Nama Dipadah Bup Kudus pasal Bekaban?
Saut ari Bup Kudus
Bekaban ulih ngasuh pengidup kitai lantang. Kaban ti manah deka meri asil ti positif, lalu ngasuh kitai nyadi orang ke menyana agi.—Jaku Dalam 27:17.
Tang, Bup Kudus madah kitai patut bejimat milih sapa enggau kitai bekaban. Bup Kudus ngingatka kitai, enti salah pilih kaban nya ulih mai penusah. (Jaku Dalam 13:20; 1 Korint 15:33) Enti kaban kitai enda manah kitai ulih nitihka sida lalu ngaga pemutus ti salah. Kelimpah ari nya, nyau kelama ulah kitai ti manah ulih lenyau.
Artikel tu deka berandauka
Baka ni gaya kaban ti manah?
Suah iya, orang rindu ngiga kaban ke bisi minat sereta hobi ti sama. Tang, Bup Kudus madah nya enda chukup. Chunto iya, peratika utai ke disebut seiku penulis Bup Kudus ba Masmur 119:63: “Aku tu pangan semua orang ke nangika Nuan, semua orang ke ngasika adat Nuan.” Penulis Bup Kudus nya madahka, iya deka milih kaban ke ngelantangka ati Petara sereta ngasika pesan Iya.
Bup Kudus mega nerangka baka ni gaya kaban ti manah. Chunto iya:
“Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku Dalam 17:17.
“Sekeda orang bepangan enda lama aja, tang sekeda pangan taluk agi ari menyadi diri.”—Jaku Dalam 18:24.
Ayat tu nunjukka, kaban ti manah nya tetap ati, pengasih, manah ati sereta gerah jari. Kaban ti bendar sedia nyukung kitai lebuh kitai napi penusah. Iya mega berani nangkan kitai sebedau kitai ngereja penyalah tauka ngaga pemutus ti enda manah.—Jaku Dalam 27:6, 9.
Sekeda chunto kaban ti bendar dalam Bup Kudus
Bup Kudus ngembuan sekeda orang ke bekaban taja pan perangai sida bebida. Chunto iya, sida engka bebida ba umur, chara pengidup sereta adat. Aram kitai berandauka tiga chunto ari sida tu.
Rut enggau Naomi. Rut nya menantu Naomi. Nyadi, takah umur sida engka amat jauh. Kelimpah ari nya Rut datai ari bansa ti bebida ari Naomi. Taja pia, sida amat rapat sereta sayauka pangan diri.—Rut 1:16.
David enggau Jonathan. Umur Jonathan 30 taun tuai agi ari David. Tang Bup Kudus madahka David enggau Jonathan nya kaban ti amat rapat.—1 Samuel 18:1.
Jesus enggau bala rasul iya. Jesus nya pengajar sereta tuan ke bala rasul iya. (John 13:13) Tang iya enda kala ngumbai sida enda layak nyadi kaban iya. Indah, Jesus amat rapat enggau orang ke deka ngasika ajar iya. Ku Jesus, ‘Aku udah ngumbai kita pangan, laban aku udah madah ngagai kita semua utai ti didinga aku ari Apai.’—John 15:14, 15.
Kati mensia ulih nyadi pangan Petara?
Au, mensia ulih nyadi pangan Petara. Bup Kudus madahka: ‘[Petara] ngaga orang ke lurus nyadika pangan Iya.’ (Jaku Dalam 3:32) Reti iya, Petara deka nyadi pangan orang ke bebendar nyadi orang ke manah, lurus, enda pepura, sereta deka ngasika pesan Iya. Chunto iya, Bup Kudus bisi nulis, Abraham nya pangan Petara.—2 Bansa Israel 20:7; Isaiah 41:8; James 2:23.