PELAJAR 37
Nama Dipadah Bup Kudus pasal Kereja enggau Duit
Kemayaharitu mayuh orang irau pasal kereja tauka duit. Kati nuan mega baka nya? Amat, nya enda senang enti kitai deka ngenuluka Jehovah lalu ba maya ti sama ngintu utai ti diguna diri empu sereta ba diri sebilik. Tang, jaku ajar ari Bup Kudus ulih nulung kitai.
1. Nama dipadah Bup Kudus pasal kereja?
Jehovah seruran bagas gawa lalu Iya deka kitai nunda Iya. Bup Kudus madahka, “Utai ti pemadu manah ti tau dikereja kitai nya . . . makai, ngirup lalu ngelantangka diri ngena utai ti udah ulih kitai.” (Pengajar 2:24) Lebuh kitai bagas gawa, kitai berasai puas sereta ngelantangka ati Jehovah.
Taja pan kereja nya beguna, tang sembah kitai ngagai Jehovah beguna agi. (John 6:27) Enti kitai ngenuluka Jehovah ba pengidup kitai, Iya besemaya deka nyaga utai ti diguna kitai.
2. Nama dipadah Bup Kudus pasal duit?
Bup Kudus madahka, “duit ulih meri kitai pengelikun.” Tang Bup Kudus mega madahka duit enda ulih mai pengelantang ti bendar. (Pengajar 7:12) Nyadi, kitai patut nyeliahka diri ari angkunka duit, lalu kitai patut belajar “puas ati ke utai ti dikemisi kitai.” (Bacha Hebrew 13:5.) Orang ke enda puas ati deka seruran ngiga pengaya. Ketegal nya sida enda berasai lantang. Orang ke nemu puas ati deka nyeliah ari berutang, judi, enggau skim jampat kaya. (Jaku Dalam 22:7) Asil iya, sida dilindung ari mayuh utai ti enda manah.
3. Baka ni kitai ulih ngena duit enggau manah?
Jehovah nya Petara ti gerah jari, lalu Iya deka kitai ngembuan “ati ti gerah mudah, sereta sedia deka bekunsika utai enggau orang bukai.” (1 Timoti 6:18) Kitai ulih ngena duit kitai nyukung eklisia sereta nulung orang ke tusah, kelebih agi sida ke sama pengarap enggau kitai. Ba Jehovah, utai ti pemadu beguna nya ukai penyampau ke diberi, tang tuju ati kitai. Lebuh kitai meri ari ati, kitai deka ngelantangka ati Jehovah lalu kitai empu deka gaga ati.—Bacha Surat Kereja Rasul 20:35.
BELAJAR MAYUH AGI
Peratika penguntung iya enti kitai ngembuan runding ti betul pasal kereja sereta nemu puas ati enggau utai ti dikemisi.
4. Ngemuliaka Jehovah ba endur kereja
Ketegal kaul kitai enggau Jehovah, kitai deka mandangka runding enggau pemanah Iya ba kereja. Mainka VIDEO, lalu kerandauka tanya tu.
Nama utai ke dikerinduka nuan pasal ulah sereta pendiau Jason ba endur kereja iya?
Baka ni Jason nunjukka iya ngembuan runding ti betul pasal kereja?
Bacha Kolosi 3:23, 24, lalu kerandauka tanya tu:
Nama kebuah ulah kitai ke bekaul enggau kereja nya amat penting?
Kereja endang beguna. Tang kitai enda patut nejuka kereja nyadi beguna agi ari sembah kitai ngagai Jehovah
5. Penguntung iya enti kitai nemu puas ati
Mayuh orang rindu begigaka pengaya. Tang Bup Kudus meri kitai jaku ajar ti bebida. Bacha 1 Timoti 6:6-8, lalu kerandauka tanya tu:
Nama jaku ajar Bup Kudus ba ayat tu?
Kitai ulih idup lantang taja pan enda kaya. Mainka VIDEO, lalu kerandauka tanya tu.
Baka ni ruang bilik ba video tu ulih gaga ati, taja pan sida nadai mayuh duit?
Enti kitai udah kaya tang agi enda puas ati, nama jaku ajar Jesus ngagai kitai? Bacha Luke 12:15-21, lalu kerandauka tanya tu:
Nama utai ke ulih dipelajarka kitai ari sempama Jesus?—Peda ayat 15.
Bacha lalu bandingka Jaku Dalam 10:22 enggau 1 Timoti 6:10. Udah nya kerandauka tanya tu:
Ba nuan, nama utai ke beguna agi? Nyadi pangan Jehovah tauka nyadi kaya raja? Nama kebuah?
Nama penanggul ke engka ditapi enti kitai ngiga pengaya?
6. Jehovah deka nyaga kitai
Penanggul kereja enggau duit ulih nguji pengarap kitai. Mainka VIDEO kena meda baka ni kitai ulih mutarka penanggul ke nguji pengarap kitai. Udah nya, kerandauka tanya tu.
Nama penanggul ke ditapi menyadi lelaki dalam video tu?
Baka ni iya mujur mutarka penanggul nya?
Bacha Matthew 6:25-34, lalu kerandauka tanya tu:
Nama semaya Jehovah ngagai orang ke ngenuluka Iya?
BISI ORANG MADAH: “Aku patut gawa kena nupi diri sebilik aku. Nya kebuah aku enda ulih ngagai gempuru ninting minggu.”
Nama ayat Bup Kudus ke ngasuh nuan andal, milih ngenuluka Jehovah nya pemutus ti pemadu manah?
LANSA
Kitai patut kereja ngambika bulih duit, tang kitai enda patut nejuka kereja kitai ngachau sembah kitai ngagai Jehovah.
Ulang Kaji
Baka ni kitai ulih ngembuan runding ti betul pasal kereja?
Nama kebuah nya manah nemu puas ati?
Baka ni nuan ulih nunjukka diri andalka Jehovah deka meri semua utai ti diguna nembiak Iya?
ARAM BELAJAR
Peratika utai ti dipadah Bup Kudus pasal duit.
“Kati Duit ke Ngasuh Penyai Nyadi?” (Artikel ba laman web jw.org)
Belajarka chara kitai ulih ngena duit ngelantangka ati Petara.
“Nama Ajar Bup Kudus Pasal Meri?” (Artikel ba laman web jw.org)
Kati bejudi nya semina pemerindang ti ngerinduka ati?
Peratika utai ti ngasuh seiku lelaki badu bejudi enggau ngenchuri.
“Aku Rindu enggau Judi Lumba Kuda” (Menara Jaga, 1 November 2011)