1 Raja
17 Elijah,* orang Tisbi, ke diau ba Gilead, bejaku ngagai Ahap: “Aku besumpah atas nama Jehovah, Petara ti idup, Petara orang Israel, sereta Petara ke disembah aku, nadai ambun tauka ujan dalam timpuh beberapa taun, nyentuk ngagai maya aku ngasuh utai nya nyadi!”
2 Ku Jehovah bejaku ngagai Elijah: 3 “Mupuk ari endur tu, lalu bejalai tunga ke timur. Belalai meh ba Lebak* Cherit, tunga ke timur Sungai Jordan. 4 Irup meh ai ari sungai. Aku deka ngasuh burung gagak mai pemakai ke nuan ba dia.” 5 Iya mupuk tekala nya lalu ngereja utai ke diasuh Jehovah. Iya diau ba Lebak* Cherit ba timur Sungai Jordan. 6 Ninting pagi enggau lemai, burung gagak mai roti enggau dagin ngagai iya, lalu iya ngulihka ai irup ari sungai ba dia. 7 Tang enda lama udah nya, sungai nya rangkai laban nadai ujan ba menua nya.
8 Ku Jehovah madah ngagai Elijah: 9 “Mupuk nuan ngagai Sarepat, kuta orang Sidon, lalu diau ba din. Aku deka ngasuh siku indu balu ba din nyediaka pemakai ke nuan.” 10 Nya alai, iya pan mupuk ngagai Sarepat. Lebuh iya datai ba pintu penama kuta nya, bisi siku indu balu benung ngumpul kayu. Iya ngangauka indu balu nya lalu madah: “Beri aku mimit ai irup.” 11 Lebuh indu balu nya deka mupuk ngambi ai, ku Elijah agi: “Beri mega siti roti ngagai aku.” 12 Indu balu nya nyaut: “Aku besumpah atas nama Jehovah, Petara nuan ti idup, aku nadai roti. Aku semina bisi segenggam tepung ba sarang ti besai enggau mimit minyak ba sarang ti mit. Diatu, aku benung ngumpul kayu. Udah nya, aku deka pulai ke rumah lalu manduk utai ke aku empu enggau ke anak lelaki aku. Nya meh pemakai kami duai ti penudi. Udah nya, kami duai nganti hari deka mati.”
13 Elijah madah ngagai iya: “Anang irau. Mupuk lalu kereja utai ke deka digaga nuan nya. Tang sebedau nya, gaga setuku roti ti mit ari tepung ke dikemisi nuan, lalu beri meh roti nya ngagai aku. Udah nya, nuan ulih manduk utai ke nuan empu enggau ke anak lelaki nuan. 14 Jehovah, Petara orang Israel, madah: ‘Tepung ba sarang ti besai nya enda nemu abis, lalu minyak ba sarang ti mit nya mega enda nemu abis, nyentukka Aku, Jehovah, ngasuh ujan labuh ke tanah.’” 15 Indu balu nya pan mupuk lalu ngereja utai ke dipadah Elijah. Indu balu nya, ruang bilik iya, enggau Elijah, bela bisi pemakai ba timpuh ti lama. 16 Tepung ba sarang ti besai nya enda nemu abis, lalu minyak ba sarang ti mit nya mega enda nemu abis, baka ke udah dipadah Jehovah nengah Elijah.
17 Enda lama udah nya, anak lelaki indu ke ngempu rumah nya pan sakit. Penyakit iya majak balat lalu ngujungka iya mati. 18 Nya alai, indu balu nya madah ngagai Elijah: “O nembiak Petara ti bendar, nama kebuah nuan ngereja utai tu ngagai aku? Kati nuan datai deka ngingatka aku pasal penyalah aku lalu munuh anak aku?” 19 Ku Elijah madah ngagai iya: “Bai anak nuan nya ngagai aku.” Elijah pan ngambi anak nya ari indai iya lalu mai anak nya ngagai bilik Elijah empu ba atas. Elijah lalu ngalika anak nya ba peninduk iya. 20 Iya besampi ngagai Jehovah enggau nyawa ti inggar: “O Jehovah, Petara aku, kati nya Nuan ke nejuka penusah ninggang indu balu ke meri aku endur diau tu? Nama kebuah Nuan ngelakka anak iya mati?” 21 Udah nya, iya ningkapka diri ba atas tubuh anak nya tiga kali, lalu besampi ngagai Jehovah enggau nyawa ti inggar: “O Jehovah, Petara aku, asuh anak tu idup baru.” 22 Jehovah mendingka sampi Elijah, lalu anak nya pan idup baru. 23 Elijah mai anak nya nurun ari bilik iya ba atas, lalu meri anak nya ngagai indai iya. Elijah madah: “Anak nuan udah idup baru.” 24 Indu balu nya lalu madah ngagai Elijah: “Diatu baru aku nemu, nuan sigi nembiak Petara ti bendar, lalu utai ke dipadah Jehovah ngagai nuan endang amat.”