Penerang ke Bup Kereja Pengidup enggau Pengawa Kristian
5-11 MAC
RETA ARI BUP KUDUS | MATTHEW 20-21
“Barang Sapa Deka Nyadi Orang ke Besai ba Bala Kita, Enda Tau Enda Nyadi Kuli Semua Kita”
(Matthew 20:3) Iya mupuk baru ke pasar ba urung pukul semilan, lalu tepedaka sekeda orang ke lelaki beketegir ngapa enda gawa.
media nwtsty
Pasar
Baka ke dipeda ba Bup Kereja Pengidup enggau Pengawa Kristian, sekeda pasar bisi ba sepemanjai jalai. Orang ke bejual nyimpan barang ba jalai nyentukka sida mempang jalai orang ke nengah jalai nya. Orang ke ba menua nya ulih meli benda, perengka kaca, pemakai enggau barang ke dikena ba rumah. Laban sekeda utai enda ulih disimpan lama, nya alai sida patut ke pasar ninting hari bebelika utai. Orang ke bebeli barang ba pasar ulih ninga berita ke dibai orang ke bedagang tauka orang ke datai ari endur bukai. Ba pasar nya mega bisi bala anak mit ke bemain sereta orang ke begigaka kereja. Kelimpah ari nya, Jesus kala ngeraika orang ti sakit ba pasar, lalu Paul mega bejalaika pengawa nginjil ba pasar. (SKR. 17:17) Tang bala pengajar Adat enggau orang Parisi ti sumbung rindu dipeda sereta dibasa orang mayuh ba endur nya.
(Matthew 20:20, 21) Udah nya bini Sebedi datai ngagai Jesus, mai anak lelaki iya ke dua iku. Iya besugang di mua Jesus, lalu minta iya ngereja siti utai. 21 Jesus lalu nanya iya, “Nama utai dipinta nuan?” Ku bini Sebedi nyaut, ‘Awakka anak aku dua iku tu duduk muak ari kanan enggau ari kiba nuan dalam Perintah nuan.’
nota pelajar nwtsty ke Mat. 20:20, 21
bini Sebedi: Iya indai rasul James enggau John. Nitihka Bup Mark, James enggau John ke datai ngagai Jesus. Seduai iya ngasuh Salomi, indai seduai iya, minta penuduk nya ari Jesus. Salomi nya engka ibu Jesus.—Mat. 27:55, 56; Mrk. 15:40, 41; Jhn. 19:25.
duduk muak ari kanan enggau ari kiba nuan: Dua iti penuduk tu nunjukka basa enggau kuasa, tang basa ti besai ke suah agi ba muak ari kanan.—Mas. 110:1; SKR. 7:55, 56; Rom. 8:34.
(Matthew 20:25-28) Tang Jesus ngangauka sida, lalu bejaku, “Kita nemu, orang ke merintah orang bansa bukai, nekanka pengidup orang ke dipegai sida, lalu bala tuai sida merinsaka sida. 26 ‘Tang ba kita utai nya enda baka nya. Barang sapa deka nyadi orang ke besai ba bala kita, enda tau enda nyadi kuli semua kita, 27 lalu barang sapa deka nyadi dulu ba bala kita, enda tau enda nyadi ulun kita, 28 baka Anak Mensia ke datai ukai minta diri dibela, tang laban iya deka mela, lalu nyerahka nyawa diri kena nebus orang mayuh.”
nota pelajar nwtsty ke Mat. 20:26, 28
kuli: Tauka “ulun.” Bup Kudus selalu ngena leka jaku Gerika di·aʹko·nos kena nunjuk ngagai orang ti seruran ngereja pengawa enggau baruh ati ke orang bukai. Leka jaku tu dikena ngambarka Kristus (Rom. 15:8), ulun Kristus (1 Kor. 3:5-7; Kol. 1:23), penulung gempuru (Plp. 1:1; 1 Tim. 3:8), orang gaji (Jhn. 2:5, 9) enggau bala pemesai perintah (Rom. 13:4).
ukai minta dibela, tang laban iya deka mela: Tauka “ukai minta diintu, tang ngintu.”
Ngulihka Penemu Bup Kudus ti Berega
(Matthew 21:9) Lalu bala orang ke bejalai dulu ari iya enggau ke ngentudika iya manjung: ‘Hosanna ke Anak David! Beberekat meh iya ke datai dalam nama Jehovah! Hosanna ba serega ti pemadu tinggi!’
nota pelajar nwtsty ke Mat. 21:9
Hosanna: Leka jaku Gerika tu datai ari rambai jaku Hebrew ke meri reti “selamatka, kami besampi” tauka “selamatka, tulung meh.” Rambai jaku tu dikena lebuh minta Petara nyelamatka tauka ngelepaska lalu ulih disalin nyadi “tulung, meri pengelepas ngagai [Anak David].” Nyau kelama, rambai jaku tu dikena ba sampi enggau jaku puji. Rambai jaku Hebrew tu ulih ditemu ba Mas. 118:25, sebagi ari lagu ba Masmur 113-118 ke suah dipelaguka maya musin Pengerami Paska. Nya alai maya musin Pengerami Paska, rambai jaku tu suah ba runding orang mayuh. Siti chara Petara nyaut sampi kena nyelamatka Anak David iya nya enggau ngidupka iya baru. Ba Mat. 21:42, Jesus ngambi ayat ari Mas. 118:22, 23 lalu madahka tu pasal Messiah.
