PELAJAR 44
Kati Semua Pengerami Ngerinduka Ati Petara?
Jehovah deka kitai idup enggau lantang lalu Iya mega nemu sekeda pengerami ulih ngasuh kitai gaga ati. Tang kati semua pengerami ngerinduka ati Petara? Baka ni kitai ulih nunjukka pengerindu ngagai Petara ba pekara tu?
1. Nama kebuah mayuh pengerami enda ngerinduka ati Jehovah?
Sekeda pengerami enda bepelasarka ajar ari Bup Kudus tauka ngembuan ajar ari orang kapir. Sekeda pengerami bisi kaul enggau ajar ari pengarap pelesu baka semengat ti enda nemu mati. Kelimpah ari nya, sekeda pengerami bisi kaul enggau pengawa betilitka nasit, tuah tauka pengawa bemanang. (Isaiah 65:11) Jehovah madah ngagai nembiak Iya: “Seraraka diri ari sida . . . lalu anang negu utai ti enda tuchi.”—2 Korint 6:17.a
2. Nama asai ati Jehovah ngagai pengerami ti ngemuliaka mensia?
Jehovah ngelalau kitai ngambika enda “manggaika pengarap . . . ba mensia.” (Bacha Jeremiah 17:5.) Sekeda pengerami ngemuliaka bala pemerintah tauka bala soldadu. Pia mega, bisi pengerami ti ngemansangka asai rindu ngagai menua diri. (1 John 5:21) Sekeda pengerami bukai diintu kena nyukung gerempung politik tauka sosial. Jehovah tentu asa ati enti kitai ngemuliaka orang tauka gerempung bukai lebih agi ari Iya, kelebih agi enti sida ngereja utai ti enda sejalai enggau peneka Iya.
3. Nama ulah ke ngasuh sekeda pengerami enda diterima Jehovah?
Bup Kudus nangkan kitai pasal pengawa “mabuk, berami enda beiga-iga, [enggau] berami ngirup.” (1 Peter 4:3) Sekeda pengerami ngemansangka ulah ti kamah. Orang ke enggau pengerami nya mega suah ngayanka ulah ti enda nemu nagang diri. Ngambika ulih nyadi pangan Jehovah, kitai patut nyeliahka diri ari semua pengawa ti enda bemoral tu.
BELAJAR MAYUH AGI
Peratika baka ni nuan ulih ngaga pemutus ti manah bekaul enggau hari besai sereta pengerami.
4. Seliahka pengerami ti enda ngerinduka ati Jehovah
Bacha Epesus 5:10, lalu kerandauka tanya tu:
Nama utai ke patut diperundingka kitai lebuh ngaga pemutus sekalika deka ngintu sesiti pengerami tauka enda?
Nama sekeda pengerami ke suah diintu ba alai nuan diau?
Ba runding nuan, kati Jehovah rinduka pengerami nya?
Kala nuan berundingka asai ati Petara pasal ngintu hari pengada? Bup Kudus nadai kala nyebut pasal nembiak Jehovah ke ngintu hari pengada. Tang dua iti hari pengada ke disebut ba Bup Kudus diintu orang ke enda nyembah Jehovah. Bacha Pemungkal 40:20-22 enggau Matthew 14:6-10, lalu kerandauka tanya tu:
Nama utai ti sama ba dua iti pengerami nya?
Bepelasarka dua iti cherita tu, nama runding nuan pasal asai ati Jehovah bekaul enggau hari pengada?
Nuan engka berunding, ‘Kati Jehovah beduli enti aku ngintu hari pengada tauka pengerami bukai?’ Bacha Pemansut 32:1-8. Udah nya, mainka VIDEO lalu kerandauka tanya tu.
Nama kebuah kitai patut nentuka utai ti dikereja kitai diterima Jehovah?
Baka ni kitai ulih ngereja nya?
Nama pengerami ti enda dikerinduka Petara?
Pengerami ti bepelasarka ajar ti pelesu. Gaga meh pansik pasal pun penatai pengerami nya.
