PELAJAR 03
Ulih Nuan Pechayaka Bup Kudus?
Bup Kudus ngundan mayuh jaku ajar sereta semaya ti manah. Nuan tentu deka nemu pasal utai ke diajar nya. Kati nuan ulih pechaya ke ajar ti datai ari bup ke udah lama? Bejuta iku orang pechaya ngagai ajar Bup Kudus pasal pengidup kitai diatu enggau jemah ila. Baka ni enggau nuan?
1. Kati cherita dalam Bup Kudus amat nyadi?
Bup Kudus madahka, jaku ke bisi dalam nya “amat.” (Pengajar 12:10, Bup Kudus Berita Manah Ka Rebak Diatu) Cherita Bup Kudus bisi bekaul enggau orang ke kala idup lalu cherita nya amat bisi nyadi. (Bacha Luke 1:3; 3: 1, 2.) Mayuh pakar sejarah enggau arkeologi setuju, utai ke ditulis dalam Bup Kudus ke bekaul enggau utai ti nyadi, haribulan, endur, sereta orang nya endang amat.
2. Kati jaku dalam Bup Kudus agi ulih dikena taja pan udah lama?
Ulih. Ambika chunto, lebuh bejaku pasal sains, penerang ke bisi dia agi ulih dikena. Maya Bup Kudus ditulis suba, mayuh orang enda setuju enggau utai ti ditulis dalam bup nya. Tang diatu, sains udah nunjukka utai ke ditulis dalam Bup Kudus nya endang amat. Bup Kudus “endang tau dikearapka . . . meruan belama iya.”—Masmur 111:8.
3. Nama kebuah penerang Bup Kudus pasal jemah ila ulih dipechaya?
Bup Kudus bisi jaku benabia pasal “utai ti deka nyadi.” (Isaiah 46:10) Mayuh utai ke ditulis dalam Bup Kudus udah lama dipadah sebedau utai nya nyadi. Kelimpah ari nya, Bup Kudus mega madahka utai ke deka nyadi ba jeman kitai diatu enggau silik. Pelajar tu deka berandauka sekeda jaku benabi ari Bup Kudus. Nuan tentu alit ati meda pengamat jaku dalam Bup Kudus!
BELAJAR MAYUH AGI
Peda chara sains kemayaharitu sejalai enggau utai ke ditulis dalam Bup Kudus. Lalu, peratika beberapa iti jaku benabi Bup Kudus ti ngalitka ati.
4. Utai ari Bup Kudus sejalai enggau sains
Ba jeman kelia, orang pechaya, dunya tu diengkah ba atas sesiti utai. Mainka VIDEO.
Peratika utai ke ditulis dalam bup Jop kira-kira 3,500 taun kelia. Bacha Jop 26:7 ari nota kakib, lalu kerandauka tanya tu:
Ayat nya madah, “dunya melepung ba langit ti puang,” reti nya dunya enda digantung ba nama-nama utai. Nama kebuah tu amat ngalitka ati?
Semina ba abad ke-19 orang berengkah mereti pasal proses ai. Tang peratika utai ke ditulis ba Bup Kudus beribu taun sebedau nya. Bacha Jop 36:27, 28, lalu kerandauka tanya tu:
Nama kebuah utai ke ditulis dalam Bup Kudus pasal proses ai nya amat ngalitka ati?
Kati ayat ke baru dibacha nuan ngasuh nuan andal agi ngagai Bup Kudus?
5. Bup Kudus madahka utai ti beguna ke deka nyadi
Bacha Isaiah 44:27–45:2, lalu kerandauka tanya tu:
Nama utai ke dipadah Bup Kudus 200 taun sebedau Babilon dirusak?
Sejarah madahka, Raja Sairus ari menua Persia, enggau bala soldadu iya udah ngalahka Babilon ba taun 539 S.M.c Sida ngubah penungga arus sungai ke ngelingi nengeri nya, tama nengah pintu ti ditejuka tebuka, lalu ngalahka nengeri nya enggau enda beperang. Diatu, pengudah 2,500 taun, Babilon agi nyadi tembawai. Peratika utai ti dipadah dalam Bup Kudus.
Bacha Isaiah 13:19, 20, lalu kerandauka tanya tu:
Baka ni sejarah nunjukka utai ti ditulis dalam Bup Kudus pasal Babilon nya endang amat?
Tembawai Babilon ba Iraq kemayaharitu
6. Bup Kudus madah ngagai kitai utai ti deka nyadi ba jeman kitai
Bup Kudus madahka kitai benung idup “ba hari ti penudi.” (2 Timoti 3:1) Peratika utai ti ditulis dalam Bup Kudus.
Bacha Matthew 24:6, 7, lalu kerandauka tanya tu:
Nama utai ke dipadah Bup Kudus ke deka nyadi ba hari ti penudi?
Bacha 2 Timoti 3:1-5, lalu kerandauka tanya tu:
Nama utai ti dipadahka Bup Kudus pasal ulah orang ba hari ti penudi?
Ni bagi ulah ke suah ditunjukka orang ba kandang endur nuan diau?
BISI ORANG MADAH: “Bup Kudus penuh enggau cherita ensera aja.”
Ba runding nuan, nama utai ti nunjukka Bup Kudus nya ulih dipechaya?
LANSA
Sejarah, sains enggau jaku benabi nunjukka Bup Kudus endang ulih dipechaya.
Ulang Kaji
Kati cherita dalam Bup Kudus amat kala nyadi?
Nama chunto ke nunjukka Bup Kudus sejalai enggau sains?
Ba runding nuan, kati utai ti dipadah dalam Bup Kudus pasal jemah ila nya amat? Nama kebuah?
ARAM BELAJAR
Kati Bup Kudus ngundan penerang ke enda sejalai enggau sains?
“Kati Ajar Bup Kudus Sejalai enggau Sains?” (Artikel ba laman web jw.org)
Nama sekeda penerang pasal “hari ti penudi”?
“6 Jaku Benabi ba Bup Kudus ke Benung Dikeamatka” (Menara Jaga, 1 Mei 2011)
Peratika baka ni utai ti ditulis pasal Perintah Gerika dikeamatka.
Peratika baka ni jaku ti benabi ari Bup Kudus udah ngubah runding seiku lelaki pasal Bup Kudus.
a Jaku benabi nya pesan ari Petara pasal utai ti deka nyadi jemah ila.
b Jop 26:7, NWT: Petara mintarka langit utara lalu ngasuh dunya melepung ba langit ti puang.
c M. reti nya Masihi. Tu nunjukka taun dalam kelinda ke dikena diatu. S.M. reti nya Sebedau Masihi.