Anak David: Rambai jaku tu nunjukka ari ni penatai Jesus sereta pengawa iya ke nyadi Messiah ti disemaya.
(Matthew 21:18, 19) Lebuh iya mulaika diri ngagai nengeri tumu pagi hari siti, iya lapar. 19 Iya tepedaka sepun kayu ara ba tisi jalai. Iya lalu mansang ngagai kayu nya. Tang iya nadai nemu utai dia, semina daun aja. Lalu ku iya bejaku ngagai kayu nya, “Awakka nuan enda agi bebuah!” Kayu ara nya lalu layu tekala nya.
jy 244 ¶4-6
Belajar Pasal Pengarap Ari Pun Kayu Ara
Tang nama kebuah Jesus ngasuh pun kayu nya mati? Iya madahka kebuah: ‘Enggau bendar aku madah ngagai kita, enti kita arap lalu enda kakang ati, kita ulih ngereja utai ti udah dikereja aku ngagai kayu ara tu. Lalu ukai semina nya aja, tang kita ulih bejaku ngagai bukit tu, “Angkat nuan lalu buai diri empu ngagai tasik,” lalu utai nya deka nyadi. Enti kita arap, kita deka nerima sebarang utai ti dipinta kita dalam sampi.’ (Matthew 21:21, 22) Enggau tu iya nandu utai ti udah disebut iya, pasal pengarap ke ulih mindahka bukit.—Matthew 17:20.
Lebuh iya ngasuh pun kayu nya mati, Jesus deka ngajar kitai pengarap ngagai Petara nya amat beguna. Ku iya: “Sebarang utai ti dipinta kita ngena sampi, arapka diri udah nerima utai nya, lalu utai nya deka diberi ngagai kita.” (Mark 11:24) Ajar ari Jesus amat beguna ke bala nembiak iya. Tu endang ngena laban bala rasul deka napi penguji enda lama da agi. Tang bisi kaul ke bukai entara pun kayu ara ti mati enggau pengarap.
Baka pun kayu ara tu, bansa Israel mandangka ulah ti pepura. Sida ngaga sempekat enggau Petara lalu sida baka ke nitihka Adat Iya. Taja pia, bansa tu nunjukka kurang pengarap sereta nadai ngembuan kualiti ti manah. Sida indah enda nerima Anak Petara! Nya alai enggau ngasuh pun kayu ara nya mati, Jesus nunjukka utai ti deka nyadi ngagai bansa ke enda arap tu.
Macha Bup Kudus
(Matthew 20:1-19) “Laban Perintah serega nya baka orang siku ke mupuk tumu pagi ngiga orang ke tau digaji iya gawa ba kebun anggur iya. 2 Lebuh iya udah besetuju deka meri gaji sesingkap duit pirak sehari ngagai siku-siku sida, iya lalu ngasuh sida bekereja ba kebun anggur iya. 3 Iya mupuk baru ke pasar ba urung pukul semilan, lalu tepedaka sekeda orang ke lelaki beketegir ngapa enda gawa. 4 Iya lalu bejaku ngagai sida, “Alai kita gawa ba kebun anggur. Aku deka meri kita gaji ti patut.” Sida lalu mupuk. 5 Iya ngereja baka nya baru ba urung pukul dua belas, enggau ba urung pukul tiga. 6 Ba urung pukul lima, iya bejalai ke pasar, lalu tepedaka sekeda lelaki ti bukai mengkang beketegir enda gawa. Lalu ku iya bejaku ngagai sida, “Nama kebuah kita masau jam sehari-hari tu enda gawa?” 7 Sida lalu nyaut, “Laban orang nadai ngasuh kami gawa.” Ku iya bejaku ngagai sida, “Alai kita gawa ba kebun anggur.” 8 “Lebuh hari nyau lemai, orang ke bempu kebun nya lalu madah ngagai mandur, “Kangauka bala orang gaji lalu bayar gaji sida, belabuh ari sida ke pemadu dudi, nyentuk ngagai sida ke pemadu dulu.” 9 Lebuh orang gaji ke berengkah gawa ari pukul lima datai, sida lalu dibayar sesingkap duit pirak siku. 10 Lebuh orang ke pemadu dulu gawa datai, sida ngumbai diri deka nerima gaji ti besai agi. Tang sida mega diberi sesingkap duit pirak siku. 11 Lebuh sida nerima gaji nya, sida lalu mut-mut ngagai orang ke ngaji sida. 12 Ku sida, “Orang ke pemadu dudi semina bekereja sejam aja, lalu nuan udah ngaga gaji sida sebaka enggau gaji kami ke udah bekereja sehari-hari tu natka diri laban panas.” 13 Tang ku iya nyaut sida, “Unggal, nadai aku ngakal nuan. Ukai enda nuan empu ke besetujuka gaji sesingap duit pirak? 