Nama Patut Digaga maya Hari Sabat?

Ba Hari Sabat ke siti agi, Jesus ngagai balai gempuru ke engka bisi ba Galili. Ba dia, iya betemu enggau siku lelaki ke mati jari sepiak. (Luke 6:6) Bala penulis Adat enggau orang Parisi bebendar beratika Jesus maya nya. Nama kebuah? Tuju ati sida ulih dipeda ari tanya sida ngagai Jesus. Ku sida: “Kati nya ngelanggar Adat enti kitai ngeraika orang maya Hari Sabat?”—Matthew 12:10.

Tuai pengarap orang Judah madahka sesiku orang semina ulih ngeraika orang bukai enti nyawa orang nya dalam bahaya. Ambika chunto, sesiku orang engka patah tulang tauka teseliuh maya Hari Sabat. Tang maya nya, iya enda ulih malut begian ke teseliuh tauka patah nya. Pengawa ke baka nya dikira ngelanggar Adat Hari Sabat. Tu ketegal situasi orang nya enda nganu nyawa iya. Nya alai bala penulis Adat enggau orang Parisi nanya Jesus munyi nya, ukai ketegal sida ibuhka lelaki ke mati jari sepiak nya. Tang sida deka ngiga kebuah nuduh Jesus.

Taja pia, Jesus nemu tuju ati sida ti jai. Iya nemu sida bisi runding ti enda masuk akal, sereta enda sejalai enggau prinsip Bup Kudus ke bekaul enggau pengawa ti enda ulih digaga maya Hari Sabat. (Pemansut 20:8-10) Sebedau tu, Jesus mega kala dituduh ngelanggar Adat Hari Sabat laban iya ngereja pengawa ti manah. Tang diatu Jesus deka ngemetulka runding sida. Nya alai iya madah ngagai lelaki ke mati jari sepiak nya: “Angkat, lalu mansang ke tengah.”—Mark 3:3.

Udah nya Jesus madah ngagai bala penulis Adat enggau orang Parisi: “Enti kita bisi siku jelu bedus ke labuh ngagai lubang maya Hari Sabat, endaka kita deka ngulihka jelu nya ari lubang nya?” (Matthew 12:11) Suba, orang nupi bedus ngambika ulih dijual. Nyadi enti sida ninggalka bedus dalam lubang nyentukka hari siti, bedus nya ulih mati lalu nya deka ngasuh orang rugi. Pia mega, Bup Kudus madahka: “Orang ke menyana nemu ngintu jelu tupi sida.”—Jaku Dalam 12:10.

Chunto ke disebut Jesus masuk akal. Udah nya Jesus madahka: “Mensia jauh berega agi ari bedus! Nya alai, kitai enda ngelanggar Adat enti kitai ngereja pengawa ti manah maya Hari Sabat.” (Matthew 12:12) Nyadi, Jesus enda ngelanggar Adat Hari Sabat enti iya ngeraika lelaki nya. Tuai pengarap orang Judah enda ulih nyangkal utai ke disebut Jesus. Utai ke disebut iya masuk akal, sereta ngayanka pengibuh ngagai orang. Ketegal nya, sida enda bemunyi.

Jesus ringat sereta tusah ati laban sida ngembuan runding ti salah. Jesus lalu madah ngagai lelaki nya: “Unjurka jari nuan.” (Matthew 12:13) Lelaki nya ngunjurka jari iya lalu jari iya gerai. Tu tentu ngasuh lelaki nya amat gaga ati, tang baka ni enggau sida ke deka nuduh Jesus?

Orang Parisi enda gaga ati meda jari lelaki nya gerai. Sida pansut lalu enggau jampat baum tekala nya “enggau bala nembiak Herod, ngiga chara kena munuh Jesus.” (Mark 3:6) Bala nembiak Herod nya siti parti politik lalu sida nyengkaum orang ke datai ari raban pengarap ke dikumbai Saduki. Iya ke amat, orang Saduki enggau orang Parisi bemunsuh enggau pangan diri. Tang diatu sida sepakat ngelaban Jesus.