai nuan. 4 Jehovah udah besemaya ngagai aku: ‘Enti bala peturun nuan beratika pengidup diri empu, lalu setia nitihka jalai Aku enggau pengabis ati sereta enggau pengabis pengidup, peturun nuan deka seruran duduk ba kerusi diraja Israel.’ Au, Petara tentu ngamatka semaya Iya.
5 “Nuan mega nemu utai ke digaga Joap anak Seruyah ngagai aku. Iya munuh dua iku ketuai soldadu Israel, iya nya Abner anak Ner enggau Amasa anak Jeter. Iya munuh seduai iya taja pan maya nya ukai maya beperang, lalu iya ngamahka tali pinggang enggau selipar iya ngena darah seduai iya. 6 Nuan mesti pintar. Anang ngelakka iya idup lantang sampai tuai lalu mati enggau tenang.
7 “Tang ayanka pengerindu ti setia ngagai bala anak Barsilai, orang Gilead nya. Sida patut seruran makai semija enggau nuan, laban sida udah nyukung aku lebuh aku ngerarika diri ari menyadi nuan, Absalom.
8 “Perundingka mega Shimei anak Gera, iya nya orang Benjamin ari Bahurim. Iya udah balat nyumpah aku lebuh aku ba rantau jalai mansang ngagai Mahanaim. Tang, lebuh iya betemu enggau aku ba Sungai Jordan, aku besumpah dalam nama Jehovah, madahka diri enda munuh iya ngena pedang. 9 Anang nejuka iya enda diukum. Nuan pintar lalu nuan nemu utai ke patut digaga. Anang ngelakka iya idup lantang sampai tuai lalu mati enggau tenang.”
10 Udah nya, David mati* lalu dikuburka ba Kuta David. 11 David udah merintah Israel pengelama 40 taun. Ba Hebron, iya merintah pengelama tujuh taun, lalu ba Jerusalem, iya merintah pengelama 33 taun.
12 Solomon duduk ba kerusi diraja apai iya, David, lalu perintah iya majak tegap.
13 Pengudah siti timpuh, Adonijah anak Hagit datai betemu enggau Bat-sheba, indai Solomon. Ku Bat-sheba nanya: “Kati nuan datai enggau tuju ti manah?” Ku Adonijah nyaut: “Au.” 14 Ku iya agi: “Bisi utai ka dipadah aku ngagai indai.” Ku Bat-sheba: “Padah meh.” 15 Ku Adonijah: “Indai nemu, enti nitihka, aku ke patut nyadi raja, lalu semua orang Israel pan nemu. Tang nyau menyadi aku ke nyadi raja, laban Jehovah udah meri penuduk nya ngagai iya. 16 Diatu, aku bisi utai ke dipinta. Enti ulih beri meh utai ke dipinta aku.” Ku Bat-sheba: “Padah meh.” 17 Ku Adonijah nyaut: “Aku minta indai madah ngagai Raja Solomon ngambika meri aku Abisak, indu ari Sunem, nyadika bini aku. Aku nemu Solomon deka nitihka utai ku indai.” 18 Pengudah ninga nya, Bat-sheba madah: “Au meh, aku deka madahka nya ngagai raja.”
19 Nya alai, Bat-sheba betemu enggau Raja Solomon deka madahka utai ke dipinta Adonijah. Raja pan nyambut penatai indai iya, lalu tunduk ngagai indai iya. Udah nya, Solomon duduk ba kerusi diraja iya, lalu ngasuh orang nyediaka siti agi kerusi diraja ngambika indai iya ulih duduk ba sepiak kanan iya. 20 Ku Bat-sheba: “Bisi utai dipinta aku ari nuan. Enti ulih, beri meh utai ke dipinta aku.” Ku Solomon: “Padah meh indai. Nadai aku nulak utai ke dipinta indai.” 21 Ku Bat-sheba nyaut: “Beri meh Abisak, indu ari Sunem nya ngagai menyadi nuan, Adonijah, nyadika bini.” 22 Udah nya, Raja Solomon nyaut: “Nama kebuah indai minta aku meri Abisak, indu ari Sunem nya ngagai Adonijah? Manah agi indai minta aku meri kerusi diraja tu ngagai iya. Iya menyadi tuai aku, lalu Imam Abiatar enggau Joap anak Seruyah nyukung iya.”
23 Raja Solomon besumpah dalam nama Jehovah: “Awakka Petara balat agi ngukum aku, enti Adonijah enda diukum mati ketegal utai ke dipinta iya nya. 24 Iya udah ngasuh aku duduk ba kerusi diraja apai aku, David. Iya mega udah meri perintah tu ke aku sereta ke bala peturun aku,* baka ke udah disemaya Iya. Aku besumpah atas nama Jehovah, Petara ti idup, Adonijah deka diukum mati seharitu.” 25 Raja Solomon lalu nganjung Benayah anak Jehoyada munuh Adonijah. Benayah pan mupuk munuh Adonijah.