14 Ambi gaji nuan, lalu pulai. Aku empu ke meri gaji ngagai orang ke pemadu dudi tu ngenyampau ti diberi aku ngagai nuan. 15 Kati aku enda tau ngena duit aku sepeneka ati aku? Tauka nuan kepapas meda aku gerah mudah meri utai ngagai orang?” 16 Nya alai, orang ke dudi deka nyadi dulu, lalu orang ke dulu deka nyadi dudi.” 17 Lebuh Jesus mansang ngagai Jerusalem, iya mai murid ke dua belas iku ke tisi lebuh sida benung di rantau jalai, lalu bejaku ngagai sida, 18 “Dinga kita, kitai deka mupuk ngagai Jerusalem, lalu Anak Mensia deka diserahka ngagai bala tuai imam, enggau ngagai bala pengajar Adat, lalu sida deka ngasuh iya diukum bunuh. 19 Sida deka nyerahka iya ngagai orang bansa bukai, ti deka beduan iya, nyipat iya, lalu ngeregang iya. Tang ba hari ti ketiga iya deka diangkatka idup baru.”
12-18 MAC
RETA ARI BUP KUDUS | MATTHEW 22-23
“Ngasika Dua Iti Pesan ti Pemadu Besai”
(Matthew 22:36-38) “Pengajar, ni pesan ti pemadu besai dalam Adat?” 37 Ku Jesus bejaku ngagai iya, ‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ 38 Tu pesan ti keterubah sereta pemadu besai.
nota pelajar nwtsty ke Mat. 22:37
ati: Lebuh dikena ngambarka sesiti utai, “ati” ditujuka ngagai sapa orang nya ke bendar. Lebuh disebut begulai enggau “semengat” sereta “runding,” “ati” mai reti emosi, pengingin sereta asai ati. Tiga iti leka jaku ke dikena (ati, semengat enggau runding) enda mayuh bida ari pangan diri. Tang tiap iti leka jaku tu nunjuk ngagai sapa orang nya ke bendar. Kebendar iya, Jesus benung nerangka baka ni kitai patut bisi pengerindu ti pemadu nyulut ke Petara.
semengat: Tauka “pasal semua utai ba seseiku orang.”
runding: Iya nya, penau berunding. Seseiku orang patut ngena penau berunding iya kena ngelala Petara sereta meransang pengerindu iya ngagai Petara. (Jhn. 17:3; Rom. 12:1) Jaku tu ke diambi ari U-dat. 6:5 ngena tiga iti leka jaku Hebrew, ‘ati, semengat enggau pengering.’ Taja pia, bup Matthew ke ditulis dalam jaku Gerika, ngena leka jaku “runding” ukai “pengering.” Bisi beberapa iti kebuah ngena leka jaku ti enda sebaka. Keterubah, nadai jaku ti nyemetak ke “runding” ba jaku Hebrew kelia, tang leka jaku “runding” udah disengkaum ba leka jaku “ati” dalam jaku Hebrew. Dalam leka jaku Hebrew, “ati” mega ulih mai reti semua utai ke bisi ba dalam orang nya empu, nyengkaum runding, asai ati, ulah enggau peransang. (Mas. 26:2; 64:6; peda nota pelajar ke ati ba ayat tu.) Ketegal tu, lebuh teks Hebrew ngena leka jaku “ati,” Septuagint jaku Gerika suah nyalin tu ngagai “runding.” (P-kal. 8:21; 17:17; J-lam. 2:10; Isa. 14:13) Kebuah bukai Matthew ngena leka jaku “runding” ukai “pengering” lebuh ngambi ari bup U-dat. 6:5 iya nya, laban leka jaku “pengering” ba Hebrew nyengkaum pengering ba tubuh enggau penau berunding. Ketegal tu, lebuh penulis Bup Injil ngambi ari bup Ulang Adat, sida enda ngena leka jaku ti sebaka.
(Matthew 22:39, NW) Lalu pesan ti kedua nya sebaka enggau nya: “Rinduka orang ke semak nuan baka nuan ke rinduka diri empu.”
nota pelajar nwtsty ke Mat. 22:39, NW
ti kedua: Ba Mat. 22:37, saut Jesus ngagai orang Parisi bisi ditulis. Tang Jesus ukai aja nyaut tanya nya, iya mega nyebut pesan ti kedua (Lew. 19:18), lalu ngajar baka ni dua iti pesan tu bekaul enggau pangan diri. Dua iti pesan nya nyimpulka semua utai ke disebut ba Adat enggau jaku bala nabi.—Mat. 22:40.
orang ke semak: Leka jaku “orang ke semak” dalam jaku Gerika ukai semina orang ke diau semak aja. Tu mega ulih ditujuka ngagai orang ke enggau betemu.—Luk. 10:29-37; Rom. 13:8-10.
