PELAJAR 42
Nama Dipadah Bup Kudus pasal Bujang Dara enggau Tikah?
Ba sekeda bansa, orang pechaya sida patut kawin ngambika ulih idup lantang. Tang, ukai semua orang ke udah kawin nya idup lantang. Lalu, ukai semua orang ke bujang dara enda gaga ati. Kebendar iya, Bup Kudus madahka, bujang dara tauka tikah nya pemeri ari Petara.
1. Nama pemanah iya enti enda kawin?
Bup Kudus madahka: “Lelaki ke jadi enggau tunang iya ngereja utai ti manah, tang lelaki ke enda bebini, ngereja utai ti manah agi.” (Bacha 1 Korint 7:32, 33, 38.) Nama kebuah Bup Kudus madahka orang ke enda bebini tauka belaki nya “manah agi”? Orang ke enda bebini tauka belaki tu enda ibuh irauka kaling pengidup sida. Nya alai, sida bisi mayuh agi awak, lalu ulih ngereja mayuh agi ke Jehovah. Ambika chunto, sida ulih ngagai menua bukai ngambika ulih nginjil pasal Berita Manah. Lalu keberat agi, sida ulih ngena mayuh agi awak nyemakka diri ngagai Jehovah.
2. Nama pemanah iya enti kawin enggau sah?
Baka orang ke bujang dara, pengawa jadi melaki-bini mega mai penguntung. Bup Kudus madahka, “dua iku manah agi ari siku.” (Pengajar 4:9) Laki bini ngasaika ayat Bup Kudus tu amat enti sida nitihka prinsip Bup Kudus sereta kawin enggau sah nitihka undang-undang. Sida ulih berasai lantang laban sida udah besemaya deka masa sereta rinduka pangan diri. Bala anak ke dibesai ba ruang bilik ke baka tu, deka berasai likun. Utai tu manah agi ari dua iku orang ke bujang dara ti milih diau segulai tang enda kawin.
3. Nama runding Jehovah pasal tikah?
Lebuh ngepunka pengawa tikah ti keterubah, Jehovah madahka: “Nya kebuah lelaki ninggalka apai indai iya, lalu begulai enggau bini iya.” (Pemungkal 2:24) Jehovah deka laki bini rinduka pangan diri sereta bisi tanchang ti rat seagi-agi seduai iya idup. Iya semina ngemendarka laki bini sarak enti seiku ari seduai iya butang. Piak ke enda besalah ulih milih sekalika iya deka sarak tauka enda.a (Matthew 19:9) Jehovah mega nagang orang Kristian ari pengawa poligami, iya nya ngembuan lebih ari seiku laki tauka bini.—1 Timoti 3:2.
BELAJAR MAYUH AGI
Peratika baka ni nuan ulih gaga ati sereta ngasuh Jehovah gaga ati enda ngira nuan nya orang ke bujang dara tauka udah kawin.
4. Kena meh pengidup maya bujang dara enggau manah
Ba Jesus pengidup bujang dara nya siti pemeri. (Matthew 19:11, 12) Bacha Matthew 4:23, lalu kerandauka tanya tu:
Baka ni Jesus ngena pengidup iya ke bujang gawa ke Jehovah sereta nulung orang bukai?
Orang Kristian ke enda kawin ulih gaga ati enti sida neladan Jesus. Mainka VIDEO, lalu kerandauka tanya tu.
Baka ni orang Kristian ulih ngena pengidup sida lebuh agi bujang dara enggau manah?
Nemu nuan?
Bup Kudus nadai netapka umur ngambika ulih kawin. Taja pia, Bup Kudus meransang orang ke bujang dara nganti maya “udah chukup umur.” Tu ketegal pengingin seks maya agi biak tusah deka ditagang, lalu tu ngasuh sida enda ulih ngaga pemutus enggau manah.—1 Korint 7:36, NWT.
