Aku Enggai Agi Idup—Kati Ulih Bup Kudus Nulung Lebuh Aku Bisi Pengingin Deka Munuh Diri?
Saut ari Bup Kudus
Amat! Bup Kudus ulih nulung nuan! Bup Kudus bepun ari ‘Petara ke meransang orang ke lemi semengat.’ (2 Korint 7:6) Taja pan Bup Kudus ukai siti bup pasal pengerai ba runding, tang isi dalam bup tu nulung mayuh orang mutarka pengingin ti deka munuh diri. Lalau ari Bup Kudus ke ngena, ulih nulung nuan.
Kati dalam Bup Kudus, kala nyebut pasal orang bukai ke enggai agi idup?
Nama ayat Bup Kudus ke ulih nulung nuan ngelaban pengingin deka mati?
Baka ni enti bisi seiku kaban nuan madahka, “Aku deka mati”?
Nama beberapa iti lalau ari Bup Kudus ti ngena?
● Padah ngagai orang bukai pasal asai ati nuan.
Lalau ari Bup Kudus: “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku Dalam 17:17.
Reti: Kitai begunaka tulung ari orang bukai, lebuh kitai bisi runding ti enda manah ketegal napi sekeda penusah.
Enti nuan selalu nyimpan asai ati ti enda manah, nya baka ma ti amat berat dibai nuan kin kia. Tang, enti nuan mansutka asai ati diri, nuan ulih berasai nyamai agi lalu runding nuan pan baik agi.
Uji tu: Padahka asai ati nuan ngagai seiku ari diri sebilik tauka ngagai seiku kaban ti dikearapka nuan.a Nuan mega ulih nulis surat kena madahka asai ati nuan.
● Ngiga chara berubat.
Lalau ari Bup Kudus: “Orang ke gerai enda begunaka lutur, tang semina orang ke sakit.”—Matthew 9:12.
Reti: Kitai patut ngiga chara berubat enti kitai nemu diri sakit.
Asai ati ti deka munuh diri nya, siti ari tanda penyakit ke bekaul enggau runding tauka asai ati. Penyakit ke baka tu ulih diubat baka penyakit ke bukai. Nuan enda ibuh berasai malu ngiga chara berubat ti betul.
Uji tu: Giga meh lutur ti nemu pasal penyakit tu enggau jampat.
● Ingat meh, Jehovah seruran ibuhka nuan.
Lalau ari Bup Kudus: ‘Ukai enda lima iku burung pipit dijual ngena rega dua sen aja? Tang taja pia, nadai siku sida nya enda dikingatka Petara. . . . Nya alai anang takut. Kita lebih agi berega ari burung pipit!’—Luke 12:6, 7.
Reti: Nuan amat berega ba mata Petara.
Nuan engka ngasaika kediri aja napi penusah tu. Tang, Jehovah nemu penusah nuan. Iya amat ibuhka nuan, taja pan nuan ngasaika enggai idup agi. Masmur 51:17 madah, ‘Petara enggai nulak ati ti baruh, ati ti nesal.’ Petara deka nuan terus idup laban Iya amat sayauka nuan.
Uji tu: Peratika sekeda chunto dalam Bup Kudus ti nunjukka Jehovah amat sayauka nuan. Chunto, nuan ulih macha pelajar 24 bup, “Hampirilah Yehuwa” (Draw Close to Jehovah).
● Besampi ngagai Petara.
Lalau ari Bup Kudus: “Serahka semua pengirau kita ngagai Iya, laban Iya ngibun kita.”—1 Peter 5:7.
Reti: Petara mai nuan mansutka asai ati diri sereta pengirau nuan ngagai Iya.
Petara ulih meri nuan pengelantang sereta pengering kena betan. (Pilipi 4:6, 7, 13) Petara tentu nyaga sida ke minta tulung ari Iya enggau ati ti baruh.—Masmur 55:22.
Uji tu: Seharitu, besampi meh ngagai Petara lalu ngena nama Iya. Nama Iya, Jehovah. Padahka meh asai ati nuan ngagai Iya. (Masmur 83:18) Minta meh tulung ari Petara ngambika Iya nulung nuan betan.
● Gambarka pengadang ti dipadahka dalam Bup Kudus pasal jemah ila.
Lalau ari Bup Kudus: “Pengadang kitai nya nyadika sauh ti tegap ke semengat kitai.”—Hebrew 6:19.
Reti: Taja pan asai ati nuan baka siti perau, ti dipangkaka umbak lalu dianyutka kin kia, tang pengadang ke bisi dalam Bup Kudus ulih nyadika sauh ba nuan. Nya ulih ngasuh asai ati nuan ulih ditagang.
Pengadang nya ukai semina cherita ngapa aja. Tang nya bisi nyebut pasal semaya Petara ti deka ngetuka semua pun pemerinsa kitai.—Pemandang 21:4.
Uji tu: Bacha meh artikel “Pengadang ti Bendar Pasal Jemah Ila” kena belajar mayuh agi pasal pengadang ke bisi dalam Bup Kudus.
● Kereja utai kedeka nuan.