(Matthew 22:40) Semua Adat enggau ajar sida nabi beduduk ba pesan dua iti tu.”
nota pelajar nwtsty ke Mat. 22:40
Adat enggau ajar sida nabi: “Adat” nya ari bup Pemungkal ngagai Ulang Adat. “Ajar sida nabi” ditujuka ngagai Bup Kudus jaku Hebrew ke ditulis bala nabi. Tang, lebuh “Adat enggau ajar sida nabi” disebut begulai, tu ulih mai reti semua bup ba Bup Kudus jaku Hebrew.—Mat. 7:12; 22:40; Luk. 16:16.
beduduk ba: Leka jaku pengawa Gerika tu reti iya “bepegai ba.” Jesus ukai semina madahka Adat enggau Sepuluh iti Pesan, tang semua bup ba Bup Kudus jaku Hebrew beduduk ba pengerindu.—Rom. 13:9.
Ngulihka Penemu Bup Kudus ti Berega
(Matthew 22:21) Sida lalu nyaut, “Enggi Raja Besai.” Iya lalu bejaku ngagai sida, ‘Utai Raja Besai, beri ngagai Raja Besai, utai Petara, beri ngagai Petara.’
nota pelajar nwtsty ke Mat. 22:21
Utai Raja Besai, beri ngagai Raja Besai: Saut Jesus ba ditu sejalai enggau Mrk. 12:17 sereta Luk. 20:25, ke nyebut pasal Raja menua Rome. “Utai Raja Besai” nyengkaum meri basa, tunduk ngagai sida seagi-agi enda ngelaban jaku Petara sereta mayar utai ti disediaka perintah mensia.—Rom. 13:1-7.
Utai Petara, beri ngagai Petara: Tu nyengkaum sembah, pengerindu enggau penaluk ti pengabis ati.—Mat. 4:10; 22:37, 38; SKR. 5:29; Rom. 14:8.
(Matthew 23:24) Kita tu malin ke buta! Kita muai lalat ari ai irup kita, tang kita nelan unta!
nota pelajar nwtsty ke Mat. 23:24
kita muai lalat ari ai irup kita, tang kita nelan unta: Lalat indu utai ti mit sereta unta jelu ti besai ke enda tuchi ba mata orang Israel. (Lew. 11:4, 21-24) Ba ditu Jesus ngena jaku sempama. Iya nyebut bala tuai pengarap napis ai irup sida ngambika enda dikamahka lalat, tang sida enda beberatka utai ti besai agi ba Adat lalu tu disempamaka enggau nelan seiku unta.
Macha Bup Kudus
(Matthew 22:1-22) Jesus lalu bejaku baru ngena jaku sempama ngagai orang mayuh. Ku iya, 2 “Perintah serega tau dibandingka enggau siku raja ke nyendiaka gawai tikah ke anak lelaki iya. 3 Iya ngasuh bala orang gaji iya ngangauka orang ke udah diambi ngabang datai ngagai gawai tikah nya. Tang sida enggai datai. 4 Iya lalu ngasuh bala orang gaji iya ti bukai, ku iya, “Padahka ngagai orang ke udah diambi ngabang: Dinga kita, aku udah nyendiaka pengerami makai besai. Jelu sapi aku, enggau anak sapi aku ti gemu udah disayat, lalu semua utai udah sedia magang. Datai meh kita ngagai gawai tikah!” 5 Tang sida enda tentu ibuhka tesau nya lalu mupuk ngagai endur bukai, siku ke umai, siku ngagai pengawa dagang iya, 6 lalu sida ti bukai nangkap bala orang gaji raja nya, beduan lalu munuh sida. 7 Raja nya lalu ringat. Iya ngirumka bala soldadu iya, munuh bala pemunuh nya, lalu nunu nengeri sida. 8 Udah nya iya bejaku ngagai bala ulun iya, “Gawai tikah udah sedia, tang orang ke udah diambi ngabang enda tau datai. 9 Nya alai bejalai kita ngagai jalai raya lalu ambi ngabang ngagai gawai tikah tu semua orang ke ditemu kita.” 10 Bala ulun iya lalu mansang ngagai semua jalai raya, lalu ngempuruka semua orang ke ditemu sida, orang ke manah enggau orang ke jai. Nya alai balai tikah nya nyau penuh laban bala pengabang. 11 “Tang lebuh raja tama, deka meda bala pengabang, iya tepedaka siku lelaki ke enda ngena pekayan tikah. 12 Iya lalu bejaku ngagai orang nya, “Unggal, baka ni ku nuan tama kitu enda ngena pekayan tikah?” Orang nya lalu nadai nemu jalai bejaku. 13 Udah nya raja lalu bejaku ngagai bala ulun iya, “Berekas kaki jari iya, lalu buai iya ke luar ngagai endur ti petang, alai orang deka nyabak sereta begerit ngeli.” 