Jesus Dipantang ba Tiang

Jesus dibai ngagai endur alai iya enggau dua iku perumpak deka diukum bunuh. Endur nya dikumbai Golgota, tauka Endur Kerubung Pala. Endur nya ulih dipeda “ari jauh.”—Mark 15:40.

Bala soldadu muka gari Jesus enggau dua iku perumpak nya. Udah nya, bala soldadu meri wain ke bechampur mur enggau utai pait ngagai sida. Engka bala indu ke datai ari Jerusalem nyediaka wain nya. Orang Rome meri wain tu ngagai sesiku orang ke diukum bunuh kena ngurangka pemedis ke diasaika iya. Tang pengudah Jesus ensepi ai nya, iya enggai ngirup. Nama kebuah? Laban Jesus sanggup ngasaika pemedis lebuh iya napi penguji tu, ngambika iya tetap sedar sereta tetap ati nyentukka mati.

Tubuh Jesus diengkahka ba tiang nya. (Mark 15:25) Bala soldadu mantang jari enggau kaki iya ba tiang nya, lalu paku nya tembus ngagai kulit enggau ligamen Jesus. Ketegal nya, Jesus tentu berasai amat pedis. Lebuh tiang nya diangkatka, pemedis ke diasaika Jesus majak balat agi, laban pemerat tubuh iya ngasuh abi ba jari enggau kaki iya ke dipantang majak charik. Taja pia, Jesus enda nganu bala soldadu. Iya besampi: “Apai, ampun meh sida, laban sida enda nemu utai ke dikereja diri.”—Luke 23:34.

Kesuah iya, orang Rome ngengkahka siti papan ba tiang ke nerangka penyalah ti digaga penjenayah ke diukum bunuh. Tu meh utai ke ditulis Pilate ba papan tiang perinsa Jesus: “Jesus orang Nasaret, Raja orang Judah.” Gelar nya ditulis dalam jaku Hebrew, Latin, enggau Gerika. Nyadi, mayuh orang ulih macha gelar nya. Utai ke digaga Pilate nunjukka, iya enda setuju enggau orang Judah ke keran minta Jesus dibunuh. Taja pia, bala tuai imam mantah utai ke ditulis Pilate. Ku sida: “Anang nulis, ‘Raja orang Judah,’ tang tulis, orang tu madahka, ‘Aku tu Raja orang Judah.’” Tang, Pilate enggai agi ngereja utai nitihka jaku sida. Iya nyaut: “Nama-nama utai ke udah ditulis aku, enda tau diubah.”—John 19:19-22.

Maya nya, bala tuai imam balat ringat. Sida ngulang baru jaku tuduh ti pelesu ke dipadah sida lebuh ngatur pechara Jesus. Lalu orang ke mansa ngilikka pala sida sereta ngeleseka Jesus: “Nye! Gamal nuan nya ke deka ngerubuh Rumah Sembiang, lalu nirika iya baru dalam tiga hari. Idupka diri empu dulu. Nurun nuan ari tiang perinsa nya!” Bala tuai imam enggau bala penulis Adat bejaku enggau pangan diri. Ku sida: “Awakka Kristus, Raja orang Israel, nurun kediri empu ari tiang perinsa nya diatu, ngambika kitai ulih meda lalu arapka iya.” (Mark 15:29-32) Indah dua iku perumpak ke diukum bunuh sama enggau Jesus mega ngeleseka iya, taja pan semina Jesus aja ke enda bepenyalah.

Empat iku soldadu Rome ke bisi ba dia mega ngeleseka Jesus. Sida engka bisi ngirup wain ti masam nya. Nyadi sida sengaja ngayanka wain nya ba mua Jesus kena nundi iya, laban Jesus enda ulih nyapai lalu ngambi wain nya ari sida. Ketegal utai ke ditulis ba papan atas pala Jesus, bala soldadu Rome pan madahka: “Enti nuan Raja orang Judah, selamatka diri empu.” (Luke 23:36, 37) Taja pan Jesus nya jalai, pemendar, enggau pengidup, tang iya balat diperinsa sereta dikeleseka orang. Iya sanggup napi semua utai ke enda adil nya. Lalu iya enda bemunyi lebuh dikelese orang Judah, bala soldadu Rome, tauka dua iku penjenayah ke sama diukum bunuh ba tiang baka iya.

Empat iku soldadu nya mega udah ngambi gari luar Jesus lalu magi gari iya nyadi empat bagi. Sida bechabutka undi kena nentuka ni bagi ke patut diterima tiap iku sida. Tang gari dalam Jesus nya digaga enggau chara ti amat manah, laban “gari nya enda dijait. Iya ditenun ari atas nyentuk ke baruh.” Ketegal nya, sida madah ngagai pangan diri: “Anang nyarikka gari tu. Aram kitai bechabut undi kena nentuka sapa ke patut ngempu gari tu.” Nya alai, sida ngamatka ayat Bup Kudus ke madahka: “Sida bebagika gari aku entara sida lalu bechabut undi ke gari aku.”—John 19:23, 24; Masmur 22:18.

Maya nya, siku ari penyenayah nya nyau sedar Jesus nya endang siku raja. Iya ngerara siku da agi penjenayah nya lalu madah: “Kati nuan enda nangika Petara? Nuan pan nerima ukum ti sama baka iya. Tua endang patut diukum baka tu ketegal penyalah tua. Tang lelaki tu nadai ngereja nama-nama penyalah.” Udah nya, iya madah ngagai Jesus: “Jesus, kingatka aku lebuh nuan tama ngagai Perintah nuan.”—Luke 23:40-42.

Jesus lalu nyaut iya: “Enggau bendar aku madah ngagai nuan seharitu: Nuan deka enggau aku,” ukai ba Perintah iya, tang “ba Paradais.” (Luke 23:43) Semaya tu enda sama enggau semaya Jesus ngagai bala rasul iya ke madah sida deka duduk ba kerusi diraja dalam Perintah iya. (Matthew 19:28; Luke 22:29, 30) Taja pia, penjenayah ti bebansa Judah tu engka kala ninga pasal dunya Paradais ke diberi Jehovah nyadi endur diau ngagai Adam, Awa, enggau bala peturun seduai iya. Nyadi taja pan perumpak nya mati, tang iya bisi harapan ulih idup ba dunya Paradais.