Lalau ari Bup Kudus: “Ati ti selalu lantang ngasuh nuan bepengerai.”—Jaku Dalam 17:22.
Reti: Pengerai ba runding sereta asai ati, ulih nyadi manah agi lebuh kitai ngereja utai ti ulih ngasuh gaga.
Uji tu: Kereja utai kedeka nuan. Chunto, nuan ulih ningaka lagu ti ulih meransang nuan kering agi. Macha utai ti ulih meransang. Tauka ngiga awak ngereja utai ti dikerinduka nuan. Nuan mega ulih berasai gaga enti nulung orang bukai, taja pan utai nya semina mimit aja.—Kereja Rasul 20:35.
● Jaga meh pengerai nuan.
Lalau ari Bup Kudus: “Matihka tubuh beguna.”—1 Timoti 4:8.
Reti: Kitai bulih penguntung enti kitai selalu sesais, ngembuan tinduk ti manah, sereta nyaga chara makai ti manah.
Uji tu: Uji ngena 15 minit aja, bejalai enggau laju.
● Kingatka, asai ati sereta utai bukai ba pengidup kitai ulih berubah.
Lalau ari Bup Kudus: “Indah utai ti deka nyadi pagila deh kita enda nemu.”—James 4:14.
Reti: Taja pan nuan engka napi penusah baka ke nadai chara kena mutarka nya. Tang, engka penusah nya semina enda lama aja.
Enda ngira ni pemesai penusah ke benung ditapi nuan diatu, engka pagila nya ulih berubah. Nya alai, anang meh kelalu jampat putus pengarap tang tapi meh penusah nya enggau liat ati. (2 Korint 4:8) Pengidup nuan engka tusah ke seharitu, tang engka pagila lusa nya ulih berubah. Tang, enti nuan munuh diri, nya enda ulih diubah.
Uji tu: Bacha sekeda chunto orang ke dalam Bup Kudus, ti kala napi penusah nyentukka sida enggai idup agi. Peratika, baka ni pengidup sida berubah nyadi manah agi enggau chara ti enda disangka. Pelajarka sekeda chunto nya.
Kati dalam Bup Kudus, kala nyebut pasal orang bukai ke enggai agi idup?
Kala. Dalam Bup Kudus bisi madahka beberapa iku orang ke enggai idup agi. Tang, Petara enda nganu sida. Iya deka nulung sida. Iya mega tentu deka nulung nuan.
Elijah
● Sapa iya? Elijah nya seiku nabi ti berani. Tang, iya mega kala berasai tusah amat ati. James 5:17 madah, “Elijah endang mensia baka kitai.”
● Nama kebuah iya enggai idup agi? Bisi sekali, Elijah berasai kediri aja, takut, sereta nadai guna. Nya kebuah iya pan minta ngagai Jehovah, “Ambi nyawa aku.”—1 Raja 19:4.
● Nama nulung iya? Elijah mansutka asai ati iya ngagai Petara. Baka ni Petara meransang iya? Petara amat ibuhka Elijah lalu ngayanka pemesai kuasa Iya. Petara mega ngasuh Elijah pechaya, Elijah amat berega lalu milih seiku penulung ti bepengerindu sereta landik ti ulih nulung iya.
▸ Bacha pasal Elijah: 1 Raja 19:2-18.
Jop
● Sapa iya? Jop nya seiku orang ti amat kaya. Iya ngembuan ruang bilik ti besai sereta nyembah Petara ti bendar enggau tetap ati.
● Nama kebuah iya enggai idup agi? Pengidup Jop berubah enggau enda disadang. Iya lenyau semua reta tengkira. Semua anak iya mati ketegal pengerusak alam. Iya bisi penyakit ti balat. Pia mega iya dipetenah, semua penusah tu nyadi ketegal iya. Jop madahka, “Aku enggai agi idup. Aku nyau lelak idup.”—Jop 7:16.
● Nama nulung iya? Jop besampi ngagai Petara lalu mansutka asai ati iya ngagai orang bukai. (Jop 10:1-3) Elihu meransang Jop. Iya seiku kaban ti kasih meda penusah Jop. Elihu nulung Jop ngembuan runding ti betul. Utai ti pemadu beguna, Jop empu deka nerima tulung sereta lalau ari Petara.
▸ Bacha pasal Jop: Jop 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● Sapa iya? Moses nya seiku ari orang ke ngiring bansa Israel kelia suba. Iya mega seiku ari nabi ti tetap ati.
● Nama kebuah iya enggai idup agi? Moses megai mayuh pengawa. Mayuh orang enda ngetu-ngetu mutap pasal iya. Iya berasai lelak amat. Nya kebuah iya madah ngagai Petara, “Kasihka aku lalu bunuh aku.”—Penyampau 11:11, 15.
● Nama nulung iya? Moses madahka Petara utai ti diasaika iya. Petara nulung Moses ngurangka pengawa iya ngambika iya enda kelalu berasai tusah ati.
▸ Bacha pasal Moses: Penyampau 11:4-6, 10-17.
a Enti nuan bisi asai ati ti balat deka munuh diri lalu enda ulih ngiga diri sebilik tauka bala pangan, talipun meh ngagai piak ti bekuasa ke ulih nulung.