14 Laban mayuh dikangau, tang mimit aja dipilih.” 15 Udah nya sida orang Parisi mupuk lalu baum deka manjuk Jesus ngena jaku iya empu. 16 Sida lalu ngasuh bala murid sida enggau bala nembiak Herod mansang ngagai Jesus. Ku sida, ‘Pengajar, kami nemu nuan endang madahka utai ti bendar, lalu ngajar utai ti bendar pasal jalai Petara, lalu nuan enda bedulika orang, laban nuan endang enda bedulika sapa-sapa. 17 Nya alai padahka runding nuan ngagai kami. Kati kitai tau mayar chukai ngagai Raja Besai, tauka enda?” 18 Tang Jesus nemu ati sida endang jai. Nya alai iya bejaku, “Nama kebuah kita nguji aku? Kita tu orang ke pura-pura ngapa? 19 Pandangka ngagai aku duit kena mayar chukai!” Sida lalu mai sesingkap duit ngagai iya. 20 Iya lalu nanya sida, “Gambar sapa enggau nama sapa tu?” 21 Sida lalu nyaut, “Enggi Raja Besai.” Iya lalu bejaku ngagai sida, ‘Utai Raja Besai, beri ngagai Raja Besai, utai Petara, beri ngagai Petara.” 22 Lebuh sida ninga nya, sida balat alit ati. Sida lalu ninggalka iya, lalu mupuk ari endur nya.
19-25 MAC
RETA ARI BUP KUDUS | MATTHEW 24
“Mengkang Bejaga ba Pengarap ba Hari ti Penudi”
(Matthew 24:12) Lalu laban penyai deka nambah-menambah, mayuh orang enda agi rinduka pangan diri.
it-2 279 ¶6
Pengerindu
Pengerindu Seseiku Orang Ulih Majak Kurang. Jesus Kristus madahka bala murid iya, pengerindu (a·gaʹpe) orang ke ngaku diri pechaya ngagai Petara deka majak kurang. (Mat. 24:3, 12) Rasul Paul madahka, siti tanda penusah ke deka nyadi iya nya, mensia deka “angkunka duit.” (2 Tim. 3:1, 2) Nya alai, kitai ulih meda seseiku orang deka rinduka utai ti jai lalu pengerindu iya ulih majak lenyau. Kena nyeliahka tu, kitai patut seruran ngayanka sereta ngemansangka pengerindu kitai. Kitai ulih ngereja tu enggau belematika Jaku Petara sereta nitihka prinsip Iya.—Eps. 4:15, 22-24.
(Matthew 24:39) lalu sida nadai nemu utai, nyentuk ngagai maya ai bah datai lalu nabanka semua sida. Baka nya meh gaya penatai Anak Mensia.
w99 15/11 19 ¶5
Kati Nuan Ngereja Semua Tanggungjawap Nuan Ngagai Petara?
5 Ku Jesus Kristus madahka pasal penusah ke nyadi ba jeman kitai: “Baka lebuh maya Noah menya, baka nya meh gaya penatai Anak Mensia. Laban berapa hari sebedau bah besai nyadi, orang majak makai ngirup, jadi melaki-bini, nikah, nyentuk ngagai hari Noah tama ke dalam bandung, lalu sida nadai nemu utai, nyentuk ngagai maya ai bah datai lalu nabanka semua sida. Baka nya meh gaya penatai Anak Mensia.” (Matthew 24:37-39) Pengawa makai enggau ngirup enda salah lalu pengawa jadi melaki-bini nya atur ti bepun ari Petara. (Pemungkal 2:20-24) Tang, enti kitai ngasaika diri kelalu ngenuluka utai ba pengidup, besampi meh pasal pekara tu. Jehovah ulih nulung kitai ngenuluka Perintah Petara, ngereja utai ti ngena sereta ngereja semua tanggungjawap kitai ngagai Iya.—Matthew 6:33; Rome 12:12; 2 Korint 13:7.
(Matthew 24:44) Nya alai kita enda tau enda sedia, laban Anak Mensia deka datai ba jam ti enda disangka kita.
jy 259 ¶5
Bala Rasul Minta Siti Tanda
Jesus madahka bala rasul iya patut mengkang bejaga sereta besedia. Jesus nyebut jaku tangkan tu ngena siti da agi sempama: “Kita enda tau enda nemu tu, enti orang ke bempu rumah nemu kemaya penchuri deka datai, iya tentu deka bejaga lalu enda nejuka rumah iya dirumpak. Nya alai kita enda tau enda sedia, laban Anak Mensia deka datai ba jam ti enda disangka kita.”—Matthew 24:43, 44.