Pengerami ti ngemuliaka mensia, gerempung mensia tauka menua. Kingatka meh kitai deka ngemuliaka Jehovah lalu bepanggai ba Iya kena mutarka semua penanggul mensia.
Pengerami ti bisi adat enggau pengawa ti belaban enggau standard Bup Kudus. Kitai deka mengkang tuchi ba moral.
5. Tulung orang bukai bebasaka pengarap nuan
Lebuh orang mai nuan ngintu pengerami ti enda ngerinduka Jehovah, nuan engka tusah deka nulak iya. Tang nuan ulih nerangka pemutus nuan enggau nelap sereta basa. Mainka VIDEO kena meda chara iya.
Bacha Matthew 7:12, lalu kerandauka tanya tu:
Bepelasarka ayat tu, kati nuan patut madah ngagai diri sebilik ke enda sama pengarap pasal sida ke enda tau ngintu siti-siti pengerami?
Taja pan nuan enda enggau diri sebilik nuan ngintu pengerami, tang nuan agi sayau sereta ibuhka sida. Nama utai ke ulih digaga nuan ngambika diri sebilik nuan nemu tu?
6. Jehovah deka kitai gaga ati
Jehovah deka kitai gaga ati enggau diri sebilik sereta bala bakih kitai. Bacha Pengajar 8:15, lalu kerandauka tanya tu:
Baka ni ayat tu nunjukka Jehovah deka kitai gaga ati?
Jehovah dekaka bala nembiak Iya lantang ati enggau pangan diri. Mainka VIDEO kena meda baka ni nembiak Petara gaga ati maya konvensyen entarabansa.
Bacha Galatia 6:10, lalu kerandauka tanya tu:
Patut kitai nganti maya bisi siti-siti pengerami baru deka ngereja “pengawa ti badas” ngagai orang bukai?
Nama utai ke ngasuh nuan lebih agi gaga ati—dipejal meri ketegal pengerami tauka meri ari ati ba sebarang maya?
Kekadang mayuh Saksi ngaga atur ti spesial tauka meri hadiah ngagai anak sida. Enti nuan bisi anak, nama utai ti spesial ke ulih digaga nuan ke sida?
BISI ORANG MADAH: “Enda ibuh bedulika ari ni penatai pengerami nya. Aku semina deka gaga ati berami enggau diri sebilik sereta bala bakih.”
Baka ni nuan deka nyaut?
LANSA
Jehovah deka kitai gaga ati enggau bala bakih sereta diri sebilik. Tang Iya deka kitai nyeliahka ari pengerami ti enda ngerinduka ati Iya.
Ulang Kaji
Baka ni nuan ulih nemu sekalika pengerami nya diterima Jehovah tauka enda?
Baka ni kitai ulih nulung diri sebilik sereta bala bakih nemu kebuah kitai enda enggau sesiti pengerami?
Baka ni nuan nemu Jehovah dekaka kitai idup enggau lantang sereta gaga ati?
ARAM BELAJAR
Peda sekeda pengerami ke enda diintu orang Kristian ti bendar.
“Nama Kebuah Saksi-Saksi Jehovah Enda Ngintu Sekeda Pengerami?” (Artikel ba laman web jw.org)
Peratika empat iti utai ke nunjukka kebuah Petara enda rinduka hari pengada.
“Nama Kebuah Saksi-Saksi Jehovah Enda Ngintu Hari Pengada?” (Artikel ba laman web jw.org)
Peratika baka ni bala anak mit ke rinduka Jehovah ulih ngagaka ati Iya lebuh musin pengerami.
Bejuta iku orang Kristian milih enda ngintu Krismas. Bacha meh asai ati sida pasal pemutus nya.
“Sida Tetemuka Utai ti Manah Agi” (Menara Jaga, 1 Disember 2012)
a Peda Nota Penutup 5 kena nemu utai ke ulih digaga lebuh orang bukai ngintu pengerami.