Matahka Tangkai Gandum lebuh Hari Sabat

Jesus enggau bala murid iya benung bejalai nuju ngagai Galili. Maya nya musin bungai, nyadi ladang gandum udah mansau. Ketegal bala murid Jesus lapar, nya alai sida matahka tangkai gandum lalu makai igi gandum nya. Tang maya nya Hari Sabat, lalu orang Parisi meda utai ti digaga sida.

Sebedau tu, orang Judah ba Jerusalem deka munuh Jesus laban sida nuduh iya ngelanggar Adat Hari Sabat. Diatu orang Parisi nuduh bala murid Jesus ketegal utai ke digaga sida. Ku sida madah: “Peda nuan! Sida murid nuan ngereja utai ti enda diasuh Adat lebuh Hari Sabat.”—Matthew 12:2.

Ba orang Parisi, matahka tangkai gandum sereta ngusuk iya ngena jari sama enggau pengawa ngetau sereta ngindik gandum. (Pemansut 34:21) Runding orang Parisi pasal Hari Sabat kelalu terit sereta ngenusahka orang. Kebendar iya, Hari Sabat nya hari ti ngagaka ati laban nya meh peluang alai orang ngeringka pengarap pangan diri. Iya ke amat, runding orang Parisi bekaul enggau Adat Hari Sabat enda sejalai enggau peneka Jehovah. Nya alai, Jesus ngena dua iti chunto kena ngemetulka runding sida.

Chunto ti keterubah nya pasal David enggau bala iya. Lebuh sida lapar, sida ngagai Langkau Sembiang lalu makai roti ti udah diberi ngagai Petara. Roti ke diempa sida udah diambi ari Langkau Sembiang lalu diganti enggau roti ti baru. Kesuah iya, semina bala imam aja dikemendarka makai roti nya. Tang, David enggau bala iya enda diukum taja pan sida makai roti ti udah diberi ngagai Petara.—Adat Lewi 24:5-9; 1 Samuel 21:1-6.

Bekaul enggau chunto ti kedua, Jesus madahka: “Kati kita nadai kala macha dalam Adat, sida imam enda dikumbai salah, taja pan sida bekereja ba Rumah Sembiang maya Hari Sabat?” Taja pan maya Hari Sabat, bala imam agi nyayat jelu ke dikena meri pemeri sereta ngereja pengawa bukai ba Rumah Sembiang. Lalu ku Jesus madah: “Aku madah ngagai kita: Ba ditu, bisi siku orang ke mulia agi ari Rumah Sembiang.”—Matthew 12:5, 6; Penyampau 28:9.

Sekali agi, Jesus ngena ayat Bup Kudus nekanka ajar ke deka dikenataika iya: “Tang enti kita nemu reti jaku tu: ‘Aku deka kita kasihka orang ari ke meri pemeri ngagai Aku,’ kita tentu enda nyalahka orang ke nadai penyalah. Laban Anak Mensia, Tuan ke bisi kuasa atas Hari Sabat.” Jesus nyebut pasal Perintah Seribu Taun ke penuh enggau pengelantang ba jemah ila.—Matthew 12:7, 8; Hosea 6:6.

Mensia udah lama merinsa ketegal di baruh kuasa Sitan ke penuh enggau perang sereta mayuh macham penyai. Tang semua nya deka berubah lebuh Seribu Taun Jesus Merintah ba jemah ila. Maya nya, iya deka meri kitai pengelantang sereta pemaik ke dikedekaka kitai semua!