Obadiah
1 Tu meh utai ke dipandangka Petara dalam runding Obadiah:*
Tu meh utai ke dipadahka Jehovah, Tuan ti Pemadu Tinggi, pasal Edom:
“Kitai udah ninga berita ari Jehovah;
Siku seruan* udah dianjung ngagai mayuh bansa, lalu ku iya madahka:
‘Angkat meh! Aram meh kitai nyediaka diri beperang ngelaban Edom.’”
2 “Aku udah ngasuh nuan nyadi enda penting ba mata mayuh bansa;
Orang balat begedika nuan.
3 Ati nuan ti sumbung udah nipu nuan,
Nuan ke diau ba endur ti selamat ba bukit batu,
Ke diau ba endur ti tinggi, bejaku dalam ati diri:
‘Sapa ke ulih ngasuh aku labuh ke tanah?’
4 Taja pan nuan diau ba endur ti tinggi* baka burung menaul,
Tauka ngengkahka tansang nuan ba entara mayuh bintang,
Aku tetap deka ngasuh nuan labuh,” ku Jehovah.
5 “Enti perumpak tauka penchuri datai ngagai nuan maya malam hari,
(Naka meh pemalat nuan deka dianchurka!)*
Endaka sida semina deka ngenchuri utai ke dikedekaka sida?
Tauka enti orang ke ngumpul anggur datai ngagai nuan,
Endaka sida deka ninggalka mimit buah ngambika bisi digumpul orang bukai?
6 Esau udah diserungkai!
Reta ke dilalaika iya udah dirampas!
7 Semua orang ke bepakat* enggau nuan udah nipu nuan.
Sida udah mai nuan ngagai sempadan.
Orang ke bebaik enggau nuan udah ngalahka nuan.
Orang ke makai roti enggau nuan deka masang pukat kena manjuk nuan,
Tang nuan enda sedarka utai nya.”
8 Ku Jehovah: “Ba hari nya,
Aku deka ngemunaska orang ke bepenemu-dalam ba Edom,
Sereta ngemunaska orang ke dalam-runding ba kawasan gunung Esau.
9 O Teman, bala soldadu nuan deka berasai takut,
Laban semua orang ke ba kawasan gunung Esau deka dibunuh magang.
10 Ketegal penyai ke udah digaga nuan ngagai menyadi nuan, Jakop,
Nuan deka dibalut asai ati ti malu,
Lalu nuan deka punas belama iya.
11 Ba hari orang ke enda dikelala nangkap bala soldadu menyadi nuan,
Sereta lebuh orang asing tama nengah pintu penama iya lalu bechabutka undi kena bebagika reta Jerusalem,
Nuan semina bediri ba tisi aja.
Nuan sama jai baka sida.
12 Nuan enda patut gaga maya menyadi nuan ditinggang penusah,
Nuan enda patut lantang ati lebuh orang Judah dipunaska,
Lalu nuan enda patut bejaku begah lebuh sida merinsa.
13 Lebuh bala nembiak Aku merinsa, nuan enda patut tama nengah pintu sida,
Lebuh sida merinsa, nuan enda patut gaga ketegal penulah ke ninggang sida,
Lalu lebuh sida merinsa, nuan enda patut negu pengaya sida.
14 Nuan enda patut bediri ba simpang jalai ketegal deka munuh orang ke ngerarika diri,
Lalu lebuh sida merinsa, nuan enda patut nyerahka orang ke selamat ngagai bala munsuh sida.
15 Hari Jehovah ngukum semua bansa nyau semak.
Utai ke udah dikereja nuan deka dikereja ngagai nuan.
Utai ke digaga nuan ngagai orang bukai deka ninggang nuan empu.
16 Baka rayat nuan ke ngirup ba gunung Aku ti kudus,
Baka nya meh semua bansa deka seruran ngirup.
Sida deka ngirup lalu ngelanggak sampai abis.
Sida deka lesap, baka ke enda kala bisi.
17 Tang ba Gunung Sion bisi orang ke selamat,
Lalu gunung nya deka nyadi kudus.
Peturun Jakop deka ngambi baru utai ke endang enggi sida.
18 Peturun Jakop deka nyadi baka api,
Peturun Josep deka nyadi baka api,
Lalu peturun Esau deka nyadi baka rumput rangkai.
Sida deka nganguska peturun Esau abis lengis,
Nyentukka nadai siku pan peturun Esau ke selamat,
Laban Aku, Jehovah, udah bejaku.
19 Sida deka nguasa Negeb enggau kawasan gunung Esau,
Nguasa Shefilah enggau menua orang Pilistin.
Sida deka nguasa padang Efraim enggau padang Samaria,
Lalu Benjamin deka nguasa Gilead.
20 Orang ke dibuai ari benteng* tu,
Iya nya orang Israel, deka ngempu menua orang Kanaan nyentukka Sarepat.
Orang ke dibuai ari Jerusalem, iya nya orang ke ba Sefarat, deka ngempu kuta-kuta ba Negeb.
21 Bala penyelamat deka niki ngagai Gunung Sion
Kena ngakim kawasan gunung Esau,
Lalu Aku, Jehovah, deka merintah nyadi raja.”