Jesus Ngutuk Bala Tuai Pengarap

Bala tuai pengarap enda mujur manjuk Jesus tauka nyerahka iya ngagai perintah Rome. (Luke 20:20) Diatu, maya 11 Nisan lebuh Jesus agi ba Rumah Sembiang, iya nanya sida: “Nama penemu kita pasal Kristus? Iya anak sapa?” (Matthew 22:42) Orang Judah nemu Kristus, tauka Messiah nya, siku ari peturun David. Nya alai sida nyaut, iya anak David.—Matthew 9:27; 12:23; John 7:42.

Jesus lalu nanya: “Enti pia, baka ni ku David, ari iring kuasa kudus, ngumbai Kristus nya Tuan, laban David empu ke nyebut, ‘Ku Jehovah bejaku enggau Tuan aku: “Duduk ba sepiak kanan Aku, datai ke Aku udah ngengkahka bala munsuh nuan ba baruh kaki nuan”’? Enti David ngumbai iya Tuan, baka ni ku iya tau nyadi anak David?”—Matthew 22:43-45.

Orang Parisi enda ulih nyaut Jesus. Kebendar iya, sida ngarapka siku ari peturun David ulih nyadi raja, sereta ngelepaska sida ari kuasa perintah Rome. Tang nitihka jaku David ba Masmur 110:1, 2, Jesus nunjukka Messiah enda baka pemerintah mensia. Iya lebih agi ari nya. Messiah nya Tuan David, lalu iya deka merintah ari sepiak kanan Petara.

Udah nya, Jesus madah jaku tangkan ngagai bala murid sereta orang bukai ke bisi ba dia pasal bala penulis Adat, sereta orang Parisi ke “udah milih diri empu ngambi penuduk Moses” kena ngajar Adat Petara. Ku Jesus madah: “Kereja sebarang utai ti diasuh sida gaga kita, tang anang nitihka pengawa sida, laban sida enda nitihka utai ke diajar sida empu.”—Matthew 23:2, 3.

Jesus madahka sekeda utai ke digaga sida ti nunjukka sida bepura-pura aja: “Peda pemesai utai ke alai sida nyimpan ayat Bup Kudus ti dikena sida nyadika jimat!” Sekeda orang Judah ngena kutak ti mit ke bisi sekeda ayat ari Adat Moses ba kening tauka ba lengan sida. Orang Parisi ngena kutak ke besai agi ngambika ulih nunjukka sida amat ransing nitihka Adat. Pia mega Jesus madah pasal ‘pemanjai buchai gari sida.’ Nitihka Adat, orang Israel patut ngaga buchai ba ujung gari sida. Tang orang Parisi sengaja ngaga buchai gari sida amat panjai. (Penyampau 15:38-40) Sida ngereja nya laban “minta diri dipeda orang mayuh.”—Matthew 23:5.

Bala murid Jesus engka ulih dipengaruh enggau ulah bala tuai pengarap ke ngemeratka penuduk ti tinggi. Nya alai, Jesus meri jaku lalau tu ngagai bala murid iya: “Kita anang nerima gelar Rabbi, laban kita semina bisi siku aja Pengajar, lalu semua kita diri menyadi magang. Pia mega, anang ngumbai orang ba dunya tu apai, laban kita semina bisi siku aja Apai, Iya ke ba serega. Anang mega nerima gelar kepala, laban kita semina bisi siku aja Kepala, iya nya Kristus.” Nyadi, nama runding ke patut dikembuan bala murid? Jesus madahka: “Orang ke pemadu besai ba bala kita patut ngintu kita. Barang sapa ke ngeninggika diri, deka dikemaruhka, lalu barang sapa ke ngemaruhka diri, deka ditinggika.”—Matthew 23:8-12.

Udah nya, Jesus ngutuk bala penulis Adat enggau orang Parisi: “Tulah meh kita penulis Adat enggau orang Parisi. Kita orang ke pura-pura ngapa! Kita nutup pintu Perintah serega ba mua orang mayuh. Kita empu enda tama, tang kita mega nagang orang bukai tama.”—Matthew 23:13.

Jesus ngutuk orang Parisi laban sida enda bebasaka utai ti penting agi ba runding Jehovah. Ambika chunto, sida madah: “Enti orang besumpah atas nama Rumah Sembiang, iya tau enda ibuh ngamatka sumpah iya. Tang enti iya besumpah atas nama emas ke ba Rumah Sembiang, iya patut ngamatka sumpah iya.” Nyadi sida ngemeratka agi emas ba Rumah Sembiang, tang sida enda beberatka agi utai ti penting ke bekaul enggau Rumah Sembiang, alai sida nyembah Jehovah sereta datai semak ngagai Iya. Lalu sida “enda beberatka utai ke beguna agi ba Adat, baka pengelurus, pengasih, enggau pengarap.”—Matthew 23:16, 23; Luke 11:42.

Jesus madah ngagai orang Parisi: “Kita malin ke buta! Kita muai kerengit ari ai irup kita, tang kita nelan unta!” (Matthew 23:24) Nitihka Adat Petara, kerengit dikumbai enda tuchi. Nya alai, sida muai nya ari ai irup sida. Tang, lebuh sida enda bebasaka pekara ti penting agi dibaruh Adat, sida baka ke benung nelan unta ke mega siti jelu ke dikumbai enda tuchi.—Adat Lewi 11:4, 21-24.