5. Pilih kaling pengidup enggau manah
Milih kaling pengidup nya siti utai ti amat berat. Bacha Matthew 19:4-6, 9, lalu kerandauka tanya tu:
Nama kebuah orang Kristian enda patut beguai deka kawin?
Jaku ajar ari Bup Kudus nulung kitai milih kaling pengidup ti manah. Utai ti pemadu beguna nya, ngiga kaling pengidup ti rinduka Jehovah.b Bacha 1 Korint 7:39 enggau 2 Korint 6:14, lalu kerandauka tanya tu:
Nama kebuah kitai semina jadi enggau orang ke sama pengarap?
Nama asai ati Jehovah enti kitai jadi enggau orang ke enda rinduka Iya?
Enti sema dua iku jelu ti bebida diengkah ba tangkun ti sama, seduai iya deka merinsa. Baka nya mega, orang Kristian ke jadi enggau orang ke enda sama pengarap deka napi mayuh penanggul ba tikah sida
6. Ngembuan runding Jehovah pasal tikah
Ba jeman Israel kelia, sekeda lelaki nyarak bini sida ketegal utai ti mit aja. Bacha Malaki 2:13, 14, 16, lalu kerandauka tanya tu:
Nama kebuah Jehovah begedika sarak ti enda sejalai enggau prinsip Bup Kudus?
Butang enggau sarak ulih ngemediska kaling pengidup ti enda besalah enggau anak seduai iya
Mainka VIDEO, lalu kerandauka tanya tu.
Enti kaling pengidup nuan enda sama pengarap, nama ulih digaga nuan ngambika tikah nuan mujur?
7. Titihka standard Jehovah bekaul enggau tikah
Nuan engka patut bebendar nitihka standard Jehovah ba tikah nuan.c Tang kingatka meh Jehovah deka merekat pengeran nuan. Mainka VIDEO.
Bacha Hebrew 13:4, lalu kerandauka tanya tu:
Ba runding nuan, kati standard Jehovah bekaul enggau tikah nya ngena tauka enda? Nama kebuah?
Jehovah deka orang Kristian nentuka pengawa tikah tauka sarak digaga nitihka undang-undang menua. Bacha Titus 3:1, lalu kerandauka tanya tu:
Enti nuan udah kawin, kati tikah nuan sah nitihka undang-undang?
ORANG ENGKA NANYA: “Kapa kawin? Nadai salah enti deka diau begulai.”
Nama saut nuan?
LANSA
Pengidup bujang dara tauka jadi melaki-bini pemeri ari Jehovah. Bela ulih mai pengaga sereta puas ati enti kitai nitihka standard Jehovah.
Ulang Kaji
Baka ni seseiku orang ulih ngena pengidup bujang dara enggau manah?
Nama kebuah Bup Kudus madahka kitai semina patut jadi enggau orang ke sama pengarap?
Ba Bup Kudus, nama siti aja kebuah ke ulih ngasuh laki bini sarak?
ARAM BELAJAR
Nama reti jadi “enggau nembiak Tuan aja”?
Peda dua iti video ke ulih nulung nuan ngaga pemutus ti manah bekaul enggau dating sereta tikah.
Belajarka kebuah seiku menyadi Kristian lelaki ngasaika utai ti diberi Jehovah nya berega agi ari semua utai ti dilengkaka iya.
Nama utai ti patut diperundingka sebedau sarak tauka beserara enggau kaling pengidup?
“Masa ‘Utai ti Udah Ditampilka Petara’” (Menara Jaga, 15 Disember 2018)
a Peda Nota Penutup 4 pasal runding Bup Kudus bekaul enggau beserara.
b Ba sekeda bansa, apai indai deka milih kaling pengidup ke anak sida. Apai indai ke amat sayauka anak sida deka milih orang ke rinduka Jehovah, lalu ukai angkunka duit tauka penuduk.
c Enti sema nuan diau begulai enggau seiku orang tang seduai enda kawin, nuan empu patut ngaga pemutus sekalika deka kawin enggau iya tauka ninggalka iya.