26 Ku raja bejaku ngagai Imam Abiatar: “Pulai meh nuan ngagai menua* nuan ba Anatot! Enti nitihka, nuan patut mati, tang aku enda munuh nuan seharitu, laban nuan udah ngesan peti lampang batu Adat Jehovah, Tuan ti Pemadu Tinggi, ba depan apai aku, David. Lalu nuan mega udah sama enggau apai aku napi semua penusah.” 27 Nya alai, Solomon muru Abiatar, lalu Abiatar enda agi gawa nyadi imam Jehovah. Lalu tu ngamatka utai ke udah disebut Jehovah ba Siloh pasal Eli enggau bala peturun iya.
28 Lebuh Joap ninga pasal nya, iya pan ngerarika diri ngagai Langkau Sembiang Jehovah lalu bepegai rat ba tanduk alta. Ngelama tu, Joap udah nyukung Adonijah, tang enda nyukung Absalom. 29 Udah nya, bisi orang madah ngagai Raja Solomon: “Joap udah ngerarika diri ngagai Langkau Sembiang Jehovah, lalu diatu iya bisi ngimbai alta.” Nya alai, Solomon nganjung Benayah anak Jehoyada, lalu madahka: “Alai, bunuh iya!” 30 Benayah lalu mansang ngagai Langkau Sembiang Jehovah, lalu bejaku enggau Joap: “Raja ngasuh nuan pansut!” Ku Joap nyaut: “Enggai aku! Aku ka mati ditu.” Nya alai, Benayah pulai baru ngagai raja lalu madah ngagai raja pasal utai ke disebut Joap. 31 Ku raja nyaut: “Kereja aja utai ku Joap. Bunuh iya lalu kuburka iya. Enggau nya, aku enggau ruang bilik apai aku enda ibuh agi betanggungjawapka darah orang ke nadai penyalah ke udah dibunuh iya. 32 Jehovah deka malas iya laban iya udah munuh dua iku orang ke nadai penyalah sereta ke manah agi ari iya, iya nya Abner anak Ner, ketuai soldadu Israel, enggau Amasa anak Jeter, ketuai soldadu Judah. Lalu apai aku enda nemu pasal pengawa iya nya. 33 Joap enggau peturun iya patut betanggungjawapka pemati seduai iya belama iya. Tang awakka David, bala peturun iya, ruang bilik iya, sereta perintah iya bulih pengelantang ari Jehovah belama iya.” 34 Benayah anak Jehoyada pan mupuk munuh Joap. Joap dikuburka ba menua iya empu, ba menua puang. 35 Udah nya, raja ngelantik Benayah anak Jehoyada nyadi ketuai soldadu nganti Joap, lalu Sadok dilantik nyadi imam nganti Abiatar.
36 Raja ngangauka Shimei, lalu madah ngagai iya: “Gaga siti rumah ke nuan empu ba Jerusalem. Diau meh ba kuta tu, lalu anang ngagai endur bukai. 37 Enti nuan pansut lalu meraka Lebak Kidron, ba hari nya mega nuan tentu deka mati. Nuan empu meh deka betanggungjawapka pemati diri.” 38 Ku Shimei nyaut: “Manah utai ku tuan raja nya. Aku deka nitihka utai ku tuan raja.” Nya alai, Shimei lama diau ba Jerusalem.
39 Tang pengudah tiga taun, dua iku ulun Shimei rari ngagai raja Gat, iya nya Akis anak Maakah. Lebuh Shimei nemu ulun iya nya bisi ba Gat, 40 Shimei lalu nyediaka keledai iya, lalu mansang ngagai Akis ba Gat, ngiga ulun iya. Lebuh Shimei pulai enggau ulun iya, 41 bisi orang madah ngagai Solomon: “Shimei udah pansut ari Jerusalem lalu mupuk ngagai Gat. Diatu iya udah pulai baru.” 42 Nya alai, raja ngangauka Shimei lalu madah ngagai iya: “Ukai enda aku udah ngasuh nuan besumpah dalam nama Jehovah lalu meri jaku tangkan tu ngagai nuan: ‘Enti nuan pansut ngagai endur bukai, ba hari nya mega nuan tentu deka mati’? Nuan pan udah madah: ‘Manah utai ku tuan raja nya. Aku deka nitihka utai ku tuan raja.’ 43 Nyadi, nama kebuah nuan enda ngamatka sumpah nuan ngagai Jehovah, lalu enda nitihka pesan aku?” 44 Ku raja agi: “Nuan empu nemu semua penyai ke udah dikereja nuan ngagai apai aku, David. Diatu, Jehovah deka nuan betanggungjawapka penyai ke udah dikereja nuan. 45 Tang Jehovah deka merekatka aku, Raja Solomon, lalu ngasuh perintah David tegap belama iya.” 46 Pengudah nya, raja ngasuh Benayah anak Jehoyada munuh Shimei, lalu Shimei pan mati.
Baka nya meh Raja Solomon ngasuh perintah iya nyadi tegap.