Ngulihka Penemu Bup Kudus ti Berega
(Matthew 24:8) Semua utai tu deka nyadi baka indu ke radai deka beranak.
nota pelajar nwtsty ke Mat. 24:8
baka indu ke radai deka beranak: Taja pan rambai jaku tu dikena ngambarka penusah, pemedis enggau pemerinsa, tang baka pemedis orang ke ngadaka anak, iya mega ulih dikena ngambarka penusah enggau pemerinsa ke majak nambah sebedau penusah ti besai, baka ke dipadahka ba Mat 24:21.
(Matthew 24:20) Besampi kita, ngambika kita ukai rari lebuh musin chelap, tauka lebuh hari Sabat!
nota pelajar nwtsty ke Mat. 24:20
musin chelap: Ujan balat, bah enggau hari ti chelap ba musin tu ngasuh tusah deka bejalai jauh, ngiga pemakai sereta ngiga endur belindung.—Esr. 10: 9, 13.
ba hari Sabat: Ba Judea, atur terit bekaul enggau adat Sabat ngasuh orang tusah deka bejalai jauh sereta bebaika utai. Pia mega, pintu kuta mengkang ditutup maya hari Sabat.—Peda SKR. 1:12 enggau Bahagian 16 Panduan Pembelajaran Firman Tuhan-ML.
Macha Bup Kudus
(Matthew 24:1-22) Jesus pansut ari Rumah Sembiang, lalu lebuh iya benung bejalai ninggalka rumah nya, sida murid iya datai lalu nunjukka ngagai iya semua rumah ti dalam Rumah Sembiang nya. 2 Tang ku iya nyaut sida, “Kita meda semua utai tu. Tang enggau bendar aku madah ngagai kita, nadai sigi batu nya deka mengkang betusun ditu, tang semua deka diruntuhka magang.” 3 Lebuh Jesus duduk ba Bukit Kana, sida murid datai ngagai iya kediri, lalu bejaku, “Padahka ngagai kami, kemaya semua utai tu deka nyadi, lalu nama tanda ti nunjukka nuan deka datai baru, enggau pengujung dunya?” 4 Disaut Jesus, “Bejaga kita, enggai ke orang nesatka kita. 5 Laban mayuh orang deka datai dalam nama aku, ku sida, “Aku tu Kristus!” lalu sida deka nesatka mayuh orang. 6 Lalu kita deka ninga munyi perang, enggau berita pasal perang. Tang anang takut, laban utai nya enda tau enda nyadi, tang pengujung apin datai. 7 Laban bansa siti deka beperang ngelaban bansa siti, lalu menua siti deka beperang ngelaban menua siti, lalu lapar pungkang enggau tanah berenyang deka nyadi ba mayuh bengkah endur. 8 Semua utai tu deka nyadi baka indu ke radai deka beranak. 9 “Udah nya sida deka nangkap kita, merinsaka kita, lalu munuh kita, lalu semua bansa deka begedika kita ketegal nama aku. 10 Udah nya mayuh orang deka ngelengkaka pengarap, lalu nyual pangan diri, sereta begedika pangan diri. 11 Lalu mayuh nabi ti pelesu deka pegari, lalu nesatka mayuh orang. 12 Lalu laban penyai deka nambah-menambah, mayuh orang enda agi rinduka pangan diri. 13 Tang orang ke tan datai ke ujung, deka diselamatka. 14 Lalu Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai. 15 “Nya alai lebuh kita meda utai ti jai, ti balat ngenakutka, ti dikenang nabi Daniel, bediri ba endur ti kudus (awakka orang ke macha meretika utai tu), 16 awakka orang ke diau di Judea rari ngagai bukit. 17 Awakka orang ke ba atas perabung enda nurun ngambi utai ari rumah iya, 18 lalu awakka orang ke di umai, enda nikal lalu ngambi serayung iya. 19 Naka meh penusah indu ke ngandung enggau sida indai ke nusuka anak lebuh maya nya! 20 Besampi kita, ngambika kita ukai rari lebuh musin chelap, tauka lebuh hari Sabat! 21 Laban lebuh maya nya ila penusah ti besai deka nyadi, baka ti nadai udah kala nyadi kenyau ari penumbuh dunya nyentuk ngagai sehari tu, tauka jemah ila. 22 Lalu enti penyampau hari nya enda dikurangka, nadai mensia ulih diselamatka. Tang ketegal bala nembiak ke udah dipilih Petara, penyampau hari nya deka dikurangka.
26 MAC–1 APRIL
RETA ARI BUP KUDUS | MATTHEW 25
“Bejaga Kita”
(Matthew 25:1-6) “Lebuh maya nya ila, Perintah serega tau dibandingka enggau sepuluh iku indu dara, ke mai kelita mansang ngambat lelaki ke deka ditikah. 2 Lima iku ari bala sida nya beli, lalu lima iku pintar. 3 Lebuh sida ke beli mai kelita sida, sida nadai mekal diri enggau minyak, 4 tang sida ke pintar mekal diri enggau minyak ke kelita sida. 5 Lebuh lelaki ke deka ditikah nya laun datai, semua sida ngantuk lalu tinduk. 6 Tang ba urung tengah malam, orang ngangau, “Dinga kita! Tu lelaki ke deka ditikah! Pansut kita lalu ambat iya.”
