Kati Orang Judah Deka Arap Pengudah Ninga Nyawa Petara?

Maya Hari Satu, 10 Nisan ba Rumah Sembiang, Jesus madah iya deka mati enda lama da agi. Tang iya irau pemati iya deka ngenyaika nama Petara. Nya alai, iya madah: “Apai, muliaka nama Nuan.” Udah nya, bisi nyawa ari serega bejaku: “Aku udah ngemuliaka nama Aku, lalu deka ngemuliaka iya baru.”—John 12:27, 28.

Orang ba dia amat tekenyit. Sekeda orang ngumbai nya bunyi guntur. Ke bukai madah: “Bisi melikat bejaku enggau iya.” (John 12:29) Kebendar iya, nya nyawa Jehovah! Lalu tu ukai keterubah kali mensia ninga nyawa Petara bejaku ngagai Jesus, kenyau ari maya iya berengkah nginjil ba dunya.

Tiga taun setengah sebedau tu lebuh Jesus dibaptisa, John Pemaptisa ninga nyawa Petara bejaku ngagai Jesus: “Tu Anak ke dikesayauka Aku. Aku gaga ati ke iya.” Lalu pengudah Pengerami Paska ba taun 32 M., lebuh Jesus berubah gamal ba mua James, John enggau Peter, tiga iku rasul tu ninga nyawa Petara madah: “Tu Anak ti dikesayauka Aku. Aku gaga ati ke iya. Pendingka iya.” (Matthew 3:17; 17:5) Tang kali tu ba Rumah Sembiang, mayuh orang ulih ninga nyawa Petara!

Jesus madah: “Nyawa ke ulih didinga nya ukai ke aku, tang ke kita.” (John 12:30) Tu nunjukka Jesus nya Anak Petara, sereta Messiah ke disemaya.

Lebuh Jesus ba dunya, iya mengkang setia ngagai Petara, lalu kitai patut neladan iya. Penetap ati Jesus terang nunjukka Sitan, iya nya pemerintah dunya tu patut diukum bunuh. Jesus madah: “Diatu dunya tu benung diakim lalu pemerintah dunya tu deka diburu.” Pemati Jesus ukai reti iya udah alah, tang tu nunjukka iya udah menang. Nama kebuah? Iya madah: “Tang lebuh aku dituatka, aku deka mai semua macham orang ngagai aku.” (John 12:31, 32) Ketegal pemati Jesus ba tiang perinsa, iya deka mai orang ngagai iya lalu muka jalai ngambika orang bulih pengidup ti meruan.

Lebuh orang mayuh ninga pasal Jesus deka “dituatka,” sida madahka: “Ari Adat, kami ninga Kristus deka idup belama iya. Nya alai, nama kebuah nuan madahka Anak Mensia patut dituatka? Sapa Anak Mensia nya?” (John 12:34) Sida udah meda mayuh bukti sereta ninga nyawa Petara bejaku ngagai Jesus. Tang mayuh ari sida agi enggai nerima Jesus nya Anak Mensia ti bendar, sereta Messiah ke disemaya.

Baka ke kala digaga iya suba, Jesus madahka diri baka “penampak.” (John 8:12; 9:5) Ku iya meransang orang mayuh: “Penampak agi ulih enggau kita enda lama. Bejalai meh lebuh penampak nya agi bisi, ngambika pemetang enda bekuasa atas kita. . . . Arap meh ke penampak lebuh penampak nya agi bisi, ngambika kita ulih nyadi anak penampak.” (John 12:35, 36) Udah nya, Jesus mupuk lalu belalai ari orang mayuh. Tang maya nya agi 10 Nisan, lalu maya Jesus patut mati bedau datai. Iya ke amat, iya mesti “dituatka,” tauka dipantang ba tiang perinsa kena 14 Nisan.—Galatia 3:13.

Pengawa nginjil Jesus enggau terang nunjukka orang Judah ngamatka jaku benabi lebuh sida enggai arapka iya. Jaku benabi Isaiah nunjukka orang mayuh deka nyadi baka orang ke buta lalu ati sida kieh. Nya alai, sida enda nguingka diri ngagai Jesus ngambika ulih gerai. (Isaiah 6:10; John 12:40) Mayuh orang Judah enggai nerima bukti ti nunjukka Jesus nya Penyelamat ke disemaya sereta jalai ke nuju ngagai pengidup.

Kebendar iya, Nikodimus, Josep ari Arimatea sereta bala ketuai ke bukai arapka Jesus. Tang kati sida deka berani ngaku sida arapka Jesus, tauka kati sida deka ngelalaika pengarap sida laban takut diburu ari balai gempuru, ketegal sida “rindu agi nerima mulia ari mensia”?—John 12:42, 43.

Ku Jesus nerangka nama reti arapka iya: “Barang sapa ke arapka aku, ukai aja arapka aku tang mega arapka Iya ke ngirumka aku. Barang sapa ke meda aku, mega meda Iya ke ngirumka aku.” Petara ngasuh Jesus ngajar sereta nusui pemendar. Lalu ba Jesus, pemendar tu amat penting nyentukka iya madah: “Barang sapa ke nulak aku sereta enggai nerima jaku aku deka diakim. Jaku ke disebut aku nya meh ke deka ngakim iya jemah ila.”—John 12:44, 45, 48.

Pengujung iya, Jesus madah: “Aku enda bejaku nitihka peneka aku empu, tang Apai ke ngirumka aku meh ke meri pesan pasal utai ke patut dipadah sereta disebut aku. Aku mega nemu pesan Iya meri pengidup ti meruan belama iya.” (John 12:49, 50) Jesus nemu enda lama da agi, iya deka nyerahka nyawa iya nyadika tebus ngagai orang ke arapka iya.—Rome 5:8, 9.