Jesus Ngeraika Siku Anak Indu enggau Siku Lelaki ke Bengal

Pengudah iya ngutuk orang Parisi, Jesus mupuk enggau bala murid iya ngagai nengeri Tirus sereta Sidon, ba Finisia.

Ba dia, Jesus diau ba siti rumah tang iya enggai orang nemu iya udah datai. Taja pia, orang agi nemu penatai iya. Maya nya, bisi siku indu bansa Gerika ke datai ari Finisia mansang ngagai Jesus lalu madahka: “Kasihka aku, Tuan, Anak David. Anak indu aku balat merinsa ketegal dirasuk melikat ti jai.”—Matthew 15:22; Mark 7:26.

Nyau kelama, bala murid Jesus madah ngagai iya: “Asuh indu nya pulai, laban iya rauh-rauh betitihka kitai.” Jesus nyaut indu nya sereta nerangka kebuah iya nulak peminta indu nya. Ku iya: “Aku udah diasuh datai semina ngagai orang Israel, ke baka bedus ti tesat.” Tang indu nya enda putus asa, iya datai lalu besugang di mua Jesus madahka: “Tuan, tulung meh aku!”—Matthew 15:23-25.

Jesus engka deka nguji pengarap indu nya. Nya alai Jesus madahka: “Aku enda patut ngambi pemakai ari anak mit, lalu nikauka iya ngagai anak ukui.” (Matthew 15:26) Lebuh Jesus ngena rambai jaku “anak ukui,” iya nunjukka diri kasihka orang ke ukai bansa Judah. Mua sereta chara Jesus bejaku tentu nunjukka pengibuh iya.

Taja pia, indu nya enda ringat enggau utai ke disebut Jesus pasal ulah orang Judah ke bepilih mata enggau orang bansa bukai. Nya alai, iya nyaut Jesus enggau baruh ati. Ku indu nya: “Nya endang amat, Tuan, tang indah anak ukui deh makai teda pemakai ti labuh ari mija tuan iya.” Jesus nemu indu nya ikhlas lalu iya amat baruh ati. Nyadi Jesus madah: “Endu, besai amat pengarap nuan. Utai ti dikedekaka nuan, deka nyadi.” (Matthew 15:27, 28) Tekala nya, anak indu nya gerai! Lebuh indu nya pulai ke rumah, iya meda anak iya gali ba katil sereta udah gerai. “Melikat ti jai udah pansut ari anak iya”!—Mark 7:30.

Ari Finisia, Jesus enggau bala murid iya bejalai ngagai endur ke semak begian Sungai Jordan. Pengudah nya, sida bejalai nuju ngagai begian utara Danau Galili lalu datai ba Dekapolis. Pengudah nya, sida niki ngagai siti bukit, tang orang mayuh tetemuka sida. Orang ke pinchat, tachat, buta, sereta bisu, dibai ngagai Jesus. Orang mayuh ngengkahka sida ke sakit semak kaki Jesus, lalu iya ngeraika sida. Orang mayuh alit ati meda orang ke sakit digeraika. Nya alai, sida ngemuliaka Petara orang Israel.

Maya nya, Jesus tepedaka siku lelaki ke bengal sereta bisu. Lelaki nya tentu berasai irau laban bisi mayuh orang ba dia. Jesus engka meda lelaki tu berasai balat irau. Nyadi, iya mai lelaki nya jauh ari orang mayuh. Pengudah nya, Jesus ngachukka tunjuk iya ke dalam pending lelaki nya. Pengudah Jesus ngeludah, iya negu dilah lelaki nya. Jesus lalu engkadah ke langit sereta madahka: “Effata,” reti nya, “Tebuka meh!” Tekala nya, lelaki nya ulih ninga lalu ulih bejaku. Tang Jesus nagang orang ari nusui utai ke nyadi tu ngagai orang bukai. Tu ketegal, Jesus deka orang arapka iya bepelasarka utai ke dipeda sereta didinga sida empu, ukai bepelasarka utai ke didinga sida ari orang bukai.—Mark 7:32-36.

Lebuh Jesus ngeraika orang ke sakit, orang mayuh “balat alit ati.” Sida madah: “Semua utai ti digaga iya chukup manah! Iya ngasuh orang ke bengal ulih ninga, lalu ngasuh orang ke bisu ulih bejaku.”—Mark 7:37.