Jesus Ngemesaika Agi Pengawa Nginjil Iya Ba Galili

Ba Kapernaum, Jesus enggau empat iku murid iya amat kisuk sepemanjai hari. Maya lemai hari, orang ba Kapernaum mai orang ke sakit ngagai Jesus ngambika ulih digeraika. Ketegal nya, Jesus nadai masa besampi ngagai Apai iya kediri.

Tumu pagi hari siti, lebuh hari agi petang, Jesus angkat lalu pansut. Iya ngagai siti endur ti sunyi ngambika ulih besampi ngagai Apai iya kediri. Tang bala murid iya nyau sedar Jesus nadai agi enggau sida. Nya alai, “Simon enggau bala murid ke bukai” ngiga Jesus. Engka Peter ke nguluka pengawa ngiga Jesus laban Jesus udah diau ba rumah iya.—Mark 1:36; Luke 4:38.

Lebuh sida udah tetemuka Jesus, Peter madahka: “Semua orang ngiga nuan.” (Mark 1:37) Iya ke amat, orang ba Kapernaum deka Jesus terus diau ba dia. Sida amat beterima kasihka semua pengawa ke udah digaga Jesus ba dia. Nyadi, sida nguji “nagang iya ninggalka sida.” (Luke 4:42) Tang, kati Jesus datai ke dunya kena ngereja kereja ajih aja? Lalu kati iya semina deka nginjil ngagai orang ba Kapernaum aja? Nama dipadah Jesus pasal utai tu?

Jesus nyaut bala murid iya: “Aram kitai ngagai endur bukai, ngagai nengeri ke enda jauh ari tu, ngambika aku mega ulih nusui Berita Manah ba din. Laban nya meh tuju aku datai.” Jesus mega bejaku munyi tu ngagai sida ke ngasuh iya terus diau ba Kapernaum: “Aku mega patut nusui Berita Manah pasal Perintah Petara ba endur bukai. Laban nya tuju aku dikirumka.”—Mark 1:38; Luke 4:43.

Nya alai, siti ari kebuah Jesus datai ke dunya nya, laban iya deka nginjil pasal Perintah Petara. Perintah Petara deka nguduska nama Jehovah lalu mutarka semua penanggul mensia. Kereja ajih ke digaga Jesus nyadika bukti kena nunjukka iya dianjung Petara. Beratus taun sebedau nya, enggau chara ti sama, Moses mega ngereja kereja ajih kena nunjukka iya dianjung Petara.—Pemansut 4:1-9, 30, 31.

Nyadi, Jesus mupuk ari Kapernaum lalu nginjil ba nengeri bukai enggau empat iku murid iya. Seminggu sebedau nya, Jesus udah mai sida, iya nya Peter enggau menyadi iya, Andrew sereta John enggau menyadi iya, James nginjil penuh jam enggau iya.

Pengawa nginjil Jesus ba Galili enggau empat iku murid iya udah mujur! Berita pasal Jesus udah ngelekai ngagai mayuh endur. Bup Kudus madahka “berita pasal iya ngelekai ba serata menua Siria” nyentuk ngagai sepuluh buah nengeri ke dikumbai Dekapolis, enggau ngagai menua ba seberai Sungai Jordan. (Matthew 4:24, 25) Orang mayuh ari endur nya nyengkaum ari menua Judea, nitihka Jesus enggau murid iya. Mayuh orang mai sida ke sakit ngagai Jesus ngambika iya ulih ngeraika sida. Jesus pan ngeraika sida ke sakit sereta sida ke dirasuk bala melikat ti jai.