Giga Meh Pemendar

Penanggul Iya

Kesuah iya, ulah ti bepilih mata nyadi ketegal penerang ti salah. Peratika sekeda chunto tu:

Sekeda tuke ngumbai orang indu enda ulih ngereja pengawa ti begunaka mayuh pengelandik, pengering tauka pemintar.
Mayuh orang bisi runding ti enda manah pasal orang ke diau ba kampung. Sida seruran ngumbai, orang ke diau ba kampung nya ngelusu sereta selalu mabuk. Pia mega, kekadang orang senang amat nyimpulka, orang ke diau ba kampung tusah deka bulih duit laban nadai kereja. Lalu sida selalu dikumbai nadai pemandai.
Mayuh orang ngembuan runding ti salah. Sida ngumbai orang ke bisi penimpang endang seruran tusah ati sereta jampat ringat.

Orang ke baka tu indah sanggup ngiga lalu tetemuka bukti ti nyukung penemu sida ke salah nya, nyentukka sida ngumbai orang ke enda setuju enggau penemu sida, enda nemu utai.

Lalau ari Bup Kudus

“Orang ke mereti begigaka penemu.”—JAKU DALAM 15:⁠14.

Nama dipelajar kitai ari ayat tu? Enti kitai enda nemu utai ke betul, kitai deka ngaga pemutus ti salah. Lalu kitai deka senang agi ngakim orang bukai enti kelalu andalka penemu ti salah.

Nama Kebuah Nemu Pemendar Pasal Orang Bukai Nya Beguna?

Enti kitai nguji ngelala sapa orang nya ti bendar, kitai enda senang dilimpangka penemu ti salah pasal iya. Lalu pengudah kitai nemu pemendar ti betul, maya kitai ninga orang bukai bejai pasal sesiti raban orang, kitai enda jampat pechayaka utai ke disebut sida.

Cherita Pengidup: Jovica (Eropah Selatan)

Lebuh Jovica ke disebut tadi dibesaika, iya suah ninga riput ti enda manah ari orang ke ngelingi, berita, tauka program TV pasal siti raban bansa. Ku iya, “Ketegal tu aku nyadi orang ke bepilih mata, indah bisi ati ti begedika bansa nya. Lalu aku ngasaika enda salah ngembuan runding enggau asai ati tu.”

“Tang lebuh aku nyadi soldadu, aku patut begulai gawa sereta diau enggau siti raban bansa ke enda dikerinduka aku nya. Belabuh ari tu, aku belajar pasal sida. Indah aku pan berengkah belajarka jaku, lalu ningaka lagu asal bansa sida. Enda memukai aku berasai rindu agi begulai enggau sida. Runding aku pasal sida berubah. Tang aku nemu asai ati sereta runding ti salah nya ulih datai baru. Nya kebuah aku nyeliahka diri ari ninga riput ti enda manah pasal sida. Aku mega enggai meda cherita tauka jenaka ti ngemelika sida. Laban aku nemu, runding enggau asai ati nya ulih mansang ngagai pengeringat sereta ati ti begedi.”

Utai ke Ulih Digaga Nuan

Sekeda orang ngumbai sesiti raban nya ngembuan ulah ti enda manah. Tang kingatka, ukai tiap iku orang dalam raban nya sama.
Pia mega, nuan enda nemu semua utai pasal sesiti raban orang.
Uji giga penerang ti tau dikearapka.