(Matthew 25:7-10) Indu dara ke sepuluh iku nya angkat lalu nginsur sumbu kelita sida. 8 Sida ke beli lalu bejaku ngagai sida ke pintar, “Beri kami minyak, laban kelita kami nyau deka padam.” 9 Tang ku sida ke pintar nyaut, “Enggai kami! Enggai ke minyak kami enda chukup dibagi enggau kita. Manah kita mansang ngagai kedai lalu meli minyak ke diri empu.” 10 Lebuh sida benung mansang meli minyak, lelaki ke deka ditikah pen datai. Indu ke endang udah sedia nya tama enggau lelaki nya ngagai pengerami gawai tikah. Pintu lalu ditutup.
(Matthew 25:11, 12) “Udah nya sida ti bukai datai, lalu bejaku, “Tuan, tuan! Buka pintu ke kami!” 12 Tang ku lelaki nya nyaut, “Enggau bendar aku madah ngagai kita, aku enda ngelala kita.”
Ngulihka Penemu Bup Kudus ti Berega
(Matthew 25:31-33) “Lebuh Anak Mensia datai dalam mulia iya, lalu semua melikat datai enggau iya, nya baru iya deka duduk ba kerusi diraja iya ti bemulia. 32 Semua bansa deka digempuruka di mua iya, lalu iya deka nyeraraka sida ari pangan diri, baka pengibun bedus ke nyeraraka bedus ari kambin, 33 lalu iya deka ngengkahka orang ke lurus muak ari kanan iya, lalu sida ti bukai, muak ari kiba iya.
Enggau Taluk Nyukung Menyadi Kristus
7 Kemayaharitu, kitai meretika sempama pasal bedus enggau kambin terang agi. Kitai nemu “Anak Mensia” tauka “Raja,” nya Jesus. “Menyadi” Raja nya sida ke diiri ngena roh kudus lalu sida deka merintah ba serega enggau Jesus. (Rom. 8:16, 17) “Bedus” enggau “kambin” nya orang ari semua bansa. Sida deka diakim semak pengujung penusah ti besai. Penusah ti besai tu deka berengkah enda lama da agi. Lalu kitai nemu Jesus deka ngakim orang nitihka chara sida ngintu orang ke diiri ngena roh kudus ke agi ba dunya. Kitai beterima kasih ngagai Jehovah ke udah betaun nulung kitai meretika sempama tu enggau sempama ti bukai ba Matthew bagi 24 enggau 25!
(Matthew 25:40) Lalu Raja nya deka nyaut sida, ‘Enggau bendar aku madah ngagai kita, lebuh kita ngereja utai tu ngagai siku ari menyadi aku ti pemadu mit tu, kita ngereja nya ngagai aku!’
w09 15/10 16 ¶16-18
“Kita Pangan Aku”
16 Enti nuan ngarapka idup ba dunya di baruh Perintah Petara, baka ni nuan ulih nyukung menyadi Kristus? Uji perundingka tiga iti chara. Keterubah, ngereja pengawa nginjil enggau pengabis ati. Menyadi Kristus diasuh nginjil berita manah ba serata dunya. (Mat. 24:14) Tang, menyadi Kristus ke agi ba dunya tusah deka ngereja pengawa tu enti enda ditulung raban bedus ti bukai. Endang amat, tiap kali raban bedus ti bukai enggau pengawa nginjl, sida nulung menyadi Kristus ngereja pengawa ti tuchi. Ulun ti tetap ati sereta bepenemu-dalam beterima kasih ke sukung ti diberi raban bedus ti bukai, pia mega enggau Kristus.
17 Chara kedua raban bedus ti bukai ulih nulung menyadi Kristus iya nya, nyukung pengawa nginjil ba belanja. Jesus meransang nembiak iya ngaga orang nyadika pangan sida ngena “pengaya dunya.” (Luke 16:9) Tu ukai reti iya kitai ulih ngena pengaya meli kaul enggau Jesus tauka Jehovah. Tang, lebuh kitai ngena reta tengkira ngemansangka Perintah Petara, kitai nunjukka kaul enggau pengerindu ukai semina ngena leka jaku, tang “ngena pemendar enggau pengawa ti dikereja kitai.” (1 John 3:16-18) Enti kitai meri sukung ngena duit, tu ulih nulung pengawa nginjil, pengawa ngaga sereta nyeruri palan begempuru sereta pengawa nginjil ba serata dunya. Enda ngira pemeri kitai mayuh tauka mimit, Jehovah enggau Jesus tentu beterima kasih ke penyampau ti diberi kitai enggau ati ti gaga.—2 Kor. 9:7.
18 Chara ketiga raban bedus ti bukai ulih nulung menyadi Kristus iya nya, enggau nitihka iring tuai gempuru ba eklisia. Di baruh iring Kristus, bala tuai gempuru dipilih ngena roh kudus Petara. (Eps. 5:23) Ku rasul Paul, “Ngasika tuai kita, lalu nunduk ngagai sida.” (Heb. 13:17) Kekadang, kitai ngasaika tusah deka ngasika jaku lalau ke diberi bala tuai gempuru ngagai kitai. Kitai engka nemu pengurang sida lalu tu ngachau runding kitai bekaul enggau jaku lalau ke diberi sida. Tang, Kristus ke nyadi Kepala eklisia, lantang ati ngena sida taja pan enda sempurna. Nya alai, kaul kitai enggau Kristus bisi bekaul enggau gaya kitai nerima iring ari sida. Enti kitai ngampunka penyalah bala tuai gempuru lalu nitihka iring ke diberi sida enggau gaga ati, kitai nunjukka diri bisi pengerindu ke Kristus.
Macha Bup Kudus
(Matthew 25:1-23) “Lebuh maya nya ila, Perintah serega tau dibandingka enggau sepuluh iku indu dara, ke mai kelita mansang ngambat lelaki ke deka ditikah. 2 Lima iku ari bala sida nya beli, lalu lima iku pintar. 3 Lebuh sida ke beli mai kelita sida, sida nadai mekal diri enggau minyak, 4 tang sida ke pintar mekal diri enggau minyak ke kelita sida. 5 Lebuh lelaki ke deka ditikah nya laun datai, semua sida ngantuk lalu tinduk. 6 Tang ba urung tengah malam, orang ngangau, “Dinga kita! Tu lelaki ke deka ditikah! Pansut kita lalu ambat iya.” 7 Indu dara ke sepuluh iku nya angkat lalu nginsur sumbu kelita sida. 8 Sida ke beli lalu bejaku ngagai sida ke pintar, “Beri kami minyak, laban kelita kami nyau deka padam.” 9 Tang ku sida ke pintar nyaut, “Enggai kami! Enggai ke minyak kami enda chukup dibagi enggau kita. Manah kita mansang ngagai kedai lalu meli minyak ke diri empu.” 10 Lebuh sida benung mansang meli minyak, lelaki ke deka ditikah pen datai. Indu ke endang udah sedia nya tama enggau lelaki nya ngagai pengerami gawai tikah [pengerami, NW]. Pintu lalu ditutup. 11 “Udah nya sida ti bukai datai, lalu bejaku, “Tuan, tuan! Buka pintu ke kami!” 12 Tang ku lelaki nya nyaut, “Enggau bendar aku madah ngagai kita, aku enda ngelala kita.” 13 Nya alai bejaga kita, laban kita enda nemu hari tauka jam.” 14 “Laban Perintah serega nya baka orang siku ke baru deka bejalai ngagai menua bukai. Iya ngangauka bala orang gaji iya, lalu ngasuh sida ngemataka reta tengkira iya. 15 Ngagai siku iya nyerahka lima ribu singkap duit emas, ngagai siku ti bukai dua ribu singkap, lalu ngagai siku, seribu singkap, nitihka pengelandik sida siku-siku. Udah nya iya mupuk. 16 Orang gaji ke nerima lima ribu singkap lalu tekala nya bedagang ngena duit nya, lalu bulih untung lima ribu singkap. 17 Baka nya mega orang gaji ke nerima dua ribu singkap. Iya bulih untung dua ribu singkap. 18 Tang orang gaji ke nerima seribu singkap mupuk, numbak lubang ba tanah lalu ngelalaika duit tuan iya dalam lubang tanah nya. 19 “Nyau kelama udah bekau nya, tuan sida datai, lalu ngira akaun enggau sida. 20 Lalu orang gaji ke nerima lima ribu singkap datai, mai lima ribu singkap nambahka nya. Ku iya, “Tuan, nuan udah nyerahka ngagai aku lima ribu singkap duit. Tu lima ribu singkap untung ti udah ulih aku.” 21 Ku tuan iya bejaku ngagai iya, “Manah pengawa nuan! Nuan tu orang gaji ke manah sereta tetap ati. Nuan tau dikarapka ngemataka utai ti mimit, nya alai aku deka ngasuh nuan ngemataka utai ti mayuh. Tama ke dalam lalu sama gaga ati enggau aku!” 22 Udah nya orang gaji ke udah nerima dua ribu singkap duit datai, lalu bejaku, “Tuan, nuan udah nyerahka ngagai aku dua ribu singkap duit. Tu dua ribu singkap untung ti ulih aku.” 23 Ku tuan iya bejaku ngagai iya, “Manah pengawa nuan! Nuan tu orang gaji ke manah sereta tetap ati! Nuan udah tau dikarapka ngemataka utai ti mimit, nya alai aku deka ngasuh nuan ngemataka mayuh utai. Tama ke dalam lalu sama gaga ati